2018 ЧЫЛДАҒЫ ТОҒЫС САЛТАРЛАРЫНАҢАР
07.05.2019
Хабарлар
Хакасияның читінҷі хығыртииның ӧӧркі Чӧбі 30 апрельде сигізінҷі сессиязын иртірген. Сессияны ӧӧркі Чӧп кнезі Владимир Штыгашев апарған, аның тоғызында Хакасия пазының пастағы орынҷызы Андрей Асочаков, Хакасияның Федерация Чӧбіндегі кізілері Валерий Усатюк паза Александр Жуков, республика правительствозының кізілері, город-аймахтарның пастары араласханнар.
Сессияның тоғызы, Хакасия правительствозының кнезі полған Алексей Лебедьті хумартхылап, пір минута сым турғанынаң пасталған. Хакасиянаң 12 чыл устаан Алексей Иванович 27 апрельде Москвада ах чарыхтаң парыбысхан.
Сессияның кӱн суриинда 20 артиинаң сурығ полған. Пастап депутаттар ӧӧркі Чӧп депутады полыбысхан Наталья Кокореваның полномочиелері сын полчатханынаң чарасханнар. Наа депутат республика парламентінзер «Единая Россия» партияның списогынҷа кірген, Евгений Серебренниковтың орнына. Таштып аймааның территориальнай табығ комиссиязының кнес орынҷызы полған Наталья Кокорева хазых хайраллирынҷа паза социальнай политикаҷа комиссияда тоғынар. Республика депутаттары ідӧк Шира аймаандағы 2№ чарғы участогының мировой чарғыҷызына Павел Озорнинні турғызарға чарадығ пиргеннер.
Теестегі сурығ аңҷылар аразында лицензиялар ӱлестіреріне теелчеткен «Аңнирдаңар паза аң-хусты хайраллирдаңар» закон проекті полған. Ол февральдағы сессияда пастағы хығырығда алыл парған, че закон проектінҷе ам даа таластар тоозылбаанға тӧӧй. ӧӧркі Чӧп кнезі Владимир Штыгашев Хакасия правительствозы закон проектін читіре тимнир пӧгіннең пу сессия ӱзӱриинең суурыбысханынаңар искірген. Ол майдағы сессияда ӱзӱрілер тіп кӧрілче.
Сессияның ӧӧн сурығларының пірсі «Хакас Республикадағы идінҷектер праволарын арачылирынҷа уполномоченнай институдын чахсыландырары хоостыра Хакас республиканың алынҷа законодательнай акттарынзар алызығлар кирердеңер» закон проекті полған. Аны хоостыра идінҷектер праволарын арачылирынҷа уполномоченнайны табар оңдайны кізі праволарынҷа паза пала праволарынҷа уполномоченнайларныңох чіли ит салары кӧрілче.
Экономика политиказынҷа, промышленностьча, пӱдірігҷе паза транспортча комитеттің кнезі Василий Шулбаевтің искіриинең, анзы Хакасиядағы идінҷектерге хабазар пӧгіннең паза уполномоченнайның тоғызы толдырығлығ ӱлгӱнең палғалыстығ полбас ӱчӱн иділче. Амғы туста идінҷектер праволарын арачылирынҷа уполномоченнайны Хакасия пазы турғысча паза ол экономика министерствозының хойнында тоғынча. Закон проекті марттағы сессияда пастағы хығырығда алыл парған полза даа, пу сурығҷа ӱн пиріс ноға-да оой иртпеен. Закон проектін ікінҷі хығырығда паза пӱкӱлее алары ӱчӱн 26 депутат ӱн пирген, тоғыр - 15. Іди пір ӱн сылтаанда ла закон проекті алыл парған.
«Кӧп квартиралығ тураларда тиксі тыхтағ иртірерін тимнирдеңер» республика законынзар алызығлар кирчеткен закон проектін ӱзӱріп пастир алнында, ӧӧркі Чӧп кнезі Владимир Штыгашев пу сурығҷа министр нимес чоох тутчатханына (пӱдіріг паза ЖКХ министрі Илья Кононенконың орнына аның пастағы орынҷызы Анатолий Безлепкин чоох тутхан. - Авт.) хайиин салған.
- Ӱзінҷі хати ӧӧркі Чӧпнең тоғазарынаң хыйа полча, - таныхтаан Владимир Штыгашев. - Ағаа, тізең, сурығлар иң не кӧп. Россия президентінің Сибирьдегі федеральнай округтағы полномочиеліг кізізі Сергей Меняйло кил парғанда даа, ол тоғызын пілбинчеткенін кӧзіткен.
Ӧӧркі Чӧп устағҷызы Хакасия правительствозын пу сурыға хайығ саларға сурынған. (Халғанҷы искіріглердең, Илья Кононенко пос кӧңнінең тоғызынаң парыбысхан, республиканың пӱдіріг паза ЖКХ министрінің тоғызын толдырчатхан кізее Анатолий Безлепкин турғызылған. - Авт.)
Пасха ӧӧн сурығларның санында республикадағы кізі праволарынҷа паза пала праволарынҷа уполномоченнайларның 2018 чылдағы тоғыс салтарларынаңар сан пирістері полған.
Ирткен чылда Хакасияда кізі праволары хайди арачылал турғанынаңар республикадағы кізі праволарынҷа уполномоченнайның тоғызын толдырчатхан Ольга Крафт искіріг иткен. Аның таниинаң, сайбағларның кӧбізі социальнай кирексіністерге ахча читкіҷе позыдылбинчатханынаң палғалыстығ полған, пір онынҷы чардығы - ЖКХ сферазынаң. Кӧп айланыс чарғы чарадиинаң чараспинчатханынаң (11%), істеніс хайызығларынаң (7%) палғалыстығлар. Алынҷа сурығ - имнег полызии читкіҷе нимес синде пирілчеткені паза имҷілер чидіспинчеткені.
- Чалғыс ӧріністіг кирек, - таныхтаан Ольга Крафт, - хайзын чуртағҷылар махтапчалар, ол аал-городтардағы туралар ибіркізі иптелчеткені, чахсы кӧрімніг иділчеткені.
Хакасиядағы кізі праволарынҷа уполномоченнайы 2018 чылда тиксі 240 тоғазығ иртіртір, хоптарнаң 295 кізі айлантыр. Ольга Крафт чооғын тоозып, кізі праволарын арачылир тоғыста ағаа полысхан, удур парған прай кізілерге алғызын читірген.
Пала праволарынҷа уполномоченнай Ирина Ауль сан пирізінде айланыстар саны ӧсчеткеніне хайығ айландырған.
- Ирткен 2018 чылда пала праволары сайбалчатханынаң палғалыстығ сурығларнаң 600 артиинаң кізі айланған, - искірген ол. - 2017 чылда андағ айланыстар 400 азыра ла полған.
Хоптарның кӧбізі пала праволары сӧбіреде сайбалчатханынаң, ол санда іҷе-пабалар алименттерін тӧлебинчеткенінең палғалыстығ полтыр. Уполномоченнай ідӧк ирепчілер удаа чарылысчатханына хайығ айландырған: халғанҷы 5 чыл аразына иділген сананыстарҷа, 3 хоных тӧстееніне 2 хоных изелгені килісчеттір. Паза хоныхта нимес тӧреен палалар саны кӧптең кӧп полчаттыр. Олох туста халғанҷы пис чыл аразына кӧп палалығ сӧбірелер саны 45%-ке ӧс партыр. Региондағы прай палаларның пір пизінҷі чардығы андағ улуғ сӧбірелерде чуртапчаттыр.
Ирина Ауль республикада социальнай хабазығ пирілчеткенін, че олох туста сидіксіністер пар полчатханын таныхтаан.
Кӧзідімге кӧп палалығ сӧбірелерге чир участогы тикке пирілчеткенін ағылған. Че ол сӧбірелер ол чир участогынаң удаа тузалан полбин халчалар. Ӧӧн сылтағлар: чурт пӱдіреріне материаллар аларына оларның ахча чидіспинчеткені, пирілген чир участоктарында инфраструктура чох полғаны.
- Халғанӌы читі чыл аразына республиканың муниципальнай пӱдістерінде 3,5 муң сӧбірее чир участогы пирілген, - таныхтаан пала праволарынӌа уполномоченнай. - Че оларның 17 проценті ӱстӱнде адалған сылтағларӌа чир участогын аларға ынабаан.
Депутаттар ідӧк Ӧӧркі Чӧптің 2018 чылдағы тоғыс салтарларынаңар истіп алғаннар паза Россия президентінің Федеральнай Чыылығзар Айланызын чуртасха кирерінӌе мероприятиелер планын чарадыға алыбысханнар. Владимир Штыгашевтің искіриинең, Ӧӧркі Чӧп 2018 чылда 10 сессия, 39 президиум чыылиин иртірген. Оларда 97 закон проекті ӱзӱрілген, оларның 87-зі алыл парған.
Президенттің Айланызын чуртасха кирерінӌе алынӌа хайығ национальнай проекттерге салылған. Ӧӧркі Чӧп кнезі Владимир Штыгашев национальнай проекттерӌе тоғысты парламенттің сыныхтаана алып аларға киректелчеткенін таныхтаан. Паза Ӧӧркі Чӧп устағӌызы радиология корпузы пӱдіриине хати хайығ айландырған.
- Ол - уғаа кирек объект, аннаңар піс правительствоны, Андрей Серафимович Асочаковты, пастағы орынӌыны чіли, пу сурығны хатығ хайығда тударға сурынчабыс, - таныхтаан Штыгашев.
- Тӧрт ле субъект, ол санда Хакасия, мындағ объект чох полча.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде