ІСТЕНӋІНІҢ ТОҒЫЗЫ ААРЛАСТА ПОЛЗЫН!
07.05.2019
Хабарлар
«Хакасияның істеніс сабланызы» медальға турысхан улусха хаӌан даа улуғлас паза аарлас
Ӱлӱкӱн. Ағбан городта 1 Майға, Часхы паза істеніс ӱлӱкӱніне, чарыдылған демонстрация паза Пастағы май ачығында профсоюзтар паза халых пірігістерінің митингі ирткен.
1 Май демонстрациязында пастағы ла чыл аралазарға киліспинче, че ноға-да пӱӱл ле мин советтер тузында пу ӱлӱкӱн хайди таныхталғанын сағысха киргем. Минің, аалда тӧреен-ӧскен кізінің, сағызымда ол ӱлӱкӱннеңер пасталығ класстардағы учебниктердегі хоостар паза сомнар ла халған. Пабаның иңнінде хызыҷах одырча, аның холында ӧңніг шарлар... Кистінде, тізең, лозунгтар: «Мир! Труд! Май!», «Изен ползын, 1 Май!» паза пасхазы.
Пу ӱлӱкӱннең чирібіс кӧгеріп пастапча, хазың «ызырғаларнаң» чазаныбысча, нымырт паза сад ағастарының чахайахтары алҷазып пастапчалар. Олох туста чазыларзар хыраҷылар сыхчалар. Тракторларының тінін тудып, олар тамах салчалар. Тоғыс пасха даа орыннарда айныпча. Пілдістіг, пістің хазнада пу ӱлӱкӱн позының «ӧңнерін» алған, че ӧӧн сағызын амға теере чідірбеен тиирге чарир. 1 Май - ол істенҷілер ле кӱні нимес, ол ідӧк оларның праволарын арачылаҷаң кӱн.
Кибірли демонстрация колонназының пазында «Хакасияның істеніс сабланызы» медальға турысхан чуртағҷылар парғаннар. Кӧп чыллар республиканың экономиказының аймах кӧстеглерін тилідеріне хозым иткен чуртағҷыларнаң хости ӱлгӱдегілер пас парғаннар: Хакасия пазы Валентин Коновалов, Ӧӧркі Чӧп кнезі Владимир Штыгашев, профсоюзтар федерациязының кнес тоғызын толдырчатхан Елена Ольховская, министерство-ведомстволар пастыхтары, депутаттар. Республиканың паза Ағбан городтың учреждениелерінiң профсоюзтары, тоғынҷылары, партия кізілері колоннаны узаратханнар. «Дружба» гостиницадаң тибіреп пастаан демонстрация Пастағы май ачығына читкенҷе Щетинкин орамаа сӧӧліне халған. Пастағы май ачығында пастыхтар митингті асханнар. Россияның паза Хакасияның гимннерінің кӧӧ толдырылған соонаң сӧс алған республика пазы Валентин Коновалов.
Часхының тынызынаң усхунчатхан чир-чайаан кізілерні пос праволарын арачылирға турғысча, - теен республика пазы. - Россияда 1917 чылда тӧстелген ӱлӱкӱн пӱӱнгі кӱнге сала алыс парған полза даа, піс аның ӧӧн сағызын чідірбеебіс: істеніс ветераннарына, істенҷілерге, ідӧк хазнабыстың паза республикабыстың чуртазын чахсыландырарына хозым итчеткен прай чонға улуғлазыбысты читірерін. Олох туста піс пу кӱн істеніс кізілерiнің правозын арачылаҷаң кӱн полчатханын ундутпинчабыс. Профсоюзтар паза партиялар тоғыс оңдайларын чахсыландырарынҷа, істеніс законнарын толдырарынҷа кӱрезігні апарчалар. Пістің республика тилізіне хозым итчеткен прай кізілерні алғыстапчам паза, Хакасияны мыннаң мындар тилідер ӱчӱн, турғысхан пӧгіннерні чуртасха кирерге часхының чылығ тынызынаң хада кӱс хозылзын, наа сағыстар килзін! Пастағы Майнаң!
Чоох тутхан соонаң Валентин Коновалов ікі кізее «Хакасияның істеніс сабланызы» медальлар читірген. Андағ чеес тӱскен Г.Я.Ремишевскаяның адынаң республиканың имнег туразының диагноз лабораториязының имҷі-лаборанты Сусанна Ревтоваа паза «Россияның іҷелері» халых чӧрімінiң региондағы пӧлиинің араласчызы Надежда Хайловаа.
Хакасияның Ӧӧркі Чӧп кнезі Владимир Штыгашев кізі кӧңнін кӧдірчеткен сӧстернең митинг араласчыларынзар айланған:
- Аарлығ арғыстар, ӱлӱкӱннең сірерні, 1 Майнаң! Тоғыс тузы хызырыларынаңар мында кӧп чоох парған, че пӱӱнгі кӱрезігнің кӧстее пасха - пӱӱн пістің Хакасияда муңар кізі тоғыс чох, муңар кізі толдыра нимес кӱн паза тӧбін чал ахчазына істенче. Анзынаң ӧткін кӱрезерге кирек! Пістің килкім капиталлығлар сынында кӱстеніп істенчеткен улуснаң, хайзы істеніс сабланызына тоғынча, хара тас, чир ис-пайын аныпча, чарытхы сығарча, металл хайылдырча, парыснаң ӱлеспеске кӱстенче! Хомзынысха, партиялар «тикке чуртапчатхан» пірігістерге айлан парғаннар. Пӱӱнгі кӱнде істеніс кізізінің правозы ӱчӱн сынында кӱресчеткеннер санында профессиональнай пірігістер ле. Профсоюзтарнаң хайдағ даа ӱлгӱ, ідӧк «ахча тутчатханнар» санасхан ӱчӱн, оларға хатап кӱс алынарға кирек. Андада ла чуртас чахсыланар!
Пастыхтарның чоохтарына митинг араласчылары узун «Ура-а!» хысхырыснаң ӱндескеннер. Елена Ольховская «Істеніс кізізінің кӧңнін санға алчатхан экономика ӱчӱн!» митингтің резолюциязы хазна паза республика ӱлгӱлеріне ызыларынаңар чарлаан. Ӱлӱкӱнні С.П.Кадышевтің адынаң культура кінінің паза В.Г.Чаптыковтың адынаң Хакас филармониязының ырҷылары паза ӧмелері узаратханнар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде