КӰННӀ ХАЙДИ ПАСТИРЗЫҢ, ІДӦК ИРТІРЕРЗӀҢ
21.05.2019
Хабарлар
Чидіг. Хакасиядағы РТС телекомпания, Россияның журнализі Яков Лондонның хумартхызына чарыдылған марығда аралазып, чиңiсчiлер санында пол парған
Орта чоохтаза, Новосибирскте ирткен марығда пу компанияның «Иртенгі Хакасия» ӱтертістіг проекті ӧнетін сыйыхнаң - хоос фильмнерні, сериалларны, мультфильмнерні, концерттерні, документальнай, ӱтертістіг паза пасха даа программаларны ікі ай тикке кӧзідеріне праволығ лицензиянаң - таныхтатхан. Аны «Национальный телевизионный синдикат» (НТС) компанияның ӧӧн устағчызы Юлия Яцкова пістіңнерге читірген. Чоохтирға кирек, Россияда НТС аймах каналлардаң, сайттардаң хабар-искіріглерні пір чирге чыыпчатхан иң улуғ компания полча. Аның ідӧк пасха хазналардағы фильмнерге лицензиялар алар, оларны телекомпанияларға садар, пирер оңдайы пар.
- Мындағ сыйыхха піс тың ӧрінчебіс. Амды программабысты уламох хынығ паза тузалығ тимнир кӧңнібіс пар. Кӧрігӌілер пасха телеканаллар аразында пісті ле таллап турзыннар. Аның ӱчӱн піс хараа-кӱнӧрте дее тоғынарға тимдебіс, - ӱлескен РТС телеканалда «Иртенгі Хакасия» программаны апарчатханнарның пірсі Иван Тинников.
Яков Лондонның хумартхызына чарыдылған марығда Россияның Сибирьдегі федеральнай округының, Волга хазындағы, Ыраххы Востоктағы паза алтынзархы регионнарның иң улуғ СМИ-лары араласханнар. Чарғыӌыларға тиксі 100 азыра тоғыс паалирға киліскен: ӱтертістіг паза искірігліг программалардаң пасти кічіг сюжеттерге теере.
«Иртенгі Хакасия» программаның пу ікінӌі чиңізі полча. Пастап аны Россияның Журналисттер пірігізі ідӧк пӧзік паалаан. Ол танығлығ кирек 2018 чылда полған.
Амды хысхаӌахти пу проекттеңер.
- Ӱтертістіг программа тӧстирдеңер сағыс хаңанох полған. Че оңдайлар паза, ӧӧні, тоғынҷаң кізілер чох полған сылтағнаң ол чуртасха киріл полбинчатхан, - тееннер Хакасиядағы РТС телеканалның хабарӌылары.
Ікі чыл мының алнында, тізең, наа килген устағӌы Дмитрий Драничкиннің хабазиинаң пу сағыс тол парған. Ол профессионалларны даа тапхан, телевидение тоғызын алғыдарына кирек техника даа суриин пӧгібіскен.
- Андағ ла оой полбаан тиирҷікпін мин. Че хайдағ даа 24/7 форматтығ телеканаллар иртен хынығ паза тузалығ программалығ полчалар тіп сағыс пісті сым одыртпаан. Аннаңар ол киректі пастирына прай кӱзібіс, пілізібіс, узыбыс салғабыс. Хайдағ даа кӧрігӌі иртен тоғысха парча нооза. Амды піс, кӱн чахсы ирт парзын тіп, пу ӱтертістіг программабыснаң оларның кӧңнін кӧдірчебіс. Тоғысха тимненчеткен кӧрігҷілерге ідӧк передачаны апарчатханнарнаң хада кофенең чей дее ізіп аларға чарир, - чоохтап пирген РТС телеканалның ӧӧн директоры Дмитрий Драничкин.
«Иртенгі Хакасия» программа 2017 чылдаң апарылча. Аның тузы - 6.00 частаң 9.00 часха теере.
- Піс пасха телеканалларда кӧзіділбинчеткен, искірілбинчеткен сюжеттерні тимнепчебіс. Пістің иртенгі программабыста автомобильлерге чарыдылған, ас-тамах тимнирге ӱгретчеткен, модадаңар, сад-ӱӱҷік тамаан саларынңа чӧптер пирілчеткен рубрикалар пар. Ідӧк полған на иртен студиязар чапсых аалҷылар кил парчалар: психологтар, артисттер, музыканттар, министерстволар кізілері паза даа пасхазы. Олар прайзы пір дее чирде искірбеен хабарларынаң ӱлесчелер. Пір сӧснең, полған на кӧрігӌі «Иртенгі Хакасия» программа пастыра позына кирек ниме таап ла алар, - чарыт пиргенннер РТС-тың хабарӌылары.
Автор :
Тимнеен Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы