СОЙАН-СУС ГЭС-тағы СААЙҒА - 10 ЧЫЛ
21.08.2019
Хабарлар
Хумартхылас кӱні. Хакасияның пазы Валентин Коновалов Сойан-Сус ГЭС-тағы саайда чуртастарын чідіргеннерні хумартхылаҷаң мероприятиелерде араласхан
НЫМЫРТТЫҒДА СОЙАН-СУС ГЭС-тағы СААЙДА ЧУРТАСТАРЫН ЧІДІРГЕННЕРНІ ХУМАРТХЫЛАӋАҢ МЕРОПРИЯТИЕЛЕР ИРТКЕН. ПӰӰЛ ОЛ 75 КІЗІНІҢ ЧУРТАЗЫН АПАРЫБЫСХАН ХОРҒЫСТЫҒ СААЙҒА 10 ЧЫЛ ТОЛҒАН. ЧЕ НЫМЫРТТЫҒНЫҢ ЧУРТАҒӋЫЛАРЫНА ОЛ ЧОБАҒ КИӋЕЕ ЛЕ ПОЛҒАН ЧІЛИ ПІЛДІРЧЕ. ОЛАРНЫҢ ПОЛҒАНЫ ЛА КЕМНІ-ДЕ ЧІДІР САЛҒАН: КЕМ-ДЕ - ПАЛАЗЫН, КЕМ-ДЕ - ХАРЫНДАЗЫН АЛАЙ ПИӋЕЗІН, КЕМ-ДЕ - АРҒЫЗЫН, ӦӦРЕЗІН, КЕМ-ДЕ - ІӋЕ-ПАБАЗЫН...
ИРТКЕН СУББОТАДА, 17 АВГУСТТА, НЫМЫРТТЫҒДА РУСГИДРО КОМПАНИЯНЫҢ КӰЗІНЕҢ ГЭС-тағы СААЙДА ЧУРТАСТАРЫН ЧІДІРГЕННЕРГЕ ЧАРЫДЫЛҒАН ХУМАРТХЫЛАС СКВЕРІ АЗЫЛҒАН. КИМ СУҒ ХАЗЫНДА ОРНЫХЧАТХАН СКВЕРНІҢ ОРТЫЗЫНДА МЕМОРИАЛ КОМПЛЕКСІ, АНЫ СААЙДА ӰРЕЕНЕРНІҢ ТУҒАН-ЧАҒЫННАРЫ СУРЫНЫЗЫ ХООСТЫРА ТУРҒЫС САЛҒАННАР.
Ол хумартхы таста саайда ӱреен 75 кізінің ады киртілген. Скверні азарында Хакасияның пазы Валентин Коновалов, республика правительствозының кізілері паза РусГидроның устағ-пастаа араласхан.
- Пу саай прай республикаа, Нымырттығда паза чағынғы аал-городтарда чуртапчатхан полған на сӧбірее теелген, - таныхтаан республика пазы Валентин Коновалов, чоох тудып. - Хайдағ ниме пол парғанын піс ундутпинчабыс, прайзы улам улуғ хорғыс поларын сағаан. Че пірге кӱстеністернең, специалисттернің матлама тоғызынаң, прай хазна хабазиинаң ол хорғыс чох иділген. Республика правительствозы паза позымның адымнаң энергетиктерге, арачылағҷыларға, прайзына - кем саайның салтарларын чох идерінде араласхан паза улам хорғыстығ салтарлар поларын тохтатхан - алғызым читірчем. Тоғызын толдырып, чуртастарын пир салғаннарның сӧбірелерінең хада чобалчам. Пу пірігіс кӱні, хаӌан піс прайзыбыс пір чобағдаң тоғыр турыбысхабыс. Чуртастарын пир салғаннарның аттары ундулбазын.
- Пу чобағлығ саай соонаң прай гидроэнергетикаа, тиксі отрасльға кӧрісті алыстырарға киліскен, - чоохтанған «Рус-Гидро» ПАО-ның ӧӧн директоры Николай Шульгинов - Пістің коллегаларның чуртастары ӱзілгені энергетика объекттерін хорғыс чох идеріне хайығны алыстырған. Тиксі халых чонның хорғыс чох сурығларына хайиин алыстырыбысхан.
17 августта 2009 чылда иртен Сойан-Сус ГЭС-та гидро-агрегаттарның пірсі иңзерілген сылтаанда улуғ техногеннай саай пол парған. Иңзерілген орынҷа кірген улуғ суғ позының чолында прай нимені хырған - машиннай зал, андағы ГЭС тоғынҷыларынаң хада, прай суғ алтында пол парған.
Ол чочыныстығ кӱн Хакасия чуртағҷыларының сағызында ӱрге халған: ГЭС-та улуғ саай пол парғанынаңар тылаас чонда чапчаң тарап сыххан. Пола-пола гидроэлектростанцияның тулғоры иңзеріл парған, улуғ суғ ин килир тіп чоох-чаахтар чӧр сыххан. Чон ӱрӱгісте, сотовай телефоннар палғалызы сидіксіністіг - прайзы сығдыратча, ниме пол парғанын піліп аларға кӱстенче. Хайзы чон, суғ ин килерінең чочынып, ырах паза пӧзік орыннарзар парғлаан. Че хорғыс улғаат парбаан.
Саайға 10 чыл толчатхан кӱнде Сойан-Сус ГЭС-тың прай объекттерінде, Нымырттығ поселокта саайда ӱрееннерні хумартхылап, пір минута сым турғаннар. Ким суғ хазынаң, сквердең киизер худай хузына тӧӧй ах шарлар позыдылған. Ӧӧр кӧдірілчеткен шарларны кӧре, чыылысханнарның кӧбізі харах частарын чызынған...
Хакасияның пазы Валентин Коновалов пуох кӱнде Уйскай сыыраттағы часовняда пол килген. Часовняда ГЭС-тағы саайда ӱрееннерні хумартхылаҷаң мемориалзар тіріг чахайахтар салған.
Пу хорғыстығ саай соонаң хазнадағы прай ГЭС-тарға хайығ салылған, оларны хорғыс чох идер оңдайлар алыстырыл сыххан. Сойан-Сус ГЭС, прай тыхталып, нааҷылалған, прай гидроагрегаттар, гидро-генераторлар алыстырылған, тулғорны тӧреміл сыныхтағда тутчаң амғы тусха килістіре система турғызылған. Артых суғны ибіртін чарңа ағысчаң ӧнетін пӱдіріг турғызылған. Салтарында, Россияда иң кӱстіг гидроэлектростанция полчатхан Сойан-Сус ГЭС пӱӱнгі кӱнде улам кӧп чарытхы пирер оңдайлығ пол парған.
Че пу саайны, анда чуртастарын пир салғаннарны ундирға чарабас. Иң не пастап, мындағ хорғыстығ саайлар паза полбас ӱчӱн.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде