ШКОЛА, ОЛҒАН САДТАРЫ ПӰДІРИИНЕ ХОРҒЫС ЧОҒЫЛ, ЧЕ...
21.01.2020
Хабарлар
Бюджет сурии. Хакасияның Асхыс паза Шира аймахтарында 2020 чылға паза кӧрілчеткен 2021-2022 чылларға аймах бюджеттері алылбаан. Пу чарадығларнаң палғалыстығ хайдағ хорғыстар парын чарытча республиканың финанстар министрінің пастағы орынӌызы Павел Кононов
Хакасия правительствозы паза пу ікі муниципальнай пӱдіс устағ-пастаа піліс полбинчатханы пірдеезіне чазыт нимес. Аймахтар, хорадығларына парыстарны читір полбин, халғанҷы чарадыға килгеннер - 2020 чылға паза кӧрілчеткен 2021-2022 чылларға аймах бюджеттерін албасха. Пілдістіг, андағ чарадығ пір кӱнге ле алылбинча. Ідӧк ол аймахтарның депутаттар чӧптерінің не чарадии нимес, иң пастағызын, ол аймах устағ-пастааның сағыс-кӧрізінең палғалыстығ. Амды Асхыс паза Шира аймахтары пос хорадығларына ахчаны 2019 чылда кӧрілген бюджедінің 12-ҷі чардығын ай сай ал турарға киректер. Андағ оңдай Россияның бюджет кодексінде кӧріл парған, че ол аймахтарда чуртасха кирілчеткен хазна программаларына паза нацпроекттерҷе турғызылчатхан социальнай пӱдіріглерге теелбинче.
- 2020 чылға паза кӧрілчеткен 2021-2022 чылларға бюджеттерін албин, Асхыс паза Шира аймахтары субсидия оңдайынаң бюджеттер аразындағы кӧстегліг трансферттерні, ол санда федеральнай бюджеттең пирілчеткен ахчаны, ал полбасха итчелер, - чарытча Хакасияның финанстар министрінің пастағы орынҷызы Павел Кононов. - Ідӧк аймах бюджедін албаан муниципальнай пӱдіске субъекттің бюджедінең, ол санда федеральнай бюджеттең, хазна программаларын чуртасха кирерінҷе кӧрілген ахча иирілбес. Ӱс чыл аразына - 2020, 2021 паза 2022 чылларға - Асхыс аймаана 450 миллион азыра салковай субсидия кӧрілче, Шира аймаана - 53 миллион азыра салковай. Бюджеттер аразындағы кӧстегліг трансферттерні алар ӱчӱн, субъект ӱлгӱлері федеральнай ӱлгӱ органнарынаң чӧптес салған соонаң, муниципальнай пӱдіске 30 кӱн аразына субъект ӱлгӱлерінең чӧптес саларға киректелче. Адалған аймахтарға пу тус кӱрген айының 20-ҷі кӱнінең пасталча. Піс Асхыс паза Шира аймахтарына муниципальнай пӱдістернің бюджеттерін пу тусха чарадыбызарға чӧитеичeбіс.
30 кӱн аразына кирек алыспаза, орта чоохтаза, аймахтар бюджеттерін чаратпазалар, муниципальнай пӱдістерде социальнай проекттернің толдырыларына хорғыс сығызар. Ол, тізең, - ӱгредіг паза культура учреждениелерінің ис-пайын паза техниказын нааҷылааны паза хоза алғаны, чоллар пӱдірии, школаларда палаларны азырааны паза пасха даа кӧстеглер.
Олох туста 2019 чылда иділген чӧптезіглер хоостыра нацпроекттерҷе пӱдірілчeткeн социальнай учреждениелер пӱдіриине ахча пирілері ӱзілбес. Павел Геннадьевичтің таниинаң, ол - республиканың нандырии. 2020 чылда Асхыс аймаанда узарадылар Асхыс посёлоктағы паза Пилтір аалдағы олған садтарының паза Чоғархы Пазадағы пасталығ школаның пӱдірии, Шира аймаанда - Шира аалдағы Иліг кӧл микрорайонындағы олған садының паза Наа чирдегі ортымах школаның пӱдірии. Ідӧк республика ӧкіс олғаннарға чурт аларына ахча позыдар.
Аймахтар ідӧк дотациялар чох халарға айабастар. 2020 чылда Асхыс аймаана 28 миллион паза 22 миллион салковай дотация кӧрілген, Шира аймаана - 9 миллион паза 15 миллион салковай. Пу ахча орындағы бюджеттерні тиңниріне паза аал чӧптерінің бюджеттеріне кӧрілче. Тиксі республикадағы муниципальнай пӱдістерге 2020 чылда 2 миллиард 903 миллион 965 муң салковай хабазығ кӧріл парған. 2019 чылда 2 миллиард 674 миллион 285 муң салковай полған. Хайди кӧрчебіс, ӧзіс пар, че орындағы ӱлгӱлерні анзы чӧпсіндірбинче осхас.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы