ИҢ ХЫНЫҒ ПАЗА ТУЗАЛЫҒ ЧЫЛЛАР
24.01.2020
Хабарлар
Таңда - Россия студенттерінің кӱні. Пу пайрам пістің хазнада 1755 чылның 25 январьынаң сығара таныхталча
ОЛ КӰҢДЕ ИМПЕРАТРИЦА ЕЛИЗАВЕТА ПЕТРОВНА МОСКВАДА УНИВЕРСИТЕТ ТӦСТИРДЕҢЕР ЧАРАДЫҒДА ХОЛ САЛЫБЫСХАН. ӀДИ ПАСТАП ЧЫЛ САЙ 25 ЯНВАРЬДА ПУ ӰГРЕДӀГ УЧРЕЖДЕНИЕЗӀНӀҢ ТӦРЕЕН КӰНӀН ТАНЫХТАҶАҢНАР. СООНАҢ ОЛ ПАЙРАМ СТУДЕНТТЕР КӰНӀНЕ АЙЛАН ПАРҒАН,
2005 ЧЫЛНЫҢ 25 ЯНВАРЬЫНАҢ - РОССИЯ СТУДЕНТТЕРТНӀҢ КӰНӀНЕ. ПӰӰНГӀ КӰНДЕ ОЛ ПӦЗӀК ӰГРЕДӀГ ЗАВЕДЕНИЕЛЕРӀҢДЕ, КОЛЛЕДЖТЕРДЕ, ТЕХНИКУМНАРДА ӰГРЕНЧЕТКЕН ООЛ-ХЫСТАРНЫҢ ИҢ ХЫНЧАТХАН ӰЛӰКӰНӀ!
Н.Ф.КАТАНОВТЫҢ АДЫНАҢ ХАКАС ХАЗНА УНИВЕРСИТЕДӀ - ХАКАСИЯНЫҢ ИҢ ӦӦН ПӦЗӀК ӰГРЕДӀГ ЗАВЕДЕНИЕЗӀ. АНЫҢ ХОЙНЫНДАҒЫ ИНСТИТУТ-КОЛЛЕДЖТЕРЗЕР ӰГРЕНЕРГЕ КӀРЧЕТКЕН ЧИИТТЕРНТҢ САНЫ ЧЫЛ САЙ ХОЗЫЛЫП ОДЫРЧА.
Малена Чебодаева ХГУ-дағы педагогика ӱгредиинің, информатика паза право колледжінің 3-xi курстағы студенті полча. Ол школа алнындағы ӧнетін ӱгредiг программазынңа ӱгренче. Чарыда чоохтаза, педколледжті тоосса, Малена олған садында кинек палаларнаң тоғынҷаң специалист полар.
- Минің кічіг туңмамның хазии уйан. Аннаңар иң пурнада мындағ специальность аларға чаратхам. Соонаң, тізең, хакас тілі ӱгретчізі поларға сағынчам. Колледж соонаң пӧзік ӱгредіг аларға пӧгін тутчам, - ӱлескен Малена.
Ол тиктең не мындағ пӧгін турғыспинча. Малена хакас тілінең, культуразынаң кічігдең ала пик палғалыстығ. Таштып аймаандағы Пыдырах аалда ӧзіп, пос тілінің сілиин, тадиин чахсы пілче. Чахсы сарнапча, тахпахтапча. Студент хыс «Кӱн чахайағы» ансамбльзар сарнирға, теелбектенерге чӧрче. Кӱстенҷік кізі прай чирде - ӱгредігде дее, чайаачы киректерде дее - пӧзік чидіглерге читче!
Лиана Чертыкова, Вероника Котожекова пу колледжте пастағы курста ӱгренчелер. Асхыс аймаандағы Чоғархы Асхыстағы школада 9 класс тоосхан Лиана, 3-ҷі курстағы Малена чіли, школа алнындағы ӧнетін ӱгредіг программазынҷа пілістер алып пастапча. «Мин ӱгретчі поларға кічігдең ала сағынғам. Аннаңар ол чолзар педколледжтең сығара кірерге чаратхам. Мыннаң мындар чолым хайди салыларын тус кӧзідер», - чарытхан Лиана. Алтай аймаандағы Аршаннар аалында 9 класс тоосхан Вероника олған садында тоғынар воспитательге ӱгренче. «Мин ідӧк олғаннарға тың хынчам. Аннаңар педколледжсер кіргем. Мыннаң мындар логопедке алай ба психологка ӱгренерге пӧгін тутчам», - теен Вероника.
Хайди таныхтапчалар наа ла ӱгреніп пастапчатхан чииттер, студент тузын олар хынығ паза тузалығ иртірерге сағынчалар. Улуғ курстағы студент Малена Чебодаева оларға чахсы ла ӱгренерге чӧп пирче. «1-ғы ла курста ниик. 2-ӌі курстаң ӱгреніске улуғ хайығ саларға кирек», - тіпче ол.
- Пістің колледжте Студенттер кӱні чыл сай алғым таныхталча. Халғанҷы туста чирлидинг кӧрімҷе 1-2 курстағы студенттер аразында марығ иртче. Чииттер аймах теелбектер сағын таап алчалар. Марығ турыстыра иртче тиирге кирек, - чоохтаан педколледжтің ӱгретчізі Анжелика Байкалова.
Пӱӱл Студенттер кӱні субботаа килісче. Аннаңар «наука гранидін кимірчеткен» чииттернің пайрамы уламох хынығ иртерінде ікінҷілес чоғыл.
25 январьны чонда ідӧк Татьянаның кӱні тіпчелер. Ол пу аттығ ипчі чонның ӱлӱкӱні тиирге кирек. Че студент полчатхан Татьяналарға ол ікі хати танығлығ кӱн, неке.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде