АЗЫҒ АЙЫНЫҢ ИҢ СИРГЕК ХЫҒЫРЫҒӋЫЗЫ
25.03.2020
Хабарлар
Марығ. Пӱӱн піс азығ айының иң сиргек хығырығҷызынаң таныстырчабыс. Ол - Улуғ Ноныптағы хакас тілі паза литература ӱгретчізі Эльза Алексеевна Чебодаева
Кӧрік айының 10-ҷы кӱні. 9.00 час иртен. «Хакас чирі» газетаның редакциязы. Приёмнайда телефон сығдырапча. Референт, трубка алып, азынада тимнелген чаңында танығлар турғысча. Ир кізі «Иң сиргек хығырығҷы» марығ сурығларына нандырығлар тимнеп салтыр. Пис сурығның пірсіне орта нандыр полбады. Трубканы салыбысханда, ол хатабох сығдыри тӱсті. Референт чаҷында пазох танығлар турғысча. Пір алҷаас парох. Мында приёмнайзар аалҷы тохлатча. Газетабыстың иргі хығырығҷызы сурығларыбысха нандыр пирерге тіп редакциязар чиде тӱстір. Ол ідӧк пір сурыға орта нандыр полбаан. Телефон пазох сығдырапча. Ол полған Улуғ Ноныптағы Эльза Алексеевна Чебодаева. Пис суриибысха прай орта нандыр пирді. Піс аны сах андох газетабысты сиргек хығырчатхан ӱчӱн алғыстаабыс. Чоохтирға кирек, редакция Эльза Алексеевнанаң чахсы таныс. Ӱгретчі кізі ӱгренҷілерін газетаның кічіг хығырығҷылары аразында чарлалған хоостар мариинда аралазарға чӧптеен. «Хакас тілі - минің сӧбіремде» хоостар мариинда Эльза Алексеевнаның ӱгренҷізі Анара Тюкпиекова ӱзінҷі орынға турысхан. Амды ӱгретчі позы марығ чиңісчізі полыбысты паза азығ айының «Иң сиргек хығырығҷызы» атха турысты.
Ирткен пятницада, кӧрік айының 20-ҷі кӱнінде, газета редакциязындағы конференц-залда марығ чиңісчізіне турыстыра сыйыхтар читірілген. Азығ айының чиңісчізін сыйыхтаан идінҷек Алексей Сунчугашев. Ол «Планета спорта» садығ туразының (Ағбан г., Щетинкиннің ор., 61) ээзі полча. Садығ туразында спорттың аймах кӧрімнерінең айғазарға кип-азах, килістіре маймахтар паза тиріглер садылча. Алексей Анатольевич марығ чиңісчізіне пу садығ туразының 3000 салковайға сертификадын тимнеп пирген.
Аннаң пасха, газетаның ӧӧн редакторы Радион Сунчугашев «90 чыл чоннаң хада» киндені читірген. Пу кинде газетабыстың 90 чылына удур тимнеліп сығарылған. Анда газетабыстың улуғ нимес тархыны, устаан-тоғынған кізілернің чуртас чолы паза газета тилізіне хозымы пирілче. Пу сыйыхтарны читіріп, Радион Дмитриевич сиргек хығырығҷыны, Эльза Алексеевнаны, марығда араласхан ӱчӱн алғыстаан паза мыннаң мындар газетанаң ідӧк пик палғалыс тударға алғаан.
- Хайди пос чонының газетазына пазынмас, - чапсыпча газетаны хаҷаннаң ала алчатхан кізі. - Ол республика чуртазынаңар, чоныбыстың саблығ кізілерінеңер ле хабарлар нимес, ол тілібістің тынызы. Марығдаңар чарлағ кӧр салғандох, аралазарға чаратхам. Алында даа газетаны тиксі хығырҷаңмын. Ам уламох ситкіп хығырчам.
Сурығларның пірсінде ле Эльза Алексеевна сала сидіксінтір, «кӱмӱс волонтерларның» устағҷызын таппин. Че хати-хати хығырғанда, орта нандырыға тоғасхам тіпче хығырығҷы.
Эльза Алексеевнаны чиңізінең алғыстапчабыс! Сірер, тізең, аарлығ хығырығҷылар, ундутпаңар, «Хакас чирі» газета, кӧрік айының иң сиргек хығырығҷызын тілеп, пазох марығ чарлаан. Пу айда наа спонсор полар, сыйых таа хомай полбас. Аралазыңар, марығ оңдайларынаң танызыңар. Пӱӱн, тізең, азығ айының марығ сурығларына орта нандырығларны пирчебіс:
1. Саблығ кибелісчі, тілбесчі, істезігҷі Наталья Ахпашеваа хайдағ сыйии иң аарлығ? - Аман Тулеевтің медальы - 4.02.2020, 6 стр.;
2. «Кӱмӱс волонтёрларның» устағҷызы кем? - Нина Чаптыкова - 12.02.2020, 8 стр.;
3. Кем Ағбан город синінде иртірілген хакас тілі ӱгретчілері мариинда пір саңай ікі номинацияда чиңісчі полыбысхан? - Лариса Ивановна Тинникова - l9.02.2020, 6 стр.;
4. Алтай аймаандағы Киров аалның хакас ады? - Чынай аал - 2l.02.2020, 13 стр.;
5. Ибде хайыныбызып, хайдар маңзырапча Піҷі пазы аалның чуртағҷызы Геннадий Кротов? - Клубсар, репетицияа - 26.02.2020, 5 стр.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде