Ӱлӱкӱннер чағдапча, сағыссырастар хозылча
23.12.2020
Хабарлар
Улуғ хырлас айының 23-ҷi кӱнiнде Хакасия пазы Валентин Коноваловтың устаанынаң коронавирусты тараттырбазынҷа штаб чыылии ирткен.
Республика пазының орынҷызы Юрий Курлаев пӱӱнгi саннарнаң таныстырған. Ирткен суткада коронавирусты хаптырып алған 180 кiзi санға алылған, 2130 кiзi ағырыға сыныхтағ ирткен, 188 кiзi хазыхтанып алған, 10 кiзi ӱреен. Тиксi республикада наа чуғынҷах ағырығдаң 183 кiзi ӱреенi санға алылған. Хакасияның хазых хайраллаҷаң министерствозы республикадағы имнег тураларында коронавирустаң имнирге кӧрiлген орыннарның 30 % пос тiп искiрген. Ол наа ағырыбысханнарны чатырарына читкiҷе.
Айланыстар саны хызырыл сыхханда, Ағбандағы имнег туразының ӧӧн имҷiзi Ирина Ягодкина электроннай почтаҷа айланыстарны аларын тохтадарға, анда тоғынған специалисттi, тiзең, телефонҷа айланыстарнаң тоғындырарға чӧптеен. Хакасия пазы Валентин Коновалов имнег туразына соцсетьтердегi хопнаң табырах тоғыныбызарға чахаан. Чоохтирға кирек, соцсетьтерде республиканың ӱлгӱлерiнiң тоғызына теелчеткен прай айланыстарны паза танығларны Хакасияның устағ кiнi чыыпча, анаң толдырығлығ ӱлгӱ органнарына читiрче.
Полған на штаб чыылиинда сыныхтағлар паза хатығластар санынҷа сан пирiс идiлче. Пу чыылығда Хакасияның юстиция киректерiнҷе паза регионның безопаснозынҷа министрi Сергей Ромашов пу кӧстегҷе чахсы тоғынчатхан муниципальнай пӱдiстернi алғыстас пiчиинең таныхтирға чӧптеен. Ол санда Ағбан, Харатас городтар паза Алтай аймаа.
Штаб араласчылары ӱс муниципальнай пӱдiсте ағырығ тарирынаң тоғыр хайдағ тоғыс апарылчатханнаңар тыңнирға пӧгiнгеннер. Че Пии аймаа пазы Иннокентий Стряпков тоғыс орнында чох полған, орынҷызының искiриинең, анзына улуғ сылтағ пар. Хакасия пазы Пии аймаа пазының сан пирiзiн пазағы чыылыға чылдырған.
Сорығ город пазы Владимир Найденовтың искiриинең, ағырығ килкiм предприятиелернiң тоғысчы ӧмелерiнде тарапчатханда, чуртағҷыларның хайии даа ағырығны тараттырбас кирексiнiстерге алысхан. Аннаңар даа сыныхтағ ӧмелерi сайбағларны таныхтабинча. Че аның кӧрiзiнең, городта ибде имненчеткен ағырчатханнарны сыныхтиры уйан апарылча. Орджоникидзе аймаа пазы Анатолий Тайченачевтiң искiриинең, пӱӱнгi кӱнде аймахта улуғ частығларнаң хада ӧткiн тоғыс апарылча. Оларны ибде одырарға хығырчалар, кирексiнiс полза, орындағы устағ-пастағ кiзiлерiнзер айланарға чӧп пирiлче. Олар ибзер чиис, кирек ниме-ноо читiрерге полысчалар. Таштып аймаа пазы Алексей Дьяченконың сан пирiзiнең, сыныхтағ ӧмелерi 56 сыныхтағ иртiргеннер, ол санда нинҷе-де сайбағ таныхтааннар.
Сан пирiстернi истiп, чыылығ араласчылары, уламох Роспотребнадзорның Хакасияҷа управление пастығы Татьяна Романова, сағыссырастарынаң ӱлезiп, город-аймахтар пастарына орындағы чуртағҷыларны ӱлӱкӱннернi ибде, ааллас чӧрбин, иртiрерге чӧптирiнҷе чахсы тоғыныбызарға хығырғаннар. Олар кiчiг аалларға паза тоғысчы ӧмелерге сағыссырапчалар. Наа чыл ӱлӱкӱннерi соонаң тоғысха сығар кiзi халбаза, хайди поларбыс? Кем-де таныхтаан.
Пӱӱнгi кӱнде имнег туралары тынағ кӱннерiне тоғыс графигiн тимнепчелер. Пазағы штаб чыылиинда муниципальнай пӱдiстер сан пирiснең чоох тударын узарадарлар. Искiрiг Пии паза Боград аймахтарынаң полар.
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде