ФЕРМА ХОНЫХТАРЫНЗАР ЧАРЫТХЫ ТАРТЫЛЧА
21.02.2017
Хабарлар
Пӱӱнгі кӱнде Хакасияда аал хониина улуғ хайығ салылча. Хазна хабазии полызиинаң аал чуртағҷыларының пос хониин алғыдар оңдай пар: кем-де фермер киреен пастапча, сала килкім хоныхтығ чуртағҷылар сӧбіре фермаларын пиктепчелер. Аал хониинаң айғазары - ниик ле тоғыс нимес, че аның кӧп чардығын нииктеп аларға чарир. Анзына ідӧк хабасча ферма хоныхтарынзар чарытхы тартханы. Аны тартар тоғыс аарлыға турза даа, фермерлер пілчелер чарытхы тиліске чахсы чӧлег поларын.
«Сибирьнің регионнар аразындағы сетьтерні чарҷаң компаниязы» («Россети» ПАО-ның хоза компаниязы) -«Хакасэнерго» ПАО-ның пресс-службазы искіриинең, Хакасияда аал хонии предприятиелерінің чарытхы тартырарына кирексінізі ӧсче. 2016 чылда энергетиктер 10 кресен-фермер хониинзар чарытхы тартханнар, 2017 чылға андағ 54 сурыныс кірген. Хакасияның аал хонии министерствозы специалисттерінің кӧрізінең, чарытхы кирексіпчеткен фермерлер саны пу чағында ікі хати ӧс парар.
Энергетиктер фермерлернің сурыныстарынҷа тоғынчалар. Іди январьда республикада ӱс ферма хониинзар чарытхы тартыл парған. Прай фермаларзар тартылған чарытхының кӱзі 107 кВт полар. Пии аймаанда тамах хайраллаҷаң ӱртӱн паза мал хазаазы чарытхаа чидінген, Асхыс аймаанда - сӱттең ниме-ноо сығарар цех. Чарытхы тартырып алғаны пу хоныхтарның тоғызын илееде тибіредер сағынчам.
Фермерлерге ӧӧні - чарытхыны табырах тартырып алары, энергетиктернің, тізең, постарының сидіксіністері. Иң пастағызын - ол аарлығ оборудование паза тоғыс. Чарытхыны кирек пӱдірігзер тартар ӱчӱн, оларға нинҷе-де километр ЛЭП тартарға, трансформатор подстанцияларын турғызарға киректелче. Ол уғаа аарлығ тоғыс: январьда фермерлерзер чарытхы тартарына 1,5 миллион азыра салковай хорадылған. Энергетика компаниязы тоғысха пос ахчазын таапча. Фермерлернің хорадығлары 550 салковайдаң 17 муң салковайға читкен. Пу льготалығ паалар.
Халған фермаларзар чарытхы тартар ӱчӱн, энергетиктерге 160 миллион салковай киректелче: ол 120 километр ЛЭП тартарына паза 45 трансформатор подстанциязын турғызарына. Че хайдаң ол син ахчаны аларға? Анзы палғалыстығ ікінҷі сидіксініснең: чарытхынаң тузаланчатхан предприятиелер, ол санда ЖКХ полызиинаң тузаланчатханнар, компаниянаң тузында санаспинчатханы. Салтарында оларның ӧдістері ікі миллиард салковайға чит парған. Андағ оңдайнаң «Сибирьнің МРСК-зы» - «Хакасэнерго» ПАО оборудование паза материал сығарчатханнарнаң тузында санас полбинча. Салтарында, ідӧк сӧӧ тартылча кресен-фермер хоныхтарынзар даа, пасхазынзар даа чарытхы тартар тоғыс.
Олох туста Хакасияның тарифтерҷе паза энергетикаҷа хазна комитедінің пресс-службазы искіриинең, Хакасия правительствозы, пу сурығның пӧзік тузазын санға алып, аны сыныхтаға алған. Кресен-фермер хоныхтарынзар чарытхы тартарын чағынғы чылларға Хакасияның ӧӧн пӧгіннер санына кирерінҷе хада-пірге тоғынчалар тарифтерҷе паза энергетикаҷа хазна комитеді, аал хонии паза ас-тамах министерствозы. Сағынчам, оларның хада-пірге тоғыс салтарлары фермерлерні чӧпсіндірер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде