ОЛҒАН СПОРТ ПЛОЩАДКАЗЫ - ПАЛАНЫ ЧУРТАСХА ТИМНИРІНДЕ ПАСТАҒЫ ХААЛАҒ
13.09.2017
Хабарлар
ХАКАСИЯНЫҢ НАЦИОНАЛЬНАЙ ПАЗА ТЕРРИТОРИАЛЬНАЙ ПОЛИТИКА МИНИСТРІНІҢ ОРЫНҶЫЗЫ НИНА ЧЕЛТЫГМАШЕВА ПАЗА МИНИСТЕРСТВОНЫҢ ӦӦН КОНСУЛЬТАНТЫ ОЛЬГА ТИДЕ ТОҒЫС ХООСТЫРА АҒБАН ПИЛТІРІ ААЛЗАР ЧӦРГЕННЕР. АНДА ОЛАР ААЛ ЧӦБІ ПАЗЫ СЕРГЕЙ НОВОСЁЛОВНАҢ ТОҒАСХАННАР.
АҒБАН ПИЛТІРІ ААЛ «ИҢ ЧАХСЫ МУНИЦИПАЛЬНАЙ ПӰДІС» РЕСПУБЛИКА МАРИИНДА АРАЛАСХАН. ПУ МАРЫҒ ТОҒЫС НОМИНАЦИЯҶА ЧАРДЫХТИ ИРТКЕН. ПАСТАҒЫ ЧАРДЫХТА 71 МУНИЦИПАЛЬНАЙ ПӰДІС АРАЛАСХАН. АНДА ПОЛҒАН НА МУНИЦИПАЛЬНАЙ ПӰДІСТІҢ ТОҒЫЗЫН ПАЗА ТИЛІЗІН ПААЛААННАР. ІДИ ПОЛҒАН НА НОМИНАЦИЯДА ӰС МУНИЦИПАЛЬНАЙ ПӰДІС ФИНАЛҒА СЫХХАН.
Финал пылтыр 21 апрельде ирткен. Анда полған на муниципальнай пӱдіс позының проектінең таныстырған. Пу марығда Ағбан пилтірі аймааның прай аал чӧптері араласханнар. Оларның тоғызы чиңіс тутхан паза сыйыхтығ орыннарға сыххан. Оларға проектті толдырарына 4 миллион 280 муң салковай позыдылған. Ағбан пилтірі аал «Хакасияның муниципальнай аймааның иң чахсы административнай кіні» номинацияда ікінҷі орынға сыххан. Аалға сыйыхха 600 муң салковай пирілген. Ағбан пилтірі аал чӧбі «Олған спорт площадказы - паланы чуртасха тимнирінде пастағы хаалағ» проектті чуртасха кирген. Ол ахчаа ӱс олған площадказы паза спорт площадказы пӱдірілген. Ол спорт площадказын «Ирбис» чаа-патриот клуб араласчылары сурынызы хоостыра Пирятинскай дивизия орамада турғыс салғаннар. Анда аймах спорт тиріглері турғызылған. Мында прайзына спортнаң айғазар оңдай пар.
- Ікі неделя мының алнында спорт площадказы хыринҷа ирт париғанымда, ууҷа пархазынаң упражнениелер толдырчатханын кӧргем, - чоохтапча Сергей Новоселов.
Олған площадкаларын чуртағҷылар постарының кӱзінең паза спонсорлар полызиинаң турғысханнар. Хайди таныхтаан аал чӧбінің пазы, проект 700 муң салковайға кӧрілген полған. Че аннаң асхынах ахча пирілгенде, пірее тоғыстарда ахча ӱзӱрлелген.
Наа олған площадкаларын кӧп хадыллығ туралар алнында Пионерскай, Волковтың паза Пирятинскай дивизия орамаларда турғызылғаннар. Полған на комплекс пірее темаа чарыдылча (талайның хайхастығ чуртазы, джунгли паза ортын вектегі ӧрге). Хайди таныхтаан Сергей Александрович, 100 муң салковайға асхынах ахча пирілгенде, чуртағҷылар олған площадкаларын ағыларында паза турғызарында полысханнар. Ідӧк пу тоғысха устағ компаниялары паза пос устаныс пірігістері хозылғаннар. Амды олғаннар наа площадкаларда ойнапчалар. Сергей Новоселовтың чооғынаң, пу чағында площадкалар турчатхан орыннар иптелер.
Прай иділген тоғыстарны кӧріп алғанда, Нина Челтыгмашева паза Сергей Новоселов проект толдырылғаннаңар актта хол салыбысханнар. Пу чағында Хакасияның национальнай паза территориальнай политика министерствозының тоғынҷылары сыныхтағнаң Боград аймаанзар сығарлар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде