ПАЙРАМҒА - ХЫНЫҒ ОЙЫННАР
26.12.2018
Хабарлар
Наа чылға халды 5 кӱн. Ӱлӱкӱн хынығ иртер ӱчӱн, аймах ойыннар паза марығлар иртірерге чарир. Ойыннарда улуғлар даа, кічіглер дее аралас поларлар
ЧАЛАМАЛАР
Пу ойын алты паза аннаң даа кӧп кізее кӧріл парған. Араласчылар ікі командаа чарылчалар. Полған на командадаң комната ортызынзар пірер кізі сыхча. Халған кізілернің харахтарын платнаң алай шарфнаң палғап саларға. Палғалых харахтығ пір араласчаа он чалама пирілче, хайзын комната ортызында турчатхан кізее палғап саларға кирек. Палғалых харахтығ ікінҷі араласчы ол чаламаларны систібізерге кирек. Чахығларны иң пурун толдырыбысхан команда утып алча.
НАА ЧЫЛ АБДЫРАЗЫ
Пу ойын олғаннарға хынығ полар. Палаларға «Сіліг абдырада ниме чатча?» сурыға нандырарға кирек. Ойын иртірчеткен кізі, араласчыларға орта нандырығ таап аларға полызып, абдырада чатчатхан ниме-ноодаңар сиспектер чоохтапча.
Кӧзідімге мындағ сиспектер пирерге чарир. Вата нимес, че ах. Хар нимес, че соох. Сахар нимес, че тадылығ (мороженай). Линейка нимес, че ніске. Іңе нимес, че ирке. Крокодил нимес, че тістіг (тарғах). Сыбы нимес, че чазалых. Ырҷы нимес, че сарнапча. Пала нимес, че «іҷем» тіпче (кӧклӧ). Торт нимес, че тадылығ. Апельсин нимес, че кизегестіг. Кӱрең ӧңніг (шоколад). Чӱг нимес, че уғаа ниик. Харыҷах нимес, че учухча. Пӱрчӱк нимес, че чарылча (ӱбӱрҷең шар).
АРТИСТТЕР ТАЛЛАПЧАБЫС
Фильмге артисттернің талластырии иртче. Араласчыларға иң паарсах Соох апсахты, иң харам Соох апсахты, иң сіліг Хар хызыҷахты, иң уйғуҷыл Хар хызыҷахты, иң чиинҷіл аалҷыны, иң хынығ аалҷыны, 2019 чылның таниин паза даа пасха матырларны кӧзіт пирерге кирек.
КЕМ ПУРУН?
Ікі одырчыхсар ниилерін хазырған пірер хысхы кип алай тон іл саларға. Одырчыхта пӧріктер, шарфтар паза мелейлер сал саларға. Хынығ музыка пастыра ікі араласчы кип, пӧрік, мелейлер кизерінҷе, шарфнаң ораанарынҷа марығласчалар. Тонанып алған кізее, одырчыхсар одырыбызып, «Наа чылнаң!» хысхырарға кирек.
Автор :
"Хабар"
Пн | Вт | Ср | Чт | Пт | Сб | Вс |
25 | 26 | 27 | 28 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде