ПІРГЕ ЧӦПТІГ ТОҒЫНАРҒА
05.03.2019
Хабарлар
Пастыхтар ӱлгӱ паза компания хада-пірге чӧптіг тоғынарына ізенчелер
Тоғазығ. Ирткен неделяда Хакасия пазы Валентин Коновалов «СУЭК-Хакасия» ООО-ның ӧӧн директоры Алексей Килиннең тоғасхан.
Хакасия пазы Валентин Коновалов тоғызын пастааннаң республикадағы килкім предприятиелернің пірдеезінде полбаан. Аннаңар «СУЭК-Хакасия» ООО-ға паза аның устағҷызы Алексей Килинге аннаң алынҷа тоғазарға паза предприятие тоғызынаң таныстырарға пастағҷы поларға ӱлӱс тӱсті. Алексей Килин Хакасия пазы Валентин Коноваловха хара тасты пайытчатхан фабриканы, Харатастағы разрез тоғынҷыларының туразын паза энергоуправлениені кӧртіскен. Тоғазығда ідӧк республика пазының пастағы орынҷызы Андрей Асочаков, орынҷызы Юрий Курлаев паза экономика тилізі министрінің тоғызын толдырчатхан Николай Евдокимов араласханнар.
Хара тасты пайытчатхан фабрикада хоза корпус пӱдірілген соонаң 50 тоғыс орны тӧстелтір. Компания фабрикада пос алынҷа тоғынчатхан оборудование турғысча, иргілерні амғы тусха килістіре оборудованиее алыстырча.
Пӱӱнгі кӱнде хара тастың 8,8 миллион тонназы пайыдылча. Сылтағ: анылчатхан хара тастың чылии тӧбін. Ідӧк компания «Іскеркі Пиидегі» разрезте хара тас пайытчатхан фабрика пӱдіриине инвестициялар итче. Ол 2021 чылда тимге сығарға кирек. Анда 315 тоғыс орны кӧріл парған. Чоохтирға кирек, тоғынҷыларны фабрика тоғызын пастир алнында, чарым чылға азынада алып, ӱгредерлер, кӧніктірерлер.
Харатастағы разрезтің туразы тастында Илбек Ада чаа араласчыларына паза Істеніс матырларына чарыдылған ачых пар. «СУЭК-Хакасия» ООО тоғынҷылар аразында істеніс паза спорт марығларын тӧреміл иртір турадыр. Алексей Килиннің таниинаң, тоғынҷылар істеніс марығларында тӧреміл тилекей рекордтарын толдырчалар. Сағынчам, анзы олаңай ла нимес. Иң чахсы салтарлар кӧзітчеткен харатасчыларға автомобильлер читірілче, пірдең, оларның ортымах паазы ла, 1,5 миллионҷа салковай, тоғынҷыларны пӧзік паалапчатханын киречілепче. Матырларға поғдархас паза олардаңар искіріг тураның пастағы хадылында узарадылча. Андох музей тӧстелген, хайда тиксі разрезтің тархынынаң танызып аларға чарир.
Тоғынҷыларның истіг, хорғыс чох тоғынарына паза хазиина улуғ хайығ салылчатханын мылча, столовай, диспетчер службазы кӧзітче. Диспетчер службазын разрезтің кіні тиирге чарир. Мында операторлар хара тас аныпчатхан карьерні, андағы чолларны, техниканы кӧрчелер паза сыныхтағда тутчалар паза тоғынҷыларнаң тӧреміл радио пастыра палғалыс тутчалар. Столовайда харатасчыларға ікі пасха меню сӧлелче: хурсағы ағырчатханнарға паза чӱрек-тамыр ағырығларынаң ирееленчеткеннерге.
Компания халғанҷы чылларда ікі наа кӧстегнең айғазып пастаан: ол иргі шинадаң плитка паза пос алынҷа тоғынчатхан лампалар сығарызы. Халғанҷы кӧстегнең энергоуправление айғасча. Специалисттер аймах кӱстіг диод лампаларын постары чыыпчалар, сыныхтапчалар. Прай сығарчатхан лампаларына сертификаттар пар. Олар чилнің паза кӱннің пірге кӱзінең пос алынҷа тоғынчатхан чарытхы сағын таап алғаннар. Ағаа сертификат парох. Амды аны оғырлардаң арачылир ӱчӱн видеосыныхтаан турғысчалар.
Пастыхтар «СУЭК-Хакасия» ООО-ның тоғызына чӧпсінгеннер. Предприятие республикада хаҷаннаң тоғынча. Компанияның устағ-пастаа республиканың наа ӱлгӱзінең, пір тіл табызып, тоғыс салымнығ парарына ізенче. Республика пазы Валентин Коновалов компания «Кимдегі Сибирь» проектте маңнаныстығ аралазарына ізенізінең ӱлескен. Пу ӱс регион аразындағы инвестиция проекті регионнарның экономиказын тилідерге ле нимес, че ідӧк чонның чуртас синін ӧскірерге полызарға кирек.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
25 | 26 | 27 | 28 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде