КӀЧӀГ ЧАСТЫҒ АЛЫП-КӰЛӰКТЕР
06.03.2019
Хабарлар
Спорт. 2 мартта Ағбан пилтірі аймааңдағы Томыӌахтар аалында улуғ лейтенант Николай Доможаковтың хумартхызына чарыдылған грек-рим кӱрезінӌе оолағастар аразында сыйыхтығ орыннар ӱчӱн хатығ харбазығлар парғаннар.
Хаӌаннаң кибірге кір парған арға-мӧрійде аралазарға, тимненістерін сынирға чыылысхан кічіг частығ кӱресчілер удур-тӧдір сыныхти кӧріс салчалар. Оолағастарның полғаны ла кибісте пасталар хазыр харбазығларны чидікпин сағыпча. Че пастап оларға улуғ лейтенант Николай Доможаков кем полғаннаңар, «Мужество» орденні ниме ӱчӱн алғанын улуғлардаң истіп аларға кирек. Аннаңар сценадаң харах албинчалар.
Аалдағы Культура туразынзар чыылысханнарның алнында кӧп кізі турча: Ағбаннаң килген пастыхтар, Ағбан пилтірі аймааның устағӌылары, Николай Доможаковтың ӱгретчілері, туған-чағыннары, ОМОН-да хада служба ирткен, хада ӱгренген нанӌы-арғыстары. Оларның хайзы даа чиит чуртазын Чечен чирінде полған чаалазығда пир салған Николайны сағысха кирген, хайдағ махачы хылыхтығ полғаннаңар чоохтаан, кічіг частығ кӱресчі оолағастарны аннаң кӧзідім аларға хығырған. Николай Доможаков кічігдең спортнаң айғазып пастаан, сидіктерні тобырарға тимненген.
- Аарлығ аалҷылар, чир-суғҷыларым, кӱресчі оолағастар, кизек чаалазығда чуртазын пир салған Николай Доможаковтың тӧреен кӱнін таныхтирга килген ӱчӱн алғыстапчам, - айланған чыылысхан чонзар Томыҷахтар аал чӧбінің пазы Марина Ощенкова.
Марина Васильевнаның сӧстерінең, махачы хылыхтығ чир-суғӌыбыс 25 февральда 1971 чылда тӧреен. 24 чыл мының алнында ол хазнабыстың амыр хонии ӱчӱн чуртазын пир салған. Ол тустаң Томыӌахтар аалында улуғ лейтенант Доможаковтың хумартхызына чарыдылған грек-рим кӱрезінӌе азых марығ иртірілче.
- Пӱӱл піди кӧп кӱресчі килерiн сағыбаан полғабыс. Мының алнында ортымахти 80 - 100 оолағас харбасчаң. Амды кибіске сығарға 147 кӱресчі тимде турча, - чоохтапча пу турнирнің тӧстегӌізі, аалда грек-рим кӱрезінің секциязын апарчатхан тренер Анатолий Аев.
Марығда аралазарға чыылысхан 10 - 12 частығ алып-кӱлӱктерзер айланып, Хакасия Ӧӧркі Чӧбінің депутады, грек-рим кӱрезінӌе Россияның спорт узы Г еннадий Канзычаков мындағ харбазығларда алған алтын-кӱмӱс медальлар иң аарлыға саналчатханын таныхтаан, оолағастарны чиңістер тударға алғаан. Аның сӧстерін кӱресчілер хазыр айа сабызынаң удурлааннар.
Анаң марығлар пасталыбысханнар. Хакасияның прай даа аймахтарынаң, хайда грек-рим кӱрезі тиліпче, командалар чыылыстыр. Пірее кічіг частығ алып-кӱлӱктернің іӌе-пабалары хада килтірлер. Аннаңар аалдағы Культура туразының улуғ залында тӧзелген кибіссер оларның палазы сыхса, суум-саам оңнығ полбинча. Уламох паарсах чӱректіг iҷелернің ӱннері прайзының хайиинда. Аннаңар даа марығның ӧӧн чарғыӌызы Сергей Смирнов піреезін тызарға даа харасчаң. Іӌе кізіні амырадып аларзың ма.
Амды, хазыр харбазығлар соонда, постарының кӧдірімнерінде сыйыхтығ орыннарға сыххан кӱресчілернең таныстырчабыс:
25 кг -
1 орын - Иван Топоев, Асхыс;
2 орын - Аркадий Дзингель, Ағбан;
3 орын - Нияз Майнагашев, Пыдырах паза Илья Калинин, Ағбан;
27 кг -
1 орын - Никита Кочелоров, Ағбан;
2 орын - Нияз Халилов, Томыӌахтар;
3 орын - Павел Миндибеков, Ағбан паза Дмитрий Топоев, Ис пилтірі;
29 кг -
1 орын - Нурсултан Касымов, Ағбан;
2 орын - Вячеслав Тохтобин, Катанов;
3 орын - Глеб Вдовин, Ағбан паза Эрланг Каримбердиев, Ағбан;
32 кг -
1 орын - Хабибджонг Расулов, Ағбан;
2 орын - Анатолий Костяков, Ӧӧк пилтірі;
3 орын - Иван Семириков, Ағбан паза Иван Юнгблюд, Пирікчул;
35 кг -
1 орын - Аймир Карамчаков, Асхыс;
2 орын - Гафар Садыгов, Шира;
3 орын - Степан Орешков, Пилтір паза Калыс Самсалиев, Ағбан;
38 кг -
1 орын - Сергей Тайдонов, Шира;
2 орын - Кирилл Семенов, Ағбан пилтірі;
3 орын - Сергей Сагалаков, Пыдырах паза Ислам Жеэнбеков, Ағбан;
41 кг -
1 орын - Сабир Субраков, Шира;
2 орын - Анатолий Тохтобин, Пилтір;
3 орын - Джасур Карчиев, Ағбан паза Владислав Кузугашев, Ағбан;
45 кг -
1 орын - Денис Чернов, Ағбан;
2 орын - Данил Бегаев, Ағбан;
3 орын - Максим Султреков, Ағбан паза Александр Инкижеков, Пии.
ОМОН-да хада служба ирткен, Ағбандағы национальнай школада хада ӱгренген арғыстары, туған-чағыннары хазыр харбазығда чиңіс тутхан кӱресчілерге паза сіліг микелер кӧзіткен алынӌа оолағастарға чахсы сыйыхтар тимнеп килтірлер. Ол даа сылтағнаң полбас па, кибірге кірген арға-мӧрійде чыл даа сай кӧп кӱресчі аралазадыр.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
25 | 26 | 27 | 28 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде