РУСАЛ РЕСПУБЛИКА ТИЛІЗІНЕ ХАБАСЧА
13.03.2019
Хабарлар
Чӧптезіг. Хакасия правительствозының паза республикадағы килкім промышленность предприятиелерінің аразында чуртас-экономика синін кӧдірерінҷе чӧптезіглер иділче. Оларның пірсі РУСАЛ компаниянаң хада.
Хакасия правительствозы таниинаң, халғанҷы чылларда РУСАЛ компания республиканың иң ізестіг паза нандырығлығ партнеры полча. Пістің регионда предприятиелер тоғызын алғыдып, компания Хакасия бюджедіне тӧлепчеткен налогтар синін ӧскірче. РУСАЛ-ның тиксі предприятиелерінең кірчеткен налогтары республика бюджедінің налог парыстарының 15 процентіне тиңнелче. 2018 чылда, тізең, санкциялар даа полза, парысха налог ікі хати ӧскірілген паза 2,6 миллиард салковайға читкен. 2019 чылда компания организацияларынаң тӧлелчеткен налогтар синін ӧскірерін узаратча. Пӱӱл 1,3 миллиард салковай парысха налог республика бюджедіне кірген. Хайди кӧрчебіс, РУСАЛ компанияның предприятиелері, санкциялар даа полза, чахсы тоғынчалар. Че ол компанияның кӧні тузазы тиирбіс.
Хакасия правительствозынаң хада чӧптезіг хоостыра компания республиканың чуртас-экономика синін ӧскіреріне хоза хозым итче. 2016 чылда ол республиканың чуртас-культура паза экономика программаларына 50 миллион салковай позытхан, 2017 чылда - 190 миллион салковай, 2018 чылда - 53 миллион салковай (США-ның хатығластары сылтаанда хабазығ сині хызырылған). Республиканың чуртас-экономика тилізіне хада-пірге тоғынардаңар тоғысты 2019 чылда узарадардаңар чӧптезіглер пӱӱнгі кӱнде ам даа апарылча.
Амды алындағы чылларда РУСАЛ компанияның социальнай инвестицияларына хайдағ тоғыстар толдырылғанын кӧр кӧрелер. Піс алындағы ӱс чылны ла албаспыс, 10 чылға ырах кӧрербіс. Іди 2008 чылда январьда Саяногорскта амғы тусха килістіре имнег кіні азылған, хайзының пӱдіриине компанияның инвестициязы 370 миллион салковайға читкен. Компания предприятиелер орныхчатхан орыннардаңар паза чуртағҷылардаңар сағыссырапчатханын ідӧк хазых пиктеҷең физкультура кіні азылғаны киречілепче. Аның пӱдіриине компания 70 миллион азыра салковай позытхан. Чоохтирға кирек, хайзы даа пӱдіріг предприятие тоғынҷыларына ла нимес, ідӧк Саяногорск город чуртағҷыларына азых.
РУСАЛ олған садтарына хайығ айландырча. Саяногорск устағ-пастаа компания полызиинаң городта олған садтарынзар теесті чабысхан. Іди 2008 чылда городта «У Лукоморья» олған сады пӱдірілген, 2013 чылда «Чипполино» олған сады нааҷылалған. 2018 чылда «Почемучка» олған садында ікі группаның пӧліктері нааҷылалған. Пу пӱдіріглерге компанияның тиксі хорадығлары 30 миллион салковайға читкен.
Ӧсчеткен тӧлге хайығ салары олғаннарға ойнаҷаң орыннар пӱдіриине хозым итчеткенінең узарадылча. 2013 чылда пір улуғ ойнаҷаң орын скверде турғызылған. 2017-2018 чылларда олған площадкалары тура хыриндағы орыннарда турғызылған. Оларға компания 6,5 миллион салковай позытхан.
34 миллион салковай Саяногорскта ветераннар пансионадын азарына позыдылған. Ол 2015 чылда часхызын пайрамни азылған.
2015 чылда тиксі Хакасияның чуртағҷылары чир-чайаан ӧрттері сылтаанда улуғ ӱреге кіргеннер. РУСАЛ улуғ чобалға кірген чуртағҷыларға иң пастағылар санында хабазып пастаан. Полызығ ахчанаң даа (23 миллион салковай чыылған: чарымын тоғынҷылар пирген полза, чарымын - компания), кип-азахнаң даа, ниме-нооларнаң даа (100 таарлағ машиназы). Аннаң пасха, компания Пии аймаандағы Новоенисейка аалдағы школаны тыхтирына паза нааҷылирына 4 миллион азыра салковай пирген, ол ідӧк 2015 чылның 12 апрельінде ӧртке хабылған.
2016 чылда Хакасия правительствозынаң чӧптескені хоостыра РУСАЛ хабазыға 48 миллион салковай пирген. Ол «Сибер Ил» чоннар аразындағы форумның, Тун пайрамның ӧӧн партнёры, «Чыл выпускнигі» республика концертінің спонсоры полған. Ол ахчаа ідӧк Хакасияның кӧп палалығ сӧбірелеріне ікі «ГАЗ» автомобиль алылған, Саяногорск устағ-пастаана - ікі чол техниказы, Хакасияның олимп резерві училищезіне - автобус паза пасха чахсы киректер иділген.
2017 чылда хабазығ сині ӧскірілген: ол 180 миллион салковайға читкен. РУСАЛ республика синіндегі ӧӧн мероприятиелернің партнеры полған. Асхыс аймаана ахча позыдылған: Тӧӧ пазындағы спорт тимненіс кіні пӱдіриине; Палыхтығ суғдағы имнег туразын алыстырарына паза оборудование аларына; Асхыстағы «Афалина» бассейнні пӱдіреріне.
Таштып аймаана - Ӧлең чазыдағы 70 орыннығ школа пӱдіриине паза оборудование аларына, Орджоникидзе аймаана - Ӱӱс аалдағы 150 орыннығ школа пӱдіриине. РУСАЛ Саяногорск городха чахсы хабасхан: Ай-Дайға суғ тартчаң сетьтернің проект пічіктері тимнелген, олған площадкалары турғызылған, спорт школазы нааҷылалған паза пасха чахсы киректер.
2018 чылда РУСАЛ ӧӧнінде Саяногорск городха хабасхан, ол санда городтағы орыннарны истіг идерінде араласхан, 6 № школаның 1 паза 2 корпустарын 55 миллион салковайға тыхтаан, «Почемучка» олған садындағы ікі ясля группазын нааҷылаан.
Аннаң пасха «Территория РУСАЛа» программа тоғынча, хайзының полызиинаң аймах кӧстегліг проекттерге 2014 - 2017 чылларда 22,5 миллион салковай позыдылған.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
25 | 26 | 27 | 28 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде