ХАН ТИГІРДЕҢ ХАЙХАСТЫҒ КӦРІМНІГ ХАКАСИЯ
02.10.2019
Хабарлар
Пістің аалӌыбыс. 30 сентябрьда «Хакасия» газетаның конференц-залында летчик-хантигірҷі, Россияның Матыры Олег Артемьевнең тоғазығ ирткен. Аның чооғынаң, чоннар аразындағы хан тигір станциязының чолы Хакасияның ӱстӱнҷе парча
ЛЕТЧИК-ХАНТИГІРӋІ ОЛЕГ АРТЕМЬЕВ ПІСТІҢ РЕСПУБЛИКАЗАР «РОСКОСМОС» КОРПОРАЦИЯНЫҢ АРАЧЫЛАҒ СЛУЖБАЗЫНЫҢ ТОҒЫНӋЫЗЫ АЛЕКСАНДР ЛАЗАРЕНКОНАҢ ХАДА КИЛГЕН. ТОҒАЗЫҒДА АРАЛАСХАН РОССИЯНЫҢ МАТЫРЫ ОЛЕГ АРТЕМЬЕВ ХАКАСИЯДА ПАСТАҒЫЗЫН ПОЛДЫ. ЧЕ ХАН ТИГІРДЕГІ КОРАБЛЬНАҢ ТИЛЕКЕЙНІ ИБІРЧЕТСЕЛЕР, РЕСПУБЛИКАБЫС ӰСТӰНҶЕ КӰННІҢ САЙ УЧУХЧА ОСХАСТАР.
ХАНТИГІРӋІЛЕРГЕ ӦӦРТІН КӦРГЕН ЧИРЛЕРДЕ ПОЛ КИЛЕРГЕ, ЧАЗАҒ ПАСТЫР ЧӦРЕРГЕ ХАӋАН ДАА ЧАПСЫХ, НЕКЕ. ХАБАРӋЫЛАРНЫҢ ПАСТАҒЫ СУРИИ ХАКАСИЯДАҢАР ХАЙДАҒ САҒЫСТАР ПАЗА МЫНДА ПОЛАРҒА КӦҢНІҢЕРГЕ КІРГЕН МЕ ПОЛҒАН.
- Хакасиязар мин пастағызын на килдім, че хан тигірӌе учухчатсабыс чолыбыс кӱннің сай сірернің республикаңар ӱстӱнӌе парча. Хан тигірдең Хакасия уғаа сіліг кӧрінче. Сойан-Сус ГЭС-тың даа кӧрімі тың хайхатча. Мындағ илбек ГЭС паза чоғыл даа тиирге кирек. Мындағы чонның чала-хай хылиин таныхтирӌыхпын. Хакас ас-тамаан амзирға киліспеен, че Казановкадағы музейде хайдағ-да тадылығ фрикаделькаларнаң сыйлааннар.
Пу чоохты истіп, прайзы хатхырызыбысхан. Анаң ол талған полған тіп чоохтап пиргеннер.
Олег Артемьевтің тӧреен-ӧскен чирі Латвияның ӧӧн городы Рига полча. Ол сӧбіреліг, оолағаснаң хызыӌах ӧскірче. Олег Германович ӧӧнінде техническай специальностьтар алған.
Кӧзідімге, 1990 чылда Н.Э.Бауманның адынаң Москвадағы хазна техническай университедін «Техника и физика низких температур» специальностьча тоосхан. Университет соонаң аның тоғызы хан тигір киреенең палғалыс парған.
2003 чылда ол «Энергия» ракета-хан тигір корпорациязының хантигірҷілер санына алылған. 2005 чылға теере парған тимненіс соонаң, сыныхтағларны чахсы иртібізіп, «хантигірҷі-істезігҷі» квалификация алған. 2007-2008 чылларда «МАРС-500» істезігліг программада араласхан. Хан тигірзер учуғар алнында тимненіс чылларнаң парча. Олег Германович хан тигірзер пастағызын 26 мартта 2014 чылда «Союз ТМА-12М» корабльда борт-инженер полып учуххан, ікінҷізін - 2018 чылда. Аның хан тигірде полған тузы пір чылға тиңнелчеттір.
- Хан тигірзер пастағы учуғыс сағыста хаҷанға даа халча, - чоохтаан Олег Артемьев. - Пастағы сидіксініс - скафандрлығ азых хан тигірде полып алары. Ідӧк анда азах-холлардаңар ундут саларға килісче. Піске корабльның тастында 8 часча поларға чарадылча.
Олег Артемьевнең удаа школаларда, университеттерде тоғазығлар поладыр. Чииттер аймах сурығлар пирчелер. Амғы чорыхта ол Хакас хазна университедінің студенттерінең тоғасхан. Пӱӱл университетте азылған чааҷылар кінінде «Радиолокация станциязының операторы» специальностьха ӱгретчелер. Анда чииттерні кии-хан тигір кӱстерінің ракетно-техническай войсколарына тимнепчелер.
Хантигірҷі поларға сағынчатхан чииттерге Олег Германович мындағ чӧптер пирче: школа тоозыбызарға, спортнаң айғазарға, ГТО-ның алтын значогы кирек полар, техническай ӱгредіг ползын.
Хантигірҷі тоғызы сидік, че олох туста хынығ тіп таныхтаан аалхы. Иң пастағызын тыстаныс кирек тіпче ол. Амғы туста тилекейге хорғыс чоғыл осхас. НЛО теен нимее тоғаспаан паза киртінминче. Олаңай чуртаста летчик-хантигірҷі Олег Артемьев фантастикадаңар, техникадаңар книгалар хығырча. «Чуртаста иң чахсы ниме - ол сын нанҷылар», - таныхтапча хантигірҷі.
Автор :
Елена САГАТАЕВА
Пн | Вт | Ср | Чт | Пт | Сб | Вс |
24 | 25 | 26 | 27 | 28 | 29 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде