ИБДЕҢ СЫХПАС РЕЖИМ УЗАРАДЫЛЧА
07.04.2020
Хабарлар
Кӱн сурии. Россия президенті Владимир Путин 2 апрельде телевидениеҷе чонзар хати айланған, коронавирус ам даа хорғыс ағылчатханнаңар, тоғынмас кӱннер режимі ай тоозылғанҷа узарадылчатханынаңар чарлаан
- Аарлығ арғыстар! Россияның аарлығ чуртағҷылары! Россияда тоғынмас тіп чарлалған неделя тоозылча. Олох туста имҷілер, медсестралар, имнег учреждениелерінің прай тоғынҷылары сидік оңдайда тоғынарларын узаратчалар, - айланған чонзар Россия президенті.
Хазна устағҷызы прай имҷілерге паза чуртасха кирек пасха сфералардағы тоғынҷыларға улуғ алғызын читірген. Алынҷа волонтерларны таныхтаан, пу оой нимес туста пос кӧңнінең полысчатхан ӱчӱн алғыс сӧстерін читірген.
Владимир Путин тоғынмас неделя паза ибдең сыхпас режим чуғынҷах ағырығнаң тӱзімніг кӱрезерге, хазых хайраллаҷаң системаа кӱс алынып аларға тус пиргенін таныхтаан.
- Сағам піс улуғ частығ тӧлні хорғыстығ ағырығдаң арачылирға, олған садтарында, школаларда, вузтарда паза пасха даа ӱгредіг учреждениелерінде эпидемия сығарбасха сыданчабыс, - искірген президент. - Пілдістіг, сурығ турыбысча, ниме мыннаң мындар идерге, хайдағ пістің чарадығларыбыс полар. Таныхтирбын: оларны алчадып, хорғыс ам даа пар полчатханын оңарарға кирек. Хайди санапчалар специалист-вирусологтар, эпидемия иң пӧзік синге читкенін тилекей, паза ол санда пістің хазна, ирткелек. Аны хоостыра мин тоғынмас кӱннер режимін ай тоозылғанынҷа, чарыда чоохтаза, 30 апрельге теере узарадарға чарадығ алғам. Таныхтирбын: тоғынҷыларға оларның чал ахчазы хайраллалар.
Олох туста Россия президента чуғынҷах ағырығ тарапчатханынаң палғалыстығ кирек аймах регионнарда, оларның алынҷа муниципалитеттерінде, андағох аймах-пасха полчатханын таныхтаан.
- Пістің улуғ, уғаа улуғ хазна, чуртағҷылар саны орын хоостыра пасхалалча, - теен Владимир Путин. - Пар субъекттер, хайда коронавирус кізілерге улуғ хорғыс ағылча. Кӧзідімге, Москвадағы чіли, хайда сидік киректі, федеральнай паза город ӱлгӱлері прай кӱстерін салзалар даа, алыстыр полбинчабыс. Че ідӧк пар регионнар, хомзынысха, олар даа асхынах полып одырчалар, хайда пір дее ағырығ кізі чоғыл. Аннаңар хайда-да хатығ оңдайларға тудынарға киректелче, хайда-да пӧзік тимненіс синінде полып, кизекти, алынҷа чарадығлар алары читкіҷе.
Регионнарда кирек пасхалалчатханын санға алып, Россия президенті субъекттернің пастарына хоза полномочиелер пирген - постарына чарадығ аларға. Чарыда чоохтаза, регионнар постары кӧрерлер: хайдағ режим оларға кирерге, хайдағ учреждениелернің паза организацияларның тоғызын тохтадарға алай тохтатпасха. Че ӱлгӱ органнары тохтабас производстволығ предприятиелер, имнег учреждениелері паза аптекалар, пастағы кирексініс ниме-ноолары паза ас-тамах садығ туралары, чуртасха кирек прай службалар тоғынарын тохтатпасха киректер тіп таныхтаан хазна устағҷызы. Оларның тоғызын федеральнай правительствоның чарадии хоостыра ла тохтадарға чарир. Президент федеральнай округтардағы полномочиеліг кізілеріне регионнарның тоғызын сыныхтағда тударға чахығ пирген. Прай искіріглер Россия правительствозындағы коронавируснаң кӱресчең координационнай чӧпте чыыл турарға кирек полчатханын таныхтаан.
- Кирек хайди парчатханын санға алып, хоза чарадығлар ал турарбыс, - салтарлар иткен Россия президенті. - Оңдай пар полза, тоғынмас кӱннер тузын хызырыбызарбыс таа. Паза ниме чоохтирға, паза алынҷа таныхтирға сағынчам, эпидемиядаң тоғыр кӱрезіг апарып, тоғыс орыннарын паза чуртағҷыларның парыстарын хайраллап алары андағох уғаа кирек ниме полчатханын піске ундубасха кирек. Ол - хазна правительствозына, регионнарға, бизнеске пірге пӧгін.
Автор :
Kremlin.ru сайттаң алып тимнеен Альберт ТОЛМАШОВ
Пн | Вт | Ср | Чт | Пт | Сб | Вс |
24 | 25 | 26 | 27 | 28 | 29 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде