ХАТХЫ-КӰЛКІ, ПАСТАҒЫ ХЫНЫС
13.08.2021
Хабарлар
Чайғы тынағ кӱннері. Чайғызын тынағ чахсы парадыр. Тасхар айас, ізіг куннер турча, ибіркі чир-чайаан сілиинең хайхатча. Городта чуртапчатхан іҷе-пабалар палаларын аалдағы туғаннарынзар алай ба олған лагерьінзер ызыбысчалар
Таштып аалдаң 7-8 километр тастыхти, Абаза саринзар парчатса, «Кӱмӱс клӱс» олған лагерьі орныхча. Трассадаң оң саринзар айланыбызып, арығ аразындағы чолҷа парза, нинҷе-де тус пазынаң пӧзік ағастар аразында пір хадыллығ корпустар кӧрінчелер.
Пір отрядха - алынҷа корпус, сала тастыхти туралар турча - азыранҷаң пӧлік, чуунынҷаң орын, имнег пункты паза пасха иптігес ибіҷектер. Олар 1985 чылда пӱдірілгеннер.
Пылтыр тымо ӱчӱн «Кӱмӱс клӱс» тоғынмаан, пу чылда, тізең, азыл парған, че пасха кізілерні кирерге чаратпинчалар, ағырығны таратпас ӱчӱн. Мының алнында пірее іҷе-пабалар палаларын тынағ кӱннеріне иблерінзер апарыбысчаңнар. Интернет паза телефон палғалызы анда тутпинча, трассазар сығып алза ла, тут сыхча.
Пӱӱл пір сезонға 150 пала тынанарға маңнанча. Лагерьнің устағҷызы Елена Марьясова чоохтапча:
- Палаларны 8:30 часта усхурчабыс. Олғаннар, тӧзектерін ипти идібізіп, зарядкаа парчалар, анаң азыранарға. Азырапчалар уғаа чахсы, кӱнде пис хатап. Кӱнӧрте аймах-пасха кружок-секциялар апарылча. Пастағы сезонда кӱресчілернің спорт отряды тынанча, оларның кӱннің сай тренировкалар иртче. Кӱресті Юрий Боргояков паза Андрей Ахпашев апарғаннар. Хынығ марығлар, мероприятиелер, дискотекалар сыбыра иртірілче.
Мин 2006 чылдаң лагерьде устағҷы полчам. Ниме сизінгем? Амғы палалар пасхаҷыл пол партырлар. Оларны пірее нименең айғазарға чӧптирге сидік. Нименең анзы палғалыстығ? Смартфонда кічіг тустаң одырып, іди ардап пардылар ба? Алай олған тузындох хыйғаах парчалар, неке. Прай ниме пілчелер, пір дее ниме оларға хынығ нимес, чуртас кӧріп алғаннар.
20 августта лагерьде ӱзінҷі сезон чабылар. Олғаннар иблерінең тынанып алғанына ізеніс пар, уламох оларның іҷе-пабалары ӱчӱн ӧріністіг - палалары чох ідӧк тынанып алған полбастар ба.
«Кӱмӱс клӱсте» хайди тынанғаннаңар піди сағысха киргеннер.
Азар Миягашев, 13 частығ:
- Мин кӱреснең айғасчам, аннаңар пӱӱл спорт отрядына кір парғам. Иртен паза иирде тренировкаа чӧрчеңміс. Лагерь ибіре 16 - 20 круг чӱгӱрерге килісчең. Отрядта Харатас, Ағбан городтардаң, Пыдырах, Таштып, Катанов, Асхыс ааллардаң олғаннар тынанған. Дискотекаа чӧрерге кӧңніме кірҷең, андар ӧӧнінде пістің отрядтың на саарбахтары чӧрҷеңнер, пасхалары ынабинчатханнар алай арғаастанҷаңнар, неке. Читіре тынанарға маңнанмаабыс, кемнең-де коронавирус табыл парған тееннер. Піс 12 кӱн не тынанарға маңнанғабыс, ибзер нанарға киліскен.
Ольга Кайдаракова, 35 частығ:
- Мин ӱгретчі полчам. Пірсінде чайғызын ахча кӧмес читпин парыбысхан. Лагерьде ікі неделя вожатай полып тоғынарға киліскен. Хараа-кӱнӧрте палалар ӱчӱн нандырарға сидігӧк полтыр, оларға ӱтертінҷең ниме табарға кирек. Тудыс-хабыс таа пол парча.
Елена Торокова, 30 частығ:
- Саарбах тузында, 8 класс тоосханда, «Кӱмӱс клӱс» лагерьде тынанғам, Пыдырах аалдаң нинҷе-де олған парған. Хада ойнаңаңмыс, пасха палалардаң кӧмес тастыхти тудынҷаңмыс. Уйатчаң полбаспыс па. Халғанҷы хараада улуғ от ибіре одырғабыс, хатхы-кӱлкі, пастағы хыныс - прай пу ниме сағыста халған.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде