СЫЙЫХХА - АВТОМОБИЛЬЛЕР
10.09.2021
Хабарлар
Хазна хабазии. Пу кӱннерде Ағбанда Хакасия правительствозы туразы алнындағы Пастағы май ачығында кӧп палалығ тоғыс сӧбірее «Соболь» кічіг автобустарның клӱстерін читіргеннер
КІЧІГ АВТОБУСТАРНЫҢ КЛӰСТЕРІН СӦБӀРЕЛЕРГЕ ХАКАСИЯНЫҢ ПАЗЫ ВАЛЕНТИН КОНОВАЛОВ ЧИТІРГЕН. ХАКАСИЯДА РЕГИОН ЗАКОНЫ ЧУРТАСХА КИРІЛ ПАРҒАН, ХАЙЗЫНДА ЧИТІ ПАЗА АННАҢ ДАА КӦП ЧАЗЫ ЧИТКЕЛЕК ПАЛАЛЫҒ СӦБІРЕЛЕРГЕ КІЗІЛЕР ТАРТ ЧӦРҶЕҢ МИКРОАВТОБУСТАР ПИРЕРДЕҢЕР ЧАРАДЫҒ ПАР. ІДӦК ПЕЕР КІРЧЕЛЕР ӦКІС ПАЛАЛАРНЫ ӦСКІРЕРГЕ АЛҒАН СӦБІРЕЛЕР.
- Кӧп палалығ сӧбірелерге мындағ машиналар уғаа кирек, - таныхтаан Хакасия пазы Валентин Коновалов. - Кӧп орыннығ автотранспорттығ аар-пеер пар килерге, тынаға чӧр турарға уғаа тузалығ полар. Прай сӧбірелерге ынағ, часкалығ паза хазых поларға алғапчам.
Хакасияда кӧп палалығ сӧбірелер саны чыл сай ӧсче. Іди 2009 чылда 4534 сӧбіре полған полза, 2021 чылда, тізең, 9652 кӧп палалығ сӧбіре санға алылған. Оларға чыл сай социальнай полызығ алғыдылча.
Іди 2009 чылда ол кирекке 22,9 миллион салковай позыдылған полза, 2020 чылда, тізең, 201,2 миллион салковай пол парған! Халғанҷы 10 чыл аразына кічіг автобустарның клӱстері кӧп палалығ 64 сӧбірее читірілген.
Пастағы май площадьында ӧңніг чаламалығ паза шарларнаң чазалған тоғыс «ГАЗель» автомобиль турған. Оларның алнында микроавтобустар алңаң паба-іҷелер палаларынаң хада турғлааннар. Пастағы автомобиль хыринда Андрей Тюкпиеков сӧбірезінең хада тур салтыр. Андрейнің читі пала полған паза ипчізі Надежда Дорохованың пис пала. Анаң хоных хон салған соонда оларның ӱс пала тӧреен. Ээзінің чарадиинаң піс автомобиль істін кӧріп алғабыс. Салонда пис орын паза алнында ікі орын.
- Пеер ам прайзыңар сыңмассар, пазох пір «ГАЗель» сурыңар, - ойнап чоохтаныбысхам.
- Хайтпас, теестезіп, чӧрербіс, - хатхырған Андрей.
Олар Таштып аймаандағы Арбыт аалда чуртапчалар. Ибіре тайға. «Ам чистектеп чӧрерге маңат полар», - ӧрініснең теен сӧбіре пазы. Оларның ниикке чӧрҷең автомобиль пар, че аннаң тайғалап чӧрерге аар нооза.
Аннаң андар Таштып аймаанаңох Чоғархы Таштып аалдаң Шулбаевтер сӧбірезі турған. Пабалары Александр Сергеевич читі палазын азырирға вахта оңдайынаң тоғынча. Палаларның іҷезі Анна Владимировна ибде иркеҷектерін кӧрче.
Асхыс аймаандағы Кызлас аалдаң Алефтина Какаева кічіг палаларынаң хада килтір. Апсаа Вениамин Боргояков, маң чохтанып, кил полбиндыр.
- Ам пу автобусты хайди апарып аларзар? - сурабысхам мин.
- Піс шофер хада ағылғабыс, - кӱлімзіреен іҷе кізі.
- Автомобильнең чӧрер праволарың пар ба?
- Чоғыл, - тіпче Алефтина Михайловна.
- Апсааңарның пар полар?
- Аның чоғылох!
- Анаң автомобильнең хайди чӧрерзер?
- А піс ӱгренербіс.
Алефтина Какаеваның сӧбірезінде 7 пала. Улии Еленаа 21 час, ол Ағбанда Хакас хазна университедінде ӱгренче. Иң кічии Альфред пӱӱл пастағы классха парған. Автомобиль алҷаң теесте читі чыл тур салтырлар. Итсе-де, ам микроавтобус аларға килген сӧбірелернің прайзы даа теесте 6-7 чыл турғлаптыр.
Полтах аалдаң килген 34 частығ Павел Карамчаковтың сӧбірезінде 8 пала ӧсче! Улуғ оолғы Владислав Истегі ортымах школада 10 класста ӱгренче. Сӧбіреде пис оол паза ӱс хыс. Иң кічии, 6 частығ Айвар, школаа парғалах. Павел Николаевич Калининдегі ортымах школада машинист-кочегар полып тоғынча. Ипчізі Рада Владимировна пу улуғ сӧбірені холда тут парча.
Анаң прай автомобильлер сӧбірелерге читірілген соонаң, ээлері иблерінзер соон сӱрістіре ачыхтаң сығара ойлат парыбысханнар.
Іди микроавтобустарны Таштып, Асхыс, Ағбан пилтірі, Пии, Алтай аймахтарының паза Ағбанның кӧп палалығ сӧбірелері алғаннар. Пір мындағ кічіг автобус 1 миллион 100 муң салковайға турча. Ана андағ аарлығ сыйых оларға пирілген.
Автор :
Илья ТОПОЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде