ЧАЙААЧЫ АРТИСТКЕ - ХАЗНА СТИПЕНДИЯЗЫ
15.09.2021
Хабарлар
Культура. А.М.Топановтың адынаң национальнай драма театрының артизі, театровед, тілбесчі, чиит драматург Сергей Чебодаев хазна стипендиязына турысты
Россия регионнарындағы культура паза искусство сфераларында тоғынчатхан чиит улусха кӧрілген хазна стипендиязының ӧӧн пӧгіні 35 часха читкелек специалисттерге чайаачыларын тилідерге хабазары полча. Ол пір чыл тӧлелче.
Сергей Чебодаев 2012 чылда Санкт-Петербургтағы театр искусствозы академиязын тоосхан. Аның анда алған ӧӧн специальнозы - театровед. 2014 чылдаң сығара, тізең, ол Россия Федерациязының театр деятельлері пірігізінің араласчызы полча. Ана пуох пірігістің устағ-пастаа пістің хада тоғынчатхан арғызыбысты хазна стипендиязын алар чииттер санына кирер айланыс иткен. Салтарында, Россияның культура министерствозының коллегиязы Хакасияның чиит специализін хазна стипендиязын аларға турыстығлар санына кир салған!
Сергей Чебодаев А.М.Топановтың адынаң национальнай драма театрында 2005 чылдаң сығара тоғын парир. Ол істеніс чолын полызығлығ ӧмеде пастаан. Пу син тус аразына аның чидіглері асхынах нимес. Чиит артист 2006 чылда Г.Саражаковтың «Иир солбаны чариинда» ойынында Стас оолның рольын толдырған ӱчӱн республика синіндегі «Хайхастығ кӧзеңелер» театрлар фестивальында «Чиит актерның иң чахсы рольы» номинацияның лауреады полыбысхан. Анаң ол позын драматургияда сынап кӧрген. Сергей 2016 чылда Россияның театрлар деятельлері пірігізінің стипендиязын аларына кӧрілген «Пьеса пазары, либретто» проектте араласхан, чарғыҷылар хайиина «Чылтыстар чох тигір» ойынын сығарған. Театрның артизі ідӧк 2019 чылда Крымда ирткен «Таврида 5.0» форумда араласхан.
Паза Сергей Чебодаев театрда турғызылчатхан ойыннарны хакас тіліне тілбестепче. Кӧзідімге Б.Колаевтің «Тарынҷах харға», Ю.Клавдиевтің «Анна», Э.Хемингуэйнің «Апсах паза талай» ойыннарын алып аларға чарир.
Артист ідӧк киноларда суурынған: «Короткое замыкание» (режиссер А.Герман-младший, Санкт-Петербург), «Я - хакас» («Хакасфильм» киностудия) паза даа пасхазы.
Пӱӱнгі кӱнде, тізең, ол позын режиссер киреенде сынапча. Аның хакас тілінең турғызылчатхан ойыны чон хайиина 26 октябрьда сығарылар.
Автор :
Светлана СЕЛИГЕЕВА, А.М.Топановтың адынаң национальнай драма театрының литература пӧлиинiң устағҷызы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде