Чарытхы паазы алыспас!
21.10.2021
Хабарлар
“Россети Сибирь” ПАО устағҷызы пу наада Хакасияның чарытхы сетьтерi иңзерiлчеткенiнеңер паза чарытхыны тӱзiмнiг читiрерiне хорғыс парынаңар искiрген. Ол ідöк республикада сетьтернi чахсыландырар ӱчӱн чарытхы паазын ӧскiрерге киректелчеткенiне хайығ айландырған. Че Хакасияның чарытхы паза пааларны хайығда тударынҷа хазна комитедiнiң кнезi Манук Данданян пу танығларнаң чараспинча. Аннаңар пу сурығларҷа сын киректi чарыт пирер пӧгiннең пӱӱн, чарыс айының 21-ҷi кӱнiнде, брифинг иртiрдi.
– Мин республика чуртағҷыларын амырадарға сағынчам: чарытхы читiрерiне хорғыс чоғыл, пааларны ӧскiрерiне, тiзең – сылтағ, - теен хазна комитедінің кнезi Манук Данданян. – Энергетиктернiң искiрии сын киректерге килiспинче!
Андағда ниме сын? Манук Амбарцумович искiрiгдегi полған на сурығны сыныхтабысхан паза хабарҷыларға нандырығ тимнеп пирген. Пастағы танығ инвестиция программазына теелген. Аны Хакасияда нимес, Россияның энергетика министерствозында чаратчалар. Олох федеральнай министерствоға чарытхы читiрчеткеннер региондағы сетьтернiң iзестiг тоғызын паалапчалар. Сан пирiсте, тiзең, прай ниме чахсы: сетьтер iзестiг паза чахсы тоғынча. Чоохтирға кирек, аның ӱчӱн чарытхы читiрчеткен компанияларға хоза ахча тӧлелче. Алындағы чыл “Россети Сибирь” ПАО-ның Хакасиядағы пöлии 21 миллион салковай алған ползалар, пӱӱл – 29 миллион.
– Андағда компания министерствоға сын нимес искiрiг пирче бе? Алай сынында чарытхы читiрҷең сетьтер чыл сай нааҷылалбинча ба? Пiр ле орта нандырығ – аны пiс iлезiне сығарарбыс. Хазна комитедi пу сурыға, Россияның энергетика министерствозынзар айланып, нандырығ тiлир.
Олар iдӧк чарытхыны льготалығ категорияларға кӧп тартчатханы ӱчӱн улуғ хорадығларға кiрчеткеннерiне хайығ айландырчалар. Хазна комитедi искiриинең, ол хорадығлар чарытхы паазына кирiлген, че компания кӧрiлген синнi дее толдырбинча. Кӧзiдiмге, 2020 чылда анзына 528 миллион салковай кӧрiлген полза, сынында 185 миллионы ла хорадылған. Хайда пасха ахчазы? Кӧрiлген кӧстеге хорадылбаан ахчаны республика компаниядаң айландырарға киректир. Пис чыл аразына, тiзең, 2017 чылдаң пасти, пу кöстеге тиксi 2 миллиард азыра салковай кӧрiлген, че оларның 1 миллиард 133 миллионы ла хорадылған. Пазох сурығ сығысча: хайда пасха ахчазы?
– Паалар Хакасияда экономика саринаң орта саналғаннар, анзын кӧрiлбеен сыныхтағ кӧзiткен, - тiпче Манук Данданян. - Пiстiң комитеттiң пӧгiнi – пааларға артых хорадығларны кирбеске. Кӧзiдiмге, кирексiнiс чох кредиттi паза аны айландырарынаң палғалыстығ хорадығларны. Пу компанияның парызы пар, Сибирьдегi пӧлиинiң дее парызы кöріндіре, аннаңар пiске пiлдiзi чоғыл – ноға “Россети Сибирь” ПАО кредит алча?
Чоохтирға кирек, компания устағ-пастааның кӧрiзiнең, Хакасияның чарытхы сетьтерiн нааҷылирына чыл сай 1,5 миллиард салковай инвестициянаң тартарға кирек. Чыл сай паза пiр ле чыл нимес! Олох туста чарытхы читiрчеткен пасха компаниялар чарадылған пааҷа кӧр салған тоғыстарын толдырарға сыданчалар, чарытхы опоралары даа оларның ағас нимес, бетоннаң. Россетинiң 60 процентi ағас осхас. Хайди iди?
Искiрiглер пiлдiрте пасхалалчалар, аннаңар чапчаң пiр чӧпке килерге сидiк полар. Андағ даа полза, хазна комитедi оларны ӱзӱрерге паза пӧкчең оңдайлар тiлирге тимде. 2022 чылға паза пазағы чылларға паалар пӱӱл улуғ хырлас айында турғызыларлар. “Россети Сибирь” ПАО комитетке чöптезігні пазағы пис чылға узарадарға пiчiктерiн пир салған.
Ідöк Манук Данданян компания нандырчатхан сетьтерні иптіг тоғындырарға паза оларны нааӌылирға сыданминчатса, республика пос нандыриина аларға тимдезін искірген. Аның таниинаң, андада чарытхы паазын тӱзіріп тее аларға чарир полар паза сетьтерні нааӌылирына даа чахсы хайығ айландырылар.
Автор :
Наталья Субракова
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде