Ööнi – чуғынӌахтың тарапчатханын тохтадып алары
23.10.2021
Хабарлар
Хакасияда коронавируснаң ағырчатханнар кöптең кöп полчатханда, имнег тураларында оларны имнирiне орыннар чидiспинiбiзерiнең сидiксiнiс пар. Коронавируснаң ағырчатханнарны имнирiне пу кӱнге кöрiлген 1665 орғанның 168-зi ле (10%) пос турча. Ирткен суткада имнег тураларынзар 202 кiзi чатырылған, мындағ танығларӌа пу сағам иң не улуғ сан полча. Аннаңар искiрген киӌее оперштабтың чыылиинда республиканың хазых хайраллаӌаң министрi Олег Ананьевский.
Ағырыбысханнарның 97%-i коронавирустаң тоғыр прививка турғыстырбааннар, ам олар, тың ағырып, ИВЛ аппараттар полызиинаң имненчелер, 600 азыра кiзi – кислород полызиинаң. Чуғынӌах пiрдеезiне айабинча, аннаң улуғ частығлар паза палалар даа ағырча. Чонның пӱкӱле иммунитедi кӱс алынып алар ӱчӱн чуртағӌыларның 80%-iне пу прививканы турғыстырарға кирек, ам даа – 322 муң кiзее. Хакасияда вакцина читкiӌе, аның прай тöрт кöрiмi пар.
- Позыңарны паза чағыннарыңны хайраллаңар. Чуғынӌахтаң арачыланар ӱчӱн вакцинация иртерге кирек. Прививканы 6 ай мының алнында турғыстырған улусха ревакцинация иртерге, - чуртағӌыларзар айланған Олег Ананьевский.
Вакцина турғыстырбааннарның пiреезi iкiнӌi алай ӱзiнӌi дее хати ағырча. Коронавирустаң тоғыр прививка турғыстырғаннарның 3%-i ле чуғынӌахха хаптырча, че аннаң оой чазылып алча. Оларның аразында ӱреен кiзi чоғыл. Санитарнай имӌiлернiң чооғынаң, кем-де вакцинаның 1-ғы чардығын турғыстырған соонаң, чон аразында маска киспин, кiзiлердең оортах тудынмин паза дезинфекция итпин чöртiрлер. Ағбандағы табырах имнег полызии службазы танығларынаң, оларзар айланған тың ағырчатхан чуртағӌыларның санында вакцинацияны ирткен дее пациенттер тоғасчалар, хайзыларына прививка 6 айдаң кöп тус мының алнында турғызылтыр.
Чыылығны апарып, Хакасия пазының орынӌызы Ирина Войнова теен, регионда локдаун кирерi – ол хыйалның чардығы ла. Мында сурығ кiзiлернiң чуртазынаңар парча. Ам наа чуғынӌахтаң кӱнде онар кiзi ӱреп сыхты. Халғанӌы неделяда аннаң ағырыбысханнарның саны 11%-ке кöп öс парған, олғаннарның саны – 44%-ке кöп. Пу улуғ хыйал полча. «Прививка хайди даа турғыстырарға кирек полчатханнаңар чуртағӌыларға паза хайдағ оңдайнаң чарыда чоохтирға?» - сурығ турғысхан. Прай имнег тураларында коронавируснаң ағырчатханнарны ла имнеп сыхса, чон андада пасха ағырығлардаң имнен полбин чуртастаң парып одырар теен. Ол бизнестегiлерзер айланған, вакцинацияда чонны öткiн араластырарға, маска кис чöрер режимге тудынарға.
Сидiк туста регионда имӌiлер чидiспинчелер. Кöзiдiмге, Ағбанда ковид-кiнде 5 имӌi киректелче, андағ сидiксiнiс Харатаста пар. Аннаңар ХГУ-да имӌее ӱгренчеткен оол-хыстарны, ординаторларны имнег киреензер тартарға пöгiнчелер. Iдöк пандемия тузында имнег киреендегiлерге волонтёрлар полызарлар.
Автор :
Инора Боргоякова
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде