Социальнай сурығлар хайди пöгiлер?
28.10.2021
Хабарлар
Хакасияның iстенiс паза социальнай арачыланыс министрi Владимир Чебодаев республикада коронавирустаң тоғыр кӱресчең хатығластар кирiлген неделяда, 28 октябрьдаң сығара 7 ноябрьға теере, социальнай сурығлар хайди пöгiлерiн кöнi эфир пастыра чоохтаан.
Владимир Петровичтiң искiриинең, министерство iдöк ле 9:00 – 18:00 частарда тоғынар. Хазна служащайларның 50%-i ибдең сығара тоғынар. Чуртағӌыларнаң тоғазығлар иртiрiлбес, че чöптер соонӌа телефон пастыра айланарға чарир. Орында одырчатхан специалисттер сығдыратхан кiзiлернiң сурығларына нандырарлар.
Министерство пирчеткен хазна полызығлары пiр неделяа тохтадылар. Андар мындағ полызығлар кiрче:
– региондағы чöптезiглернiң регистрациязы;
– iстенiс оңдайларының хазна экспертизазы;
– хазна чурт сертификаттарын пирерi;
– радиацияа хаптырған паза пасха категорияа кiрчеткен чуртағӌыларға удостоверение пирерi;
– Ыраххы Севердең килген чуртағӌыларны, хайзылары чуртха чидiнерге социальнай тöлег алар праволығлар, санға алары.
Министерствоның хайиинда тоғынчатхан ведомстволар хатығластар кирiлген неделяда хайди тоғынарын Владимир Петрович iдöк чарыт пирген. Аймах-городтардағы чонға тоғыс тапчаң кiннернiң специалисттерi ыраххыдаң тоғынарлар. Чуртағӌыларға айланыстарны «Работа в России» порталӌа ызарға чарир. Тоғыс чох кiзiлер телефон пастыра санға турарлар.
Чонға социальнай полызығ пирӌең управлениелернiң специалисттерi iдöк ыраххыдаң тоғынарлар. Таныхтирға кирек, тöлеглер тохтадылбастар. Пала азырапчатхан iӌелернi 0-3 частығ палаларға пирiлчеткен пособие хайди тöлелерi сағыссыратча. Хакасия, пасха регионнар чiли, федеральнай бюджеттең ахча кiрерiн сахтапча. Пiстiң регион Россияның iстенiс паза социальнай арачыланыс министерствозынаң палғалыс тутча. Ноябрьның пастағы кӱннерiнде Хакасиязар ахча килерi кöрiлче. Республиканың iстенiс паза социальнай арачыланыс министерствозы ол ахчаны палалығ сöбiрелернiң счеттарынзар тудығ чох ызыбызар.
Кöнi эфирде министр Владимир Чебодаев республикадағы стационарлар хайди тоғынарын чоохтаанох. Ағбандағы ветераннар пансионады паза Тойымдағы психоневрология диспансерi чабых режимде тоғынар.
Чооғын тоосчадып, Хакасияның iстенiс паза социальнай арачыланыс министрi В.П.Чебодаев, коронавирус тарапчатхан туста посты паза туған-чағыннарны хайраллирға тiп, прай чуртағӌыларзар айланған.
Автор :
Татьяна Тютюбеева
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде