ОЛ САХТАПЧА ПАЗА ІЗЕНЧЕ
29.10.2021
Хабарлар
Наа спектакль. Ол «Мин азых харахтығ ӧл парам» адалча. Аны режиссер чолына наа ла кірчеткен чиит чайаачы Сергей Чебодаев турғысхан
... Хаӌан-да аның тӧреен-ӧскен аалында чуртас матап «хайнаан». Анда кӧп чон чуртаан, садығ туразы паза школа полған, мал фермазы даа пӱдірілген. Че нинӌе-де чыл пазынаң анда пір ле чурт халған. 60 частығ Муклайның туразы. Тиксі аалда ол чалғыс ла чуртағӌы халған! Аннаң хада чоох алысчаң хонӌыхтары пір дее чоғыл! Аннаңар улуғ частығ ирен, іӌе-пабазының, аға-ууӌазының, хада ӧскен арғыстарының омаларынӌа кӧклӧлер чайап, оларнаң хада ирткен тусты сағысха кирче. Частаныбысхан ирен арғыстарынаң хада Анфиза хыссар теестезіп чӧргенін уламох хынып чоохтапча. Іди ол чиит оолларның чазыттарын сым на одырчатхан «іӌе-пабазына» искірче. Анаң хонӌыхти чуртаан топлама Петкедеңер, хазах ипчізінің фамилиязын алып алған Григорийдеңер андағох хынығ чоох апарыбысча. Тарын парып, оларны чӱстерінең тазылат пар килче.
Че аның ӧӧн сағынған сағызы чонны аалзар нандыра айландырып алары полча.
- Мында хаҷан-да улуғ кӧл турған. Анда ап-арығ суғ полған. Палыхтар, сыыспин, чар хазынзар постары сығара атыхчаңнар. Амды ол кӧл чоғыл. Арса, суғ чох пол парғаннаңар, чон мыннаң кӧзібіскен. Алай мында чарытхы паза чол чохтаңар, кізілер мыннаң кӧзібіскеннер? Арса, чол ит пирзелер, чарытхы тарт пирзелер, олар нандыра айланарлар? - сағынча ол.
Пу ойында пір ле кізі араласча - Хакасияның чон артизі Кирилл Султреков. Аны :аблығ драматург Мансур Гиязовтың ойыны хоостыра режиссер чолына наа ла кірчетен чайаачы ус Сергей Чебоаев турғысхан. Хакас тіліне олох тілбестеен. Хоосчы Мария Торокова полча.
Ноға ойын «Мин азых харахтығ ӧл парам» тіп адалча? Ойынны кӧргелек кізілернің пу иң пастағы сурии полар, неке. Ағаа нандырығны Муклайның пабазы пуғаа чоо сӱсклеттірібіскеннеңер чооғынаң піліп аларға чарир.
Ікінӌі сурығ: пір час артиинаң узарадылчатхан ойында пір артист чалғызан хайди ойнап алча?
Нандырығ: Турыстыра!
Кирилл Султреков кӧрігӌілерні пастағы минуталардаңох аптап алча. Ойын ол син тус иртчеткені пір дее пілдіртпинче. Аның тілін истерге, рольын толдырчатханын кӧрерге чахсы, хай пірее орыннарда хырызынӌаң сӧстернең тузаланза даа. Аалның сын чуртағӌызының омазын ол уғаа килістіре чайапча. Аалдаң городсар парған Хапчығай апсахтың, унитазха одыр полбин, тасхар ағас аразында позыдыныбызып, ыстанын суурыбысханын даа ол кӧзіт пирче. Че чоохтары аразында ирен тигірзер ле кӧрібісче.
- Хаҷан-да минің ӱстӱмӌе самолеттар пір дее учухпааннар. Ам учухчалар. Он самолет чоғар, он самолет индіре. Хараазын учуғарға хорғыстығ. Аннаңар мин оларға свечі чарыт пирчем, - тіпче ол.
Іди ол кӱннің самолеттарны санапча паза чон аалзар нандыра айланарына ізенче.
А.М.Топановтың адынаң национальнай драма театрының 90 чылына чарыдылып турғызылған наа спектакльның теестегі кӧзідии хаӌан полар? Пу сурыға, тізең, сағам пірдеезінің орта нандырығ чох полар. Прай ниме пандемия хатығластары суурылар туснаң палғалыстығ.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде