ХУБАЧАРДА ТЫХТАҒ СӦӦ ТАРТЫЛЧА
03.11.2021
Хабарлар
Селекторҷа чыылығ. Хакасия пазы Валентин Коновалов город-аймахтар пастарынаң чылығ пирҷең тус парчатханына паза «Городта истіг оңдайлар тӧстирі» программа хайди толдырылчатханына чарыдылған чыылығ иртірген
Хакасияның пӱдіріг паза чурт-коммунальнай хоных министрі Валерий Келиннің чооғынаң, регионның хысхы тусха тимненізі 99 % тиңнелче. Министерствоның «ізіг линия» телефонына чуртағҷылардаң пис айланыс кірген, ол санда ӱс айланыс чылығ хомай пирілчеткеніне (Харатастаң - 2 паза Пиидең - 1) паза ікі айланыс кӧп квартиралығ туралардағы тиксі ис-пайны чахсы кӧрбинчеткеніне, тыхтабинчатханына чарыдылған.
Чурт сыныхтаа департаментінде чылығ читіре пирілбинчеткеннеңер чуртағҷыларның 25 айланызы чатча. Айланыстарҷа сыныхтағ тоғызы иртірілче. Хакасияның пӱдіріг паза ЖКХ министерствозы устапчатхан организациялар паза Сибирьдегі генерирующай компания кізілерінең хада кӧп квартиралығ пис тураны сыныхтабысхан. Амды ол тураларда чылығ читкіҷе пирілче.
Министерство ідӧк кӧп квартиралығ 92 турада чылығ ӱчӱн тӧлегні хатап санапча. Кӧп квартиралығ 57 тураа чылығ ӱчӱн тӧлег саба санал парған сылтаанда ол хатап саналар.
Чылығ пирҷең тус пасталғаннаң республиканың коммунальнай объекттерінде 21 штаттағы нимес кирек сығысхан, ол санда соох суғ пирҷең сетьтерде - 8, чылығ пирңең сетьтерде - 13.
Пӱӱнгі кӱнге Хакасияның котельнайларында 72370 тонна хара тас пилетелген, анзы синминчеткен чыындының 359 % тиңнелче. Амғы тусха муниципальнай пӱдістер хысхызына тимнен салғаннарынаңар 20 паспорт алып алғаннар. Паспорт аларына 46 сурыныс пічиинің 41-і ле пирілген.
Октябрьда ЖКХ предприятиелерінің чарытхы ӱчӱн алымы 1,6 % хызырыл парғаны таныхталча. 22 октябрьға чылығ паза суғ пирерінҷе полызығлар ӱчӱн тӧлегнің 96 % чыылған, ол санда бюджет организацияларынаң - 92,7 %, чуртағҷылардаң - 95,6 %, пасха потребительлердең - 100,2 %.
Чонға коммунальнай полызығлар пирчеткен организацияларның тоғынҷыларына чал ахчазын тӧлирінҷе сидіксіністер сығысхан. Сорығдағы «Наа тура» муниципальнай предприятие 43 тоғынҷызына 1 млн 525 муң салковай алымнығ, Кирбідегі «Тимірчолҷы ЖКХ» МУП 4 тоғынҷызына - 325 муң салковай, «Полигон» МУП 62 тоғынҷызына - 2 млн 285 муң салковай, «Кӧк хайа» муниципальнай предприятие 15 тоғынҷызына - 115, 9 муң салковай. «Боградтағы» МУП-тың чал ахчазынҷа алымы 1 млн 118 муң салковайдаң 869 муң салковайға теере хызырыл парған.
Валерий Келин ідӧк «Городта истіг оңдайлар тӧстирі» хазна программазы хайди толдырылчатханнаңар чоохтаан. Саяногорскта хазна программазын чуртасха кирерінҷе тоғыс иң уйан парча. Анда Пабалар сквері пӱдірілче паза 7 тура ибіркізі иптелче. Оӧн сидіксініс - тоғынҷылар чидіспинчеткені. Чыылығда ідӧк котельнайлардағы тыхтағлардаңар чоох парған.
Хубачардағы 5 № котельнайның 2-ҷі паза 3-ҷі хазаннарының автоматиказы читіре тыхталбаан. Амға теере сеть насозы читкелек. Халғанҷы искіріглерҷе, ол Челябинск облазында килче. 10 ноябрьға чидеріне ізеніс пар. Алтай аймааның пазы Татьяна Раменскаяның чооғынаң, насостың хазна хырығларын иртерінде кӧп тус парыбысхан.
Асхыс аалда 3 № котельнайда тыхтағ тоғызы узарадылча. Тӧӧ пазы посёлоктағы котельнай резервтіг хазан чох тоғынча.
Харатас городтың пазы Василий Белоноговтың искіриинең, Пригорсктағы котельнай тыхтал парған. Харатаста чылығ пирҷең сетьтернің пис кизегі (1700 метр тиксі узуны) нааҷылалған. Кӧп квартиралығ 439 турадаң пір ле тура хысхы тусха тимнен салғаннаңар паспорт ал полбаан. Прай социальнай объекттер паспорттар алып алғаннар. Пір неделя аразына Харатас город чуртағҷыларынаң ӱс ле хоп кірген. Айланыстарҷа тоғыс апарылған.
«Городта истіг оңдайлар тӧстирі» хазна программазынңа Харатаста прай тоғыстар толдырыл парғаннар, подрядчиктерге ахчаны читіре тӧлебізерге халған.
Саяногорсктағы чылығ паза суғ пирчеткен прай организациялар хысхы тусха тимненіс паспорттарын аларына сурыныс пічіктерін пир салғаннар. Ростехнадзор пирген сизіндіріглер тӱзеділгеннер. Саяногорск пазы Михаил Валов кӧп чон чӧрчеткен орыннарны иптирінҷе тоғыс хайди толдырылчатханнаңар искірген. Пічіктер тимнирінҷе паза подрядчиктерге ахча тӧлирінҷе кӧп тус хорап парғаннаңар тоғыс сӧӧ тартыл парыбысхан.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде