ХАКАСИЯНЫҢ ХАЛЫХ ПІРІГІСТЕРІ ЧОНЗАР АЙЛАНЫС ТИМНЕПЧЕЛЕР
19.11.2021
Хабарлар
Чыылығ. Пу неделяда Хакасия пазы Валентин Коновалов республиканың халых организацияларының устағҷыларынаң чыылығ иртірген. Ӧӧн сурығ - коронавирус чуғынҷах ағырығдаң тоғыр хада-пірге харбазары
ЧЫЫЛЫҒДА ХАКАСИЯНЫҢ ХАЛЫХТАР ПАЛАТАЗЫНЫҢ, ВЕТЕРАННАР ЧӦБІНІҢ, ХАКАС ЧОННЫҢ УЛУҒЛАР ЧӦБІНІҢ, ПРОФСОЮЗТАР ФЕДЕРАЦИЯЗЫНЫҢ ПАЗА ДАА ПАСХА ХАЛЫХ ОРГАНИЗАЦИЯЛАРЫНЫҢ УСТАҒҶЫЛАРЫ ПАЗА КІЗІЛЕРІ АРАЛАСХАННАР.
Мындағ тоғазығ иртірердеңер сурығ хаӌанох турыбысхан. Тиксі Россияда, ол санда Хакасияда, ковидтең тоғыр прививка турғыстырчатханнар пар, че ідӧк аннаң тоғыр полчатханнар кӧп. Халғанӌыларын чонда «антипрививочник» тіп адапчалар. Полғанының на вакцинация хоостыра позының сағыс-кӧрізі. Кем-де ковидті хаптырып албас, ол хазыхха тың хорғыс ағылбаан паза тоғыста сидіксіністер полбас ӱчӱн прививка турғыстырча.
Че пар чуртағӌылар, хайзылары пір дее нимедең хорыхпинчалар.
Олар коронавирустың кӱзін нимее салбинчалар паза пасхазын прививка турғыстырбасха кӧӧктірчелер. Мындағ кізілер тиксі хазнада илееде, итсе-де, Хакасияда даа андағлар табылча. Хайди кӧзітчелер саннар, республиканың 20 процент чуртағҷызы чуғынҷах ағырыға киртінминче, прививка турғыстырарға хынминча паза коронавирустаңар искіріглерге киртінминче. Аның сылтаанда халых чон ікі лагерьге чарыл парған тиирге чарир. Кем-де прививка ӱчӱн, кем-де аннаң тоғыр.
- Пу тусха имчілер чуғынчах ағырығнаң кӱрезерге, аны имнирге ӱгреніп алғаннар, хазна ахча позытча. Пір сӧснең система иптел парғаң ол тоғынча. Че халых чон, тізең пір чӧпке ам даа кил полбинча, - таныхтаан чыылығда Хакасия пазы аппарады устағҷызының тоғызын толдырчатхан Владислав Никонов.
Пу ікі пасха кӧрістіг чуртағҷыларны истіп алар ӱчӱн, Хакасияның правительствозы гражданскай форум иртірерге пӧгінче. Амғы эпидемиология кирее чонны чыырға харығ полча, аннаңар правительствода чыылысхан халых трігістерінің устағҷылары аны онлайн иртірерге чаратханнар. Аның ӧӧн пӧгіні - полған на кізее коронавирус чуғынҷах ағырығ хоостыра сағызын искірерге оңдай пирері, вакцинациядаңар чоох алызары паза халых чонда сығысчатхан сурығларға нандырығ пирері.
Онлайн-тоғазығлар неделяда пір хати иртірілері кӧрілче. Полғанында ла пасха-пасха тема полар. Че олар прайзы коронавирусха теелер. Гражданскай форумға имҷілерні, федеральнай эксперттерні, пасха регионнардағы специалисттерні хығырарға пӧгін пар. Ідӧк андар хайди даа муниципалитеттер паза республикадағы диаспоралар хозыларлар.
- Минің кӧрізімнең чонны ікі лагерьге чарары саба - кем вакцинация ӱчӱн паза кем аннаң тоғыр. Піс пір чонмыс, ӧӧні - прайзына позының сағыс-кӧрізін искірер оңдай пирері. Чоохтазығ азых паза сын ползын. Піс прайзын исғіп аларбыс, полған на сурыға нандырығ пирербіс, - таныхтаан чооғында Хакасия пазы Валентин Коновалов.
Мындағ гражданскай форум иртірердеңер сурығ тиктең не сығыс килбеді. Хакасияда коронавирус чуғынҷах ағырығны хаптырғаннарның саны ам даа кӧп, республиканың имнег учреждениелері аар оңдайда тоғынчалар, орғаннар саны кӧп нимес. Аның сылтаанда пасха ағырығларнаң ирееленчеткен кізілер пландағы имнег полызиин ал полбинчалар. Салтарында - ковидтең дее, пасха даа ағырығлардаң ӱрепчеткеннер саны илееде!
Хакасияның халых пірігістері чонзар айланыс тимнепчелер. Аның соонаң гражданскай форум иртірілер. Ол хаҷан паза хайди иртірілерінеңер піс азынада искірербіс.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде