ОЛАРНЫҢ ТОҒЫЗЫ ПРАЙЗЫНА ТАНЫҒЛЫҒ
26.11.2021
Хабарлар
Аал хонии. Пу кӱннерде Хакасия пазы Валентин Коновалов аал хониинда кӧп чыл тоғын салғаннарға паза істеніс марии чиңісчілеріне сыйыхтар читірген
Хыраларда тоңастығлар кизіл парғанда, мал азии пилетел парғанда, прай чир тамаа хазыл парғанда, аал хонии тоғынҷыларын алғыстир тус чит килген. Аал хонии тоғынҷыларының ам сала маң тус пол килгенде, Хакасияның аал хонии паза ас-тамах министерствозы пӧзік чидіглерге читкеннерні, кӧп чыл тоғын салған паза аал хониин тилітчеткен тоғынҷыларны правительство туразында чыып алған.
Кӧп чыл тӱзімніг тоғын салған паза Хакасияның аал хониина улуғ хозым иткен ӱчӱн «Хакасияның істеніс сабланызы» медальға ӱс кізі турысхан: Асхыс аймаандағы кресен-фермер хонии пазы Георгий Сарлин, «Саянмолоко» ООО-ның слесарь-тыхтағҷызы Владимир Степанов, Хакасияның аал хонии министерствозының Боград аймаанҷа хазна техническай сыныхтаанҷа инженер-инспекторы Владимир Глебов. Республиның аал хонии сурығларынҷа айғасчатхан паза наука-істезігліг институдының ӧӧн наука тоғынҷызы Любовь Вильге паза олох институттың сӱттіг паза иттіг маллар ӧскірерінҷе ӧменің устағҷызы Марина Никитинаа «Хакасия аал хонииның саблығ тоғынҷызы» ат пирілген.
Аал хониинда істеніс марииның чиңісчізі полыбысханнарға Хакасияның аал хонии паза ас-тамах министерствозының Аарластығ пічии паза 200 муң салковай читірілген. Пу сыйыхха читі кізі турысхан: «Аршановское» ООО-ның тоңастығларны сабарынҷа механизаторы Александр Сметанин, «Алтай» ООО-ның мал азиин пилетирінҷе механизаторы Михаил Данилин, «Июс-Агро» ООО-ның тоңастығларны таарирынҷа механизаторы Алексей Сапрыгин, «Целинное» ООО-ның інек сағңаҷы Анастасия Беспятова, «Андриановский» ООО-ның устағҷызы Сергей Лукьянов. Республиканың аймахтары аразында Алтай паза Пии аймахтары чиңісчі полыбысханнар. Пӱӱл пу аймахтарда тоңастығларның сығызы иң пӧзік полған. Алтай аймаа пазы Татьяна Раменскаяа I степеньніг диплом читірілген, Пии аймаа пазы Иннокентий Стряпковха - II степеньніг.
- Аал хонии паза ас-тамах тимнечең промышленность тоғынӌыларын сыйыхтар алғанынаң алғыстапчам! Республикаа, тиксі хазнаа паза полған на чуртағчаа сірернің тоғызыңар уғаа танығлығ паза кирек. Хазнада ас-тамах читкіче поларына аал хонии тилізі улуғ хозым итче. Ол ідӧк республиканың экономика политиказында ӧӧн кӧстег полча. Сірер тынағ чох тоғынчатхан сылтаанда, пістің чахсы ас-тамах алар оңдайыбыс шар.
Таныхтирчыхпын, пуул хыра тоғыстары оой нимес апарылғаннар. Часхы соох полған. Ӱртӱн айында хар чаап парған. Че, іди дее полза, сірернің опыдыңар паза кӱстенізіңер сылтаанда, пӱӱл тоңастығларны, чахсы ӧскіріп, прай чыып алғазар. Аның ӱчӱн сірерге улуғ алғыс.
Оой нимес тоғыстарың, сыдамахтарың, аал хонии тилізіне улуғ хозым итчеткеннерің ӱчӱн алғызым читірчем! Сірерге пик хазых паза кӧш кӱс алғапчам, - алғыстаан Валентин Коновалов.
Хакасия пазының орынҷызы Ирина Войнова аал хониинаң айғасчатхан кізілерге оой нимес туста тоғынарға паза кӧп сидіксіністі пӧгерге килісчеткенін таныхтаан. Фермерлернің ӧӧн ағырсымнығ сурығлары - тоғынҷылар чидіспинчеткені, техника паза удобрение паазы табырах ӧсчеткені.
- Тоғынҷылар чидіспинчеткеннеңер тоғасхан сай чоохтанчазар. Амғы туста пу улуғ сидіксініс полча. Чирде тоғынары - аар тоғыс, аннаңар анда тоғызына паза чиріне тың хынчатхан на кізілер істенчелер, - теен Ирина Войнова.
Республика пазының орынҷызы чооғынаң, Хакасия правительствозы аал хониина хабазарына ахчаның синін чылдаң ӧскірерге кӱстенче. Ол ахча фермерлерге паза аал хонии предприятиелеріне техника, оборудование, мал, ӱреннер, ГСМ алған ӱчӱн субсидия оңдайынаң пирілче. Ирина Войнованың чооғынаң, килер чылда тоңастығларны ӧскірчеткен хоныхтарға ахчалығ хабазығ таарығ тузы пасталғалахха пирілер, анзы хыра тоғыстарына азынада чахсы тимнен саларға оңдай пирер.
Хакасияның аал хонии паза ас-тамах министрі Сергей Труфанов ідӧк алғыстастарға хозылған. Аның таниинаң, халғанҷы чылларда ӧзімнер ӧскірчеткен хоныхтарға чахсы хабазығ пиріл сыхханда, тоңастығларның сығызы даа ӧс парған, оларны чахсы хайраллап халар даа оңдай пол килген. Ағаа хоза, хойларны арған оңдайынаң тӧллендірҷең оборудование садызарына паза хурағаннар ӧскіреріне хазна хабазии пирілче.
Алтай аймаа пазы Татьяна Раменская аймахтың чуртағҷылары паза аал хониинаң айғасчатхан кізілер адынаң Хакасия правительствозына, аал хонии паза ас-тамах министерствозына чахсы хабасханнары ӱчӱн алғызын читірген. Пӱӱл Алтай аймааның аал хонии предприятиелеріне паза фермерлеріне 30 млн салковай хазна хабазии пирілген.
«Хакасияның істеніс сабланызы» медальны алған фермер Георгий Сарлин Хакасия правительствозына, аал хонии министерствозына, Асхыс аймааның аал хонии управлениезіне чӧптернең чахсы полысчатханнары ӱчӱң алғызын читірген паза прайзына хазых алғаан.
Георгий Сарлин кічігдең аал хонииңда тоғынча. 9 частығдаң сығара хойлар хадарып пастаан. Ӱгредіг алып алғанда, «Пуланнығ кӧл» совхозсар тоғынарға айланған. Тракторист, шофёр, соонаң чабан полған.
2005 чылда кресен-фермер хониин тӧстеен. Пастап аның пос хонии полған. Хойлар, маллар паза аттар саны ӧс парғаңда, фермер полыбысхан. Ферма хониин тилідерге Василий оолғы, Екатерина хызы паза Сергей кізӧзі полысчалар. Василий чабан полча, Екатерина - бухгалтер, Сергей - тракторист. Тоғынҷылар саны прай алты кізі. Амғы туста Пуланнығ кӧлнің паза хости ааллар чуртағҷылары аттар кӧп тутчалар, аннаңар орыңдағы фермерлер тоңастығларны таарыбинчалар. Георгий Сарлин суланы читкіңе садызып алча. Мал-хойлар хадарарына чирлер, от тоғынарына техника читче. От пилетирінде сидіксіністер чоғыл, ол чахсы сыхча. Фермер хониин пос кӱзінең не тилітче, хазна хабазиин албаан.
Килер чылда фермер хойларны арған оңдайнаң тӧллендірерге сағыс тутча. Амғы туста хоныхта хойларның саны 1 муңны ас парған.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде