ИҢ АРТЫХТАРНЫҢ САНЫНДА
15.12.2021
Статья
Поғдархас. Пу наада национальнай гимназияның 11 «г» класс ӱгренңізі Аима Боргоякова республиканың чыл ӱгренҷізі полыбысхан. Пу кӱннерде ол Ульяновск городта «Чыл ӱгренҷізі» тиксі Россия мариинда араласхан
Аима Боргоякованы «Ине тілі» марығны хынып кӧрчеткен улус чахсы таныпча полар, неке. Индіркі Тӧӧ аалның чиит чайаачы чуртағҷызы уғаа чахсы тахпахтапча, кӧглепче. Национальнай гимназияда ӱгреніп, хыс ӱгредіг учреждениезінің халых чуртазында сыбыра араласча. Ол, аймах марығларда чайаачы узын кӧзідіп, гимназияның адын сабландырча. Ӱр ниместе Аима, республиканың «Чыл ӱгренҷізі» полыбызып, Россия синінде иртірілчеткен «Чыл ӱгренҷізі-2021» марығда аралазарға чӧрген. Ол Ульяновскта ирткен. Чоохтирға кирек, Россия мариинда 9 - 11 класстарның финалға сыххан 100 ӱгренҷізі 38 регионнаң араласхан. Анда финалисттер пис номинацияда устарынаң сынасханнар: чайаачы оңдайнаң постаңар чоохтап пирері, «Широка моя страна родная» чир-суубысха чарыдылған марығ, дебаттар, ойыннар паза аймах чахығларны толдырары. Хазна синіндегі марығда араласхан полған на ӱгренҷі позының пілізін, чайаачы кӧңнін жюриге чахсы кӧзіт пирерге кирек полған. Тӧӧ чирінің чиит чуртағҷызы пасха регионнарның олғаннарын Хакасиянаң таныстырған. Ӱгренҷінің класс устағҷызы Марина Ошарова, ағаа чӧлег полып, кӧңнін сыбыра кӧдір турған.
Ідӧк марығда араласхан улусха тузалығ занятиелер, мастер-класстар, хазнабыстың саблығ кізілерінең чайаачы тоғазығлар кӧп иртірілген. Оларға анда наа пілістер пирілген. Паза марығның финалына сыххан ӱгренҷілер Россияның чииттер пірігізінің араласчылары полыбысханнар. Хайди таныхтаан Россияның чииттер пірігізінің кнезі Павел Красноруцкий, марығ пӧзік синде ирткен. Аның араласчылары тирең пілістер кӧзіткеннер. Паза полған на ӱгренҷі позының кічіг чир-суу тархынынаңар, культуразынаңар хынығ чоохтап пирген.
Аймах чоннарның культуразынаңар искірчеткен марығны кӧрерге уғаа хынығ полған. Анда аймах чоннарның культуразының ис-пайы уғаа чахсы чарыдылған. Килер чылда піс марығ араласчыларының санын алғыдарға пӧгінчебіс тіп искірген ол чиит улусха. Че марығ ол марығ, артыхтарының иң артығы ла сыйыхтығ орыннарға турысча. Хомзынысха, пістің чир-суғҷыбысха анда оң полбаан. Андағ даа полза, Аима хомзынминча. Чапсых тоғазығлар, наа пілістер аның сағыс-кӧрізін алыстырған. Амды, ибзер айланып, ол Ульяновскта ирткен кӱннерні хынып сағысха кирче.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде