Имҷiлернi сыйыхтааннар
28.12.2021
Хабарлар
Пӱӱн Хакасияның правительствозы туразында имҷiлернi чеестееннер. Оларға республика пазының алғыстас пiчиин читiргеннер.
Сыйыхтас алнында чыылған чонзар чылығ сӧстернең Хакасия пазы Валентин Коновалов айланған. Валентин Олегович чоохтаан:
- Правительствоның паза позымның адынаң тӱзiмнiг тоғызы ӱчӱн сiрерге алғызым читiрчем. Пандемия тузында прайзына хатығ чухча, че иң аар-чӱк имнег киреенде iстенчеткеннерге артылған. Сидiк туста имҷiлерге, медсестраларға 12-16 час тоғынарға килiсче. Ағырчатханнарның аразында аймах кiзiлер тоғасчалар. Оларға iдӧк сыдазарға кирек. Прайзын сыйыхтарнаң алғыстапчам. Чағдапчатхан Наа чыл чахсы киректерге пай ползын, ӧрiнiс ағылзын. Часкалығ полыңар. Хакасияның ӱлгӱлерi хаҷан даа сiрерге хабазарға тимде.
Алғыстастарға Хакасия пазының орынҷызы Ольга Пономарева паза республиканың хазых хайраллаҷаң министрi Олег Ананьевский хозылғаннар. Ольга Игоревна залдағы чонға хазых алғаан. Чоох тудып, ол Ағбан пилтiрi аймааның имнег туразының ӧӧн имҷiзi Екатерина Трефилованы алынҷа таныхтаан. Екатерина Викторовнаның устаанынаң аймахта грипптең тоғыр прививка тойлығ ипчiлернiң паза олғаннарның 100 %-iне турғызылған. COVID-19 ағырығдаң тоғыр вакцинаны чуртағҷыларның 87 %-i турғыстырып алған. Хакасияда пу иң чахсы кӧзiдiм полча.
Хазых хайраллаҷаң министрi Олег Ананьевскийнiң таниинаң, имҷiлер коронавирустаң тоғыр харбазарға ӱгренiп алған соонда, пӱӱл кiзiлернi кӱстiг имнеп сыхханнар. Ӏкiнҷi чахсы хабар: имнег киреендегiлер 2021 чылны алым чох чабысханнар.
Мероприятие тузында 14 специалист таныхтатхан. Сыйыхтаттырғаннарның санында Харатастағы олған имнег туразының ӧӧн имҷiзi Александра Юрьевна Карамчакова, Ағбандағы табырах имнег полызии станциязының устағҷызы Айвар Николаевич Кольчиков, Таштып аймааның имнег туразының ӧӧн имҷiзi Юрий Георгиевич Мохов паза пасхазы.
Автор :
Майя Кильчичакова
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде