НАА ЧЫЛ ӦРІНІС СЫЙЛАЗЫН!
29.12.2021
Хабарлар
Алғыстапчабыс. «Хакас чирі» газетаның хығырығҷылары республика чуртағӌыларын, хада тоғынчатхан арғыс-ӧӧрелерін паза туған-чағыннарын чағдапчатхан 2022 чылнаң алғыстапчалар
*******************
Н.Ф.Катановтың адынаң Хакас национальнай гимназия-интернаттың ӧмезі:
- Аарлығ олғаннар, іӌе-пабалар паза хада-тоғынчатханнар, прай чӱреебіснең сірерні Наа чылнаң алғыстапчабыс. Наа чыл - ол наа ізеніс, ӧзіс паза чиңіс. 2022 чылзар хайхастығ кӧңніліг, паарсах паза чарых сағыстығ хаалапчабыс. Ол чарых сағыстар чыл ибіре ползын. Сірер хаӌан даа чарых кӧңніліг, ах сағыстығ полыңар, наа чидіглерге киліңер. Прай чобағлар, хорғыстар иргі чыл идеенде чат халзын. Сірерге паза чағыннарыңа сӧбіреде амыр-хазых чуртас алғапчабыс, удур-тӧдір пілізіс пар ползын. Полған на кӱн чағыннарың хыныс паза паарсас сыйлазын. Иң ӧӧні, алнында хазых паза узах чуртас, пик хыныс ползын.
Ідӧк арғыстарыбысты паза партнерларыбысты Наа чылнаң алғыстапчабыс. Сірер, ӧсчеткен тӧлні ӱгреніске кӧніктіріп, ӱгредігде тӱзімніг паза уғаа кирек тоғыс апарчазар. Мыннаң мындар пірге иткен тоғызыбыс уламох тыып-ӧзіп одырар, че сидіксіністер соонда халарлар. Прай ӧмелерге істеністе наа чидіглерге чидерге паза улам ӧңненерге алғапчабыс. Сірернің тоғызыңарда, кирееңерде оң ползын, наа пілістер туза ползын, наа пӧгіннер чуртасха кирілзін. Чағдапчатхан Наа чыл сірерге часкалығ, наа киректерге пай ползын, хоза кӱс пирзін. Хада тоғынчатхан арғыстарыңның улуғлазы, чарых кӧңніңерні кӧдіріп, чахсы чуртасха ағылзын. 2022 чылда наа пӧгіннер толдырылзын, тоғыстарың кӧдіре паалағ алзын! Наа чылнаң!
*******************
Ергаш Топоев, имҷі-невролог, Москва г.:
- Чағдапчатхан Наа чылнаң, аарлығ чир-суғҷыларым! Мин ізенчем, піс коронавирус пандемиязы тузында, хайраллазып, удур-тӧдір ситкіп хайарға ӱгреніп алғабыс, постың хазиин паза чуртасты улам на аарлан сыххабыс.
Алынҷа улуғ алғыс читірчем имҷі-коллегаларыма. Мындағ аар туста сірер позыңарның тоғызын айдас толдырчазар. Піс амды чахсы сизініп пастапчабыс: имҷі, имнег тоғынҷызы профессиязы - чонның хазых чуртазына ізестіг чӧлег. Аарлығ имҷілер, позыңарны хайраллаңар, туған-чағыннарың даа пик хазыхтығ ползыннар!
Чир-суғҷыларыма ідӧк пик хазых, сӧбіреде хаҷан даа хыныс, ырыс-часка, амыр чуртас ползын тіп алғапчам. Сағынған сағыстарың толзын. Хазых чуртасха, имңілернің ӧӧн чӧптеріне тудынзаңар, хазых поларзар, андада сӧбіреңерде часкалығ чуртас полар.
*******************
Татьяна Канзычакова, Орджоникидзе аймааның «Тамырлар» хакас чон культуразы кінінің устағҷызы:
- Тоозылча 2021 чыл, Пуға чылы. Хакасияда ол Алыптығ нымах чылы тіп чарлалған. Орджоникидзе аймааның «Тамырлар» хакас чон культуразының кіні ӧӧн тоғыстарны пу танығлығ чылнаң палғалыстырған. Ідӧк піс республика мероприятиелерінде араласхабыс. Чуғынҷах ағырығ пірее туста тың тараза даа, карантин кирілзе дее, піс тоғынғабыс паза алынҷа чидіглерге читкебіс.
Наа чыл алнында чӧптіг тоғынҷылар ӧмезіне пик хазых, чайаачы ӧзіс алғапчам, чобағлар паза хомай киректер теелбезін. Чайаачы чолыңарда хаҷан даа чарых чылтыс чарып турзын.
*******************
Марат Кичеев, Россияның саблыи тренері, спорт ветераннары аразында тилекей чемпионы:
- Аарлығ чир-суғҷыларым, сіліг харахтығ чоным, Ала парыс чылынаң алғыстапчам.: Наа чидіглер, толдыра ӱлӱстіг чуртас, чалтырама чиңістер алғапчам.
Че иң ӧӧні - пик хазыхтығ, ачых-чарых кӧңніліг полыңар. Хайди тіпчелер хыйғаларыбыс, кізі хазиинаң аарлығ ниме чоғыл. Аннаңар прайзын хазых чуртас апарарға хығырчам. Андада ала парыс осхас кӱстіг, чапчаң поларбыс.
*******************
Галина ЧЕБОДАЕВА, Н.Ф.Катановтың адынаң национальнай гимназия-интернаттың воспитательі:
- Аарлығ гимназия тоғынӌылары! Наа чылнаң! Наа часканаң! Алғыстас сӧстерін читірчем, аарласты чӱреемнең сығарчам. Чуртас чоллары, иптеліп, часка хылларынаң сулғалзын. Сӧбіреде ынағлас, паарсас тыып одырзын. Тӱлгӱ чылында палаларың, туғаннарың, чылығ кӱлініс сыйлап, ӧріндірзіннер. Тураңарда чарых кӱн салзын, ізепте ахча хыӌырап ла турзын. Сырайыңарда тырысхахтар полбазын.
Чӱрееңерде сіліг чахайах чарылызы ӱзілбезін. Чылығ, иптіг, чалахай кӱлініс сырайыңарны чазап турзын. Чылдаң чылға хазыхтарың, тыып, хазың ағас осхас пик ползын. Сағыстарың, пілістерің пайып одырзын. Талаан ырызы, хуӌахтап, абыдып, чылыдып, хайраллап ла турзын! Улуғлапчам, паарсап, алғыстапчам.
*******************
Таринэ СУЛЕКОВА, Орджоникидзе аймааның «Тамырлар» хакас чон культуразы кінінің хоос устағҷызы:
- Орджоникидзе аймаанда пос кӧңнінең чыылған хор пар, аның араласчылары Майрастар, Хозаннар, Хуруннар паза Монастырлар аалларның чуртағӌылары полчалар. «Чазы ӱннері» хорның прай араласчыларын чағдапчатхан Наа чылнаң алғыстабызарға сағынчам. 2022 чыл хорға пайрамнығ чыл полча, ол 2012 чылның азығ айында тӧстелген. Он чыл аразына «Чазы ӱннері» хор аймахтың паза республиканың чуртағӌыларын сценада ӧріндірче. Марығларда посты турыстыра кӧзідіп, сыйыхтығ орыннарға турысча.
Прайзына пик хазых, узах чайаачы чыллар, тоозылбас-парбас кӱс, наа чиңістер паза сыйыхтар алғапчам.
*******************
Светлана АХПАШЕВА, Аибандағы «Кристаллик» олған садының воспитательі:
- Наа чыл чирібіс ӱстӱнӌе хаалапча,
Иргі чыл сидіксіністерін соонда халғысча.
Че мин алғыстирға маңзырапчам,
Хазых, ачых-чарых ползын чоныбыс.
Наа чыл ырыс, аарлас ағылзын,
Арығ сағыстығ чоныбысха амыр чуртирға алғапчам!
*******************
Изольда ЧЕБОДАЕВА, Маткичіг аал чуртағҷызы:
- Килер чылда мин «Хакас чирі» газетабысха кӧп кізі пазын салзын тіп алғапчам. Кізілер газетабысты хығыр ла турбазыннар, ідӧк андар пічіктер пас турзыннар. Полған на аалда саблығ паза турыстығ кізілер пар ла полча нооза. Аал тархынынаңар пазарға кирек. Род-сӧӧктердеңер, тузалығ чӧптердеңер паза аалдағы чииттердеңер чоохтирға. Прай чоныбысты Наа чылнаң алғыстапчам! Ынағ, хазых паза пай чуртазыннар!
*******************
Любовь КУЗУРГАШЕВА, Ис пилтіріндегі школаның 6-чы класс ӱгренҷізі:
- Іӌең, алғыстапчам сині Наа чылнаң! Алғапчам сағаа часка, пик хазых, хыныс. Ідӧк аға-ууӌамны алғыстапчам! Хаӌан даа ағырбаңар, хазых чӧріңер. Хада ӱгренчеткен палалар, ӱлӱкӱннең сірерні! Чахсы ӱгреніңер, улуғларның чооғын истіңер! Хысхы тынағ кӱннерін маңат иртіріңер! Наа чылнаң прайзын!
*******************
Денис ЧЕРТЫКОВ, ниик атлетикача Россияның спорт узы:
- Пӱӱл спортха танығлығ чыл полды. Хайди полза Токиода Олимп ойыннары иртірілгеннер. Санапчам, Россия командазы анда позын турыстыра кӧзіткен. Спортсменнер 71 медаль холға киргеннер. Позымның чидиим парох. Майда тағлығ чӱгӱрісче Россия чемпионадында чиңіс тутхам. Алында хазна чемпионаттарында призер ла полӌаңмын. 2022 чылда февральда хысхы Олимпиадазы полар. Россия командазы ӱчӱн «ағырарбыс». Килер чылда спортсменнерге наа чиңістер ту-дарға, рекордтар турғызарға алғапчам. Прайзының хазии пик ползын.
*******************
Азиза ЧЕБОДАЕВА, Марина ТОРБАСТАЕВА, Айсили ЧЕБОДАЕВА, Ис пилтіріндегі школаның ӱгренҷілері:
- Худай пирген чуртазыбысты
Хайраллаңар, пір хатап тӧреенде!
Хада тӧреен туған-харындастарны
Аарлап чӧріңер хазыхта!
Удур-тӧдір полызызып чуртаңар!
Пірсіне аар полза, полызыңар!
Кізі чалғызан халбазын!
Чуртаста ынағлас, хыныс ползын!
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде