ЧААҶЫЛАРНАҢ ПАЛҒАЛЫС ТЫЫДЫЛЧА
20.01.2022
Хабарлар
Чыылығ. Хакасия пазы Валентин Коновалов Центральнай чаа округы командующайының орынҷызы, генерал-майор Рустам Миннекаевнең хада чыылығ иртіргеннер
Правительствоның чыылығлар иртірчең залында аалҷылар делегациязында илееде кізі полған, ӧӧнінде полковниктер паза подполковниктер. Олар, Россияның арачыланыс министрі Сергей Шойгуның чахиин толдырып, Хакасияда орныхчатхан чааҷылар частьтары паза республика устаа аразындағы палғалыстарны тыыдар пӧгіннең килгеннер.
Чыылығны азып, Валентин Коновалов таныхтаан:
- Республикада орныхчатхан чааҷылар частьтары мындағы стратегическай объекттерні хадарчалар. Хакасияның правительствозы, пістің чаа хыларнаң хада-пірге тоғынып, оларға служба апарар оңдайларны чахсыландырарына хабасча. Чааҷылар піске, сағыбаан саайлар, ӧрттер сых чатхан туста, суғлар чайылчатса паза пасха даа хорғыстар полза, тӱзімніг полызығ пирчелер. Ӧӧні - Хакасияда чааҷыларға истіг ползын. Сығысчатхан сидіксіністерні піс хада-пірге тобырчабыс.
Генерал Рустам Миннекаев, Хакасияның устаана алғыс сӧстерін читіріп, республикада чиит тӧлні патриотизмге ӱгредер тоғыс чахсы апарылчатханын таныхтаан. Аның чооғынаң, Хакасияда орныхчатхан частьтарның чааҷылары андағ тоғыс апарарында ідӧк чапчаң араласчалар. Республикада «Юнармия» чӧрім, «Авангард» ӱгредіг-методика кіні патриот тоғызын чахсы апарчалар. Ідӧк чахсы саринаң адирға чарир Ағбандағы 7, 18, 26 номер школаларны паза Хакас национальнай гимназия-интернатты.
Рустам Миннекаев Россияның арачыланыс министрі адынаң Хакасияның чонын Наа чылнаң, Кӧлееденең алғыстаан. Генерал, арачыланыс министрінің Хакасия пазы Валентин Коноваловты «За укрепление боевого содружества» медальнаң сыйыхтирдаңар приказын хығырып, Валентин Олеговичтің кӧксіне медальны хазап пирген.
- Мындағ сыйых ӱчӱн улуғ алғыс. Ол прай правительствоның тоғызына паалағ. Піс, хада-пірге проекттер тӧстеп, военкоматтарнаң хада оларны чуртасха кирер тоғыс апарчабыс. Сидіксіністер дее полча, оларны пӧгер оңдайлар таап, чарат салчабыс. Армия піске чахсы хабасча. Амғы пандемия тузында піс, полызығ сурап, Россияның арачыланыс министрінзер айланғабыс. Чааҷы-имҷілер полызии сылтаанда коронавирус тың ӧсчеткен тусты иптеп иртіріп алғабыс. Чахсы, хаҷан пістің чирібісте чааҷылар частьтары пар. Ӧрттер сыхчатхан туста, суғлар чайылчатса, піс оларның полызиина ізенчебіс. Мындағ паалағ ӱчӱн улуғ алғыс, мыннаң мындар чааҷыларнаң хада-пірге тоғызыбысты узарадарбыс, - теен Хакасия пазы.
Чыылығда ідӧк республика устағҷызының орынчызы Юрий Курлаев чоох тутхан. Хайди ол искірген, Хакасиядағы частьтарнаң хада кӧп мероприятие иртірілче. Военкоматтар чааҷы службазына план хоостыра хығыртығ тоғызын тӱзімніг толдырчалар. Илбек Ада чаада чат халғаннарны хумартхылир мероприятиелер сыбыра иртірілче. Амды мобилизация резерві тӧстелче, андар 287 кізі таллалған, оларнаң ӱгредіг апарылча. Призывниктерні армияа пайрамни ӱдесчелер, частьтарнаң палғалыс тудылча.
Правительство чааҷыларның социальнай сурығларына ӧӧн хайығ салча, оларның палаларына школаларда, олған садтарында орыннар пирілче, сӧбірелерінің кізілеріне тоғыс орыннары табылча. Полызығ удур-тӧдір пирілче. Чаачылар частьтары, чидіп аларға сидік орыннарда ӧрт сыхханда, аар техниканаң хабазып, тайғадағы ӧрттерні ӱзірерге полысханнар. Ідӧк мында пала тың ағырыбысханда, ағаа орнында имнег полызиин пирер оңдай чох полғанда, Центральнай чаа округының командующайы, самолет пиріп, аар ағырчатхан паланы Санкт-Петербургсар апарарға хабасхан. Андағ кӧзідімнер илееде адирға чарир. Хакасия правительствозынаң мындағы частьтарнаң хада-пірге тоғынардаңар чӧптезіг иділген.
Рустам Миннекаев, Хакасиязар ол пастағызын на килгенін таныхтап, постарын чылығ удурлаан ӱчӱн паза чаачыларның социальнай сурығларын сыбыра пӧкчеткен ӱчӱн алғызын читірген.
Валентин Коновалов пазох чааҷы-имҷілернің полызиинзар айланған:
- Хакасияның имнег сферазына чааҷы-имҷілер паалап полбас полызығ пиргеннер. Олар чох піске уғаа сидік чуғарҷых. Ағырчатханнарға киректелчеткен кислородты чааҷылар тузында читкіҷе пир турғаннар. Андағ улуғ полызығ ӱчӱн піс оларны чылығ алғыстапчабыс. Сығысчатхан прай сурығларны пӧк турарбыс.
Валентин Коновалов Рустам Миннекаевке Хакасиядаңар танығлығ пакет читірген.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде