ОРТА ЧОЛҶА ПАРЧА
17.06.2022
Хабарлар
Наталья ТОПАКОВА - ателье ээзі
ПОС КИРЕЕ: асчабыс, тилітчебіс, парыстанчабыс...
Идінҷек. Хайдағ хаалағнаң пасталча пос кирее? Пу сурыға нандырығ тілеп, республика идінчектерінең чоохтазығлар узарадылча. Пӱӱнгі матырыбыс - «С иголочки» ателье ээзі Наталья Топакова
BEINOPEN
Ортын сыннығ Наталья Топакова минің хайиимны табырах чооғынаң тартхан. Пӱӱл Хакасияның экономика тилізі министерствозы паза «Минің пос киреем» кін республикада кип-азах тігерінең айғасчатхан идінӌектерге BEINOPEN институт ӧмезін хығырт пирген. Ікі кӱн мода киреен ӧтіре пілчеткен специалисттер пілістерінең пістің идінӌектернең ӱлескеннер. Институт тӧстегӌізі Алексей Баженов, тізең, Хакасияда ниик промышленностьтың амғы синін оңарып алар ӱчӱн, идінӌектернің тоғыс оңдайларын паза таңдағызына кӧрістерін паалаан. Аның хайиинда ідӧк «С иголочки» ателье ээзі Наталья Топакова полған. Ол сағыс-кӧрізінең ӱлескенде, Алексей аның орта чол таллап алғанын таныхтаан. Че республиканың кип-азах тікчеткен идінӌектері аразында пик азахта турар ӱчӱн, Наталья Топаковаа ам даа тіспен тоғынарға кирек, наа сағыстар, тізең, тыс пирбинчелер!
УУҶАЗЫНЫҢ УЗЫ
Таштыпта Натальяның тай ууӌазы Екатерина Доможакова чуртаан. Ол палаларына кип-азахты позы тікчең. Олар ідӧк ол кирекке ӱгреніп алтырлар. Натальяның чооғынаң, аның пиӌезі паза ікі тайызы тігерге пілче. Юрий тайызы Якутияда имӌі полып істенчеттір. Пірсінде ол іӌезінің тӧреен кӱніне жаккардтаң костюм тік пиртір. Сыйиинаң іӌезін чапсыттыр. Александр тайызы слесарь полып тоғынчаттыр, че тігерге пілчеӧк.
Пастағы класс соонаң хызыӌах тай ууӌазында пастағызын ааллаанда, азах машинказы аның хараана тасталған. Ол тустаң хызыӌах тай ууӌазына маң пирбинібіскен. Ол машинкада тігерге ӱгреніп аларға сағыныбысхан. Тай ууӌазы пастап газетада тігерге ӱгреттір, анаң улуғ нимес истерде.
ІҶЕЗІ ЧОЛЫН АСХАН
Ибзер килгенде, хызыӌах кӧклӧлерін тонандыр сыххан. Пірсінде, тізең, іӌезі позына алған бархатты сурап алған. Ол тустаң сығара іӌезі ағаа удаа пірее ис ал пирӌең.
- Іӌеме алғызым читірчем, кӧңнімні чағын алӌаң, ис ал пирчең, - тіпче Наталья. - Іди полбаан полза, тігерге хынызым даа тыыбасчых.
Че теенібіскенде, ол тігерінең пасха, ідӧк палғирға, чібекнең хоостирға ӱгреніп алған. Школаны тоозарына, тізең, теелбекнең айғазарға сағыныбысхан. Іди Ағбан пилтірі аймааның Томыӌахтар аалдағы школаны тоозып, Наталья Хакас хазна университедіндегі музыка колледжінзер хореографха ӱгренерге кірерге чаратхан. Че орын хакас хорында ла полған, ол чарым чыл анда ӱгрен кӧргенӧк. «Ол минің киреем нимес», - сағыс улғаадып одырған. Чиит хыс, паза полбаанда, ӱгредиин тастаан. Ибзер айланғанда, іӌе-пабазы пір дее тоғыр чоохтанмаан.
- Хызым, мин пілчем ниме синің кӧңніңе кірче, - пірсінде теен ағаа іӌезі. - Тігерге. Ниме ибіре чӧрерге, пар кип-азах тікчең усха ӱгренерге. Іди Наталья Ағбанда 3 № профессиональнай училищеде ипчі кӧгенеен тікчең паза пысчаң 5-ҷі разрядтығ ус специальность алған. Ӱгренчеткенде, прайзынаң артых тікчең. Анаң, пілістерін алғыдып, чонға тоғыс тапчаң кін пастыра Харатастағы механико-технологическай техникумда закройщикке ӱгреніп алған.
ПОС КИРЕЕНЗЕР ЧОЛ
Училищеде ӱгренчеткендӧк, Наталья пос ательезінеңер сағына тӱскен, че ол сағыстьі хайди чуртасха кирерге пілбеен. Ӱгредии соонаң ол ательезер тоғысха кіріп алған. Соонаң, чуртас оңдайлары алызып, ательелер ідӧк алысханнар. Пір туста садығ туразында тоғынғанох. Анда ол чоннаң тіл алызарға ӱгренген. Ирге парып, ікі оолағас тапхан. Амды аның полысчызы хазинезі полча.
- Хада хонғанымның іҷе-пабазы садығ туразын тутханнар. Хазинемнің идінҷектің тыс пілбес сари пар. Ол мині пос алынӌа тоғынарға кӧӧктірген. Іди мин ибде тӧзек-частых тігіп пастаам. Ибде хайынарға киректелчеткен оох-теек тудынӌахтар, ниик пызылчатхан кип-азах тікчеңмін, ол санда иреннернің істіне кисчең кип-азаан, - сағысха кирче Наталья. - Че ол даа ниме садиинаң ахча идіп, кип-азах тігерге киректелчеткен оверлокты садызып алғам, анаң «Чайка» промышленнай машинкаа чидінгем. Иргі машинка удаа оодыл парӌаң. Іди ікі чыл аразына чахығнаң айланчатханнарны чыып алғам.
ПОС АТЕЛЬЕЗІ - ТОЛҒАН САҒЫЗЫ
Че пос ательезінеңер чазыт сағызы тыс пирбинчеткен. Очы оолағын спорт гимнастиказынӌа тренировкаа ал чӧрген. Ол орында «С иголочки» ателье орныххан. Наталья андар хыныға кір кӧрген. Ателье чиит хысти полтыр, ол туста ағаа кип-азах тікчең ус киректелчеттір. Іди Наталья андар тоғысха кірібіскен. Ӱр дее тус иртпеен, ателье ээзі, азах аар чӧрчеткеннеңер, тоғыстаң парарға чаратхан. Наталья, чахсы сағынып алып, ательені позына садызып аларға чаратхан. Андағ оңдайнаң, кип-азах тікчең устың ӱр ал чӧрген сағызы толған - ол пос ательезінің ээзі полыбысхан.
- Пӱӱнгі кӱнде чалғызан тоғынчам. Полысчы таап аларға уғаа сидік, профессияҷа тоғынарға хынминчалар, - тіпче Наталья. - Аннаңар позыма ла ізеніп, чахығларны алчам. Чоохтирға кирек, ателье полызығлары кирексініснең тузаланчалар. Пу тура саринда ла минің ательемнең хада ӱс ателье тоғынча.
ХАЗНА ХАБАЗИИ
Наталья Топакова пастап пос алынӌа тоғынған, пір дее чирде санға турбаан. Ирткен чылда ол посха тоғыс таапчатханнар санына хозыларға чаратхан. Іди ол идінӌек поларына пастағы хаалағны идібіскен тиирге чарир.
Пӱӱл ол социальнай чӧптезігӌе пастағы ахчалығ хабазығны алған. Ол чон кип-азаан амғы тусха килістіре тігерге пӧгінче. Социальнай чӧптезіг чонға социальнай хабазығ пирӌең кінде иділче. Хазна хабазии 250 муң салковайға тиңнелген. Ағаа ӧнетін тиріг алылған: наа машинка, оверлок, ноутбук паза дизайнер программалары. Аның алнында Наталья пос ахчазына чібекнең хоостаӌаң машинка алып алған. Амды чиит идінӌек «Минің пос киреем» кін пастыра Москвадағы дизайн академиязында дизайнер-модельерге ырахтын ӱгренче. Ахчаның чардығын, 27 муң салковайны, позы тӧлеен.
ІКІНҶІЛЕСТЕР
Пос киреен пастир кӧңні Натальяның хаӌанох полған. Таң ол тусха кӱзі читпеен, таң чуртас оңдайлары киліспеен, че пос кирее толбас сағыс чіли алнында ла «пызыңнаан». Ол кӱсті позында таап алар ӱчӱн, Наталья пос чолын таап аларға, сағыстарын чуртасха кирерге кӧстепчеткен аймах ӱгредіглерге пазынған, ол санда Аяз Шафутдиновтың, Наталья Муштаның паза пасхазының. Оларның проекттерінде аралазып, Наталья республикада маңнаныстығ тоғынчатхан идінӌектернең танысхан. Пу тусха аның идінӌек киреенеңер тиксі пілізі чыыл парған тиирге чарир. Амды аның пос ательезі наа тынысты сағыпча, наа тиріг тимде, ӱгредіг парча. Че! Ипчінің кӧңні «амырап» парған осхас, пӧгін толдырыл парғанға тӧӧй, итсе, алнында ам даа улуғ хаалағлар сағыпча. Хайдаң килче ол ікінӌілестер? Пу сурығны ол позына ла пирче. Тус, тізең, тӧдір пазынмасха киректелчеткенін киречілеен. Анзын Наталья чахсы пілче.
ПӦЗІК МОДАЗАР ЧОЛ
Піс пазох BEINOPEN институт ӧмезінің ӱгредиинзер айланчабыс, хайда Алексей Баженовтың устаанынаң республиканың кип-азах тікчеткен устары наа тыныс, наа кӧріс тапханнар. Оларның санында Наталья Топакова полған.
- Мин орта чол таллап алғанымны піліп алғам. Пос кип-азаа ӧзеніне чон кип-азааның ӧӧн таңмаларын турғысханы уғаа кирек полтыр. Паза IT-технологияларынаң тузаланарға киректелче, мында даа минің пос кӧрізім, чуртасха кирер сағызым пар. Олар кӧп нимее хараамны асханнар. Дизайнерге ӱгренмеені чидіспинчеткені іле, мин ол читпесті чох идербін, - тіпче Наталья.
Пӱӱнгі кӱннің модазы - ол полған на кізінің истенчеткен кип-азаа, аның чуртазына, чуртас оңдайларына чағын кип-азах. Ол аның тӧреен чирінеңер алай аны хайхатхан чирнең палғалыстығ полза, хайди даа аарлығ кип-азах санына кирілер.
Алексей Баженовтың кӧрізінең, ол пӱӱнгі кӱннің модазының ӧӧні. Наталья, тізең, ол модазар чолны таптапча тиирге чарир.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде