ОЛАРНЫҢ МАХАЧЫЗЫН УНДУБАСПЫС
24.06.2022
Хабарлар
Хумартхылас паза чобағ кӱні. 22 июньда Ағбанда Чиңіс паркында «Піс ундубаспыс» халых акциязы ирткен
Тиксі Россияда 22 июньда Хумартхылас паза чобағ кӱні таныхталча. Аны иртіріп, піс Илбек Ада чааның араласчыларын, тыл тоғынӌыларын, Германиязар сӱрдірген паза Ленинградтың хурчаана кірген улусты сағысха кирчебіс. Хан тӧгістіг чаада СССР 27 миллион чуртағӌызын чідірген. Оларны ундударға чарабас.
Ағбанда хумартхылас акциязы митинг оңдайынаң ирткен. Аны Хакас филармониязының солизі Ольга Васильева, бард В.Высоцкийнің «Оолларыбыс чааға парча» сарынын толдырып, асхан. Анаң олғаннар ағалары фронттаң ысхан пічіктерні тыыда хығырғаннар. Чааӌылар, чабал азымахчыларны унада сабызып, тӧреен чирінзер айланарға пӧгінгеннер, че андағ ӱлӱс прайзына тӱспеен. Кем-де сағба чох чіт парған, хайзы-да, палығларына сыдабин, госпитальда ӱрептір. Чоохтирға кирек, Илбек Чиңіске Хакасияның хозымы улуғ. Чаада 70 муң артиинаң кізі араласхан, анзы Хакас автоном облазының чуртағӌыларының 24 процентіне тиңнелче. Чааның пастағы тӧрт кӱні аразына орындағы военкоматтарзар пір муң сурыныс пічии кіртір. Ағаа хоза, 1941 чылда Хызыл Армияда 6 муң чир-суғӌыбыс служба иртчеткен. Андағ оңдайнаң, Хакасияның оол-хыстары пастағы кӱннең Ада чир-суубыс ӱчӱн турысханнар.
Митингте Хакасия пазы Валентин Коновалов, Ӧӧркі Чӧп кнезі Владимир Штыгашев, Ағбан городтың депутаттар чӧбінің кнезі Альберт Тупикин, Хакасияның чааӌы комиссары Андрей Титов, Ағбандағы епархияның абыстары, кӱс структураларының тоғынӌылары, тынағдағы улус, юнармеецтер, Ағбандағы школаларның ӱгренӌілері араласханнар. Валентин Олегович, чоох тудып, теен:
- 22 июнь - пістің хазнада иң чобағлығ кӱн. Нацист Германиязы хысхаҷах тус аразына Европаның прай даа хазналарын чиңіп алған. Пістің не ӧбекелерібіс тӧдір пазынмааннар. Фашисттерні хырып, совет чааҷылары чир ӱстӱндегі чуртас ӱчӱн харбасханнар.
Оларның сыдамағы, махачызы чоныбыстың сағызында хаҷанға даа халар. Владимир Штыгашевті истерге чӱрексіністіг полған. Владимир Николаевич 1939 чылда тӧреен, хазыр тус аның сағызында хаӌанға даа халған. Ол чоохтаан:
- Піс Илбек Чиңістің ооллары полчабыс. Анзы кӱс хосча, таңдағызына ізеніс пирче. Хакасиядаң фронтха парыбысхан улустың чарымызы ла айланған. Оларның санында полған минің пабам. Ол I группа кинегі пол парған, чаа соонда палығларына сыдабин ӱреен. Чиңіс тутхан чонның тӧлі андағох махачы. Анзын Украинада парчатхан киректер киречілепчелер. Россия чааҷылары Донбасста Ада чир-суубыс ӱчӱн турысчалар. Арығ тыннарын пир салған чир-суғҷыларыбысты піс ундубаспыс.
Чооғының халғанӌызында Владимир Николаевич В.Высоцкийнің «На братских могилах» кибелізінің ӱзігін хығырған. Прайзы чоох тутхан соонда, чаада чуртастарын пир салғаннарны сағысха киріп, пір минута сым турары чарлалған. Чааӌылар сабланызы мемориал тӧзінде турған чааӌылар, автоматтардаң киизер ӱс хати атып, салют иртіргеннер.
Сарыннаң азылған митингті ідӧк сіліг ырнаң тоосханнар. Хакас филармониязының солизі Артур Марлужо-ков «От героев былых времен» сарынны чӱрекке теерте толдырған. Артур Викторович сарнабысханда, митинг араласчылары Успас от хыринзар чахайахтар салғаннар.
Амғы туста Хакасияда Илбек Ада чааның 26 араласчызы чуртапча, 18 кізінің «Ленинград хурчаанда полған чуртағӌы» танығ пар. Ідӧк 18 аға-ууӌа кічігде нацист концлагерьінде, геттода полтыр. Аннаңар искірче Хакасияӌа Россияның Пенсия фондының пӧлии.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде