УСТАҒДАҒЫ ТОҒЫНҶЫЛАРНЫ 25 ЧЫЛ ТИМНЕПЧЕ
29.06.2022
Хабарлар
Хакасия пазы Валентин КОНОВАЛОВ президент программазын тоосханнарнаң
Сыйыхтас. Хакасия правительствозында «Хакасия - регион возможностей» пайрамнығ форум сыйыхтаснаң азылған. Анда президент программазының выпускниктеріне Хакасия пазының паза республиканың экономика тилізі министерствозының алғыстастары читірілген
Ол форум пістің регионда, Россияның чон хониина устағдағы тоғынҷыларны тимнирінче президент программазына 25 чыл толчатханына чарыдылып, 23 - 26 июньда иртірілген.
Пу программача 25 чыл аразына Хакасиядағы предприятие-организацияларға тиксі 350 азыра устағӌы тимнелген. Оларның кӧбізі улуғ предприятиелерде, кӧзідімге, Алёшина заводта, Русалда, Саяналда, «Ағбан» диагностика кінінде, Абаканвагонмашта, Сойан-Сус ГЭС-та, СУЭК-та, Россетиде, ідӧк аал хониинда, республиканың ӱлгӱ паза орындағы пос устаныс органнарында істенче. Президент программазының араласчылары пос киреен, тӧстеп, ӧткін тилітчелер.
Республиказар «Хакасия - регион возможностей» форумға тиксі хазнаның 12 регионынаң араласчылар чыылған. Олар прайзы даа Россияның чон хониина устағдағы тоғынҷыларны тимнир президент программазының араласчылары полчалар.
Устағ киреенде пӧзік профессионализм ӱчӱн паза устағдағы тоғынҷыларны тимнир президент программазына 25 чыл толчатханы хоостыра Хакасия пазы Валентин Коновалов «Производственное строительное монтажное управление» ООО-ның устағҷызы Артём Дукка, идінҷек Алексей Манжулаа, «Ағбан» диагностика кінінің устағҷызы Виталий Новожиловха, «Азых ӱгредіг академиязы» ООО-ның устағҷызы Вячеслав Осиповха, «Вива-Лаб» ООО-ның тӧстегчізі Александр Поздняковха, «Ағбандағы тікчең фабрика» ООО-ның устағҷызы Алла Прощенкаа, «Киасофт» ООО-ның устағҷызы Андрей Фединге паза «Пенопласттар заводы» ООО-ның устағҷызы Михаил Хлоповха Хакасия пазының алғыстастарын пайрамни читірген.
- Піс оой нимес чылларда чуртапчабыс. Андағ даа полза, Россияда паза республикада пос киреене тиліҷең наа оңдайлар азылча. Холлар тӱзірбин, хада-пірге ӧткін тоғынзабыс, экономикада чахсы чидіглерге чидербіс, - таныхтаан Хакасия пазы Валентин Коновалов. - Россияның чон хониина устағдағы тоғынҷыларны тимнир президент программазының пайрамнығ 25 чылынаң паза «Хакасия - регион возможностей» форум азылғанынаң алғыстапчам! Тӱзімніг тоғыс паза турғызылған пӧгіннерні чуртасха киріп аларға алғапчам!
«Устағдағы тоғынҷыларны тимнир хазна программазын тоосханнарның ассоциациязы» региондағы халых пірігізінің тоғызына хозым итчеткені паза президент программазына пайрамнығ 25 чыл толчатханы хоостыра Хакасияның экономика тилізі министрі Виктор Богушевич «Снежный барс» ООО-ның тилісче устағчызы Андрей Гагаркин-Правошинскийге, «Устағдағы тоғынҷылар тимнир хазна программазын тоосханнарның ассоциациязы» региондағы организацияның президенті Алёна Чернявскаяа, республикадағы тиліс фондының устағчы орынҷызы Татьяна Бизюкке, пос киреенең айғасчатхан Святослав Милоновха, идінҷек Ирина Петуховаа, Сибирьнің сервизін паза туризмін тилітчеткен ассоциацияның устағҷызы Иван Кукарцевке, «Муниципальнай лизинг компаниязы» ООО-ның директор орынҷызы Вячеслав Кочелоровха паза «Судинфо» ООО-ның устағҷызына Максим Сузгаевке министерство алғыстастарын читірген.
- Президент программазына пайрамнығ 25 чыл толчатханынаң прайзын алғыстапчам. Хаҷан даа ӧткін тудыныстығ полыңар паза тоғыстарыңны чахсыландырарға кӱстеніңер. Прайзыңар «Хакасия - регион возможностей» форумда араласчатханына ӧрінчем, ізенчем, піс аны пір ле хати нимес, чыл сай иртірербіс. Хазна республикаларының, крайларының паза областьтарының президент программазын тоосхан кізілернің пір чирде чыылысханы регионнар аразындағы палғалысха тузалығ полар. Форумда пілістернең, опытнаң ӱлезерге, киректелчеткен палғалыстар табарға оңдай пирілче паза, партнерлар таап, хада-пірге тоғынып, пос киреен тилідерзер, - чоохтаан Виктор Богушевич.
«Хакасия - регион возможностей» форумда бизнеснең палғалыстығ ағырсымнығ сурығлар ӱзӱрілген, Хакасия предприятиелерінҷе экскурсия оңдайынаң чӧргеннер, ідӧк иң артых бизнес-проекттернің презентациялары ирткеннер, орындағы идінҷектер сығарчатхан ас-тамахты амзап кӧргеннер паза пайрамнығ мероприятиелерде пол килгеннер.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде