РАЗРЕЗТЕР СИДІКСІНІЗІ ХООСТЫРА АЙЛАНЫС
01.07.2022
Хабарлар
Хакасияны Ӧӧркі Чӧп кнезі Владимир ШТЫГАШЕВ
Президиум чыылии. Хакасияның Ӧӧркі Чӧп кнезі Владимир Штыгашев президиум чыылиин иртірген
Пастап Ӧӧркі Чӧп президиумы республиканың закон проекттерін кӧрібіскен. Оларның пipci ӱгредігнең палғалыстығ полған. Чарыда чоохтаза, ӱгретчілернің паза воспитательлернің чал ахчазын оңдайлирынаң. Хакасияның ӱгредіг паза наука министрі Лариса Гимазутинаның искіриинең, закон проекті республика правительствозының муниципальнай школа алнындағы паза тиксі ӱгредіг учреждениелеріне хазна гарантияларын пирӌең нормативтер синін турғызарынӌа полномочиелерін тыыт салар. Амғы туста нормативтер синін алыстырар законнарға алызығлар кирерге киректелче, толдырығлығ ӱлгӱ ол полномочиелерні посха алып аларға кӱстенче, андада республика правительствозының чарадии ла киректелер.
Анзы республика правительствозына муниципальнай олған садтарына паза школаларға пирӌең субвенцияларға алызығларны чапчаң кир турарға оңдай пирер. Закон проекті алыл парза, регионның ӱлгӱлері муниципальнай олған садтарына паза школаларға ахчаны, ол санда чал ахчазын, сала табырах ыс турарлар тіп таныхтаан министр. Ідӧк пу закон ӱгретчілернің паза воспитательлернің чал ахчазын оңдайлирына, окладтарның синін ӧскіреріне хабазар осхас.
Ідӧк мының алнында школалар «аалдағы» паза «городтағы» кӧрімнерге чарылӌаң ползалар, амды оларға «кічіг комплекттіг» паза «кічіг комплекттіглерге чағыннапчатхан» кӧрімнер хозылчаттыр. Анзы ідӧк ас ӱгренӌіліг школалардағы ӱгретчілернің чал ахчазын оңдайлирына хабазар тіп кӧрілче.
Хакасияның ӱгредіг паза наука министрі Лариса Гимазутина пу закон проектін чағынғы сессияда кӧрібізерге сурынған, ӱгретчілер законӌа кӧрілген хоза тӧлеглерні 1 сентябрьдаң ал сығар ӱчӱн. Че президиумдағылар чараспааннар, сессияа ас тус халған сылтаанда. 6 июльдағы сессия, тізең, халғанӌызы. Анаң депутаттар парламент каникулларына парыбызарлар. Андағ оңдайнаң, закон проекті сентябрьдағы сессияда ла кӧрілер.
Чыылығның паза пір ӧӧн сурии хара тас аныпчатханнарнаң палғалыстығ полған. Чарыда чоохтаза, оларның хара тасты тимір чолӌа сығара тарт полбинчатхан сидіксінізінең. Прай кирек санкцияларда - хара тасты кидеркізер тарт полбин сыхханда, амды аны іскер ле тартарға халча. Че мында вагоннар тың чидіспинче осхас. Ағаа хоза, «РЖД» ОАО 1 июньнаң тарифтерін ӧскірібістір, ідӧк хара тас экспортына паза ырахха тартылчатханына тӧбін полған коэффициенттер чох иділтір.
Салтарында разрезтерде хара тас аниры, ирткен чылнаң тиңнестірзе, 6 %-ке тӱс партыр, хара тас таарлиры - 14,8 %-ке. Предприятиелернің кӧбізі тоғынӌыларының чардығын толдыра нимес тоғынӌаң кӱнге кирчеттір. Чал ахчазы, тізең, оларға ідӧк хызырылча. Кирек підӧк парза, отрасль ікі ай пазынаң уғаа сидік оңдайда пол парар осхас - разрезтерге тоғынӌылар санын хызырарға килізер. Хакасиядағы разрезтер, пу кирекче полызығ сурап, республика ӱлгӱлерінзер айланғаннар тіп чоохтаан Ӧӧркі Чӧптің экономика политиказынӌа, промышленностьча, пӱдірігӌе паза транспортча комитедінің кнезі Василий Шулбаев.
Ӧӧркі Чӧп президиумы, хара тас аныпчатханнар республика бюджедінзер ӧӧн ахчаны пирчеткеннернің пірсі полчатханын санға алып, хабазарға чаратхан. Аны хоостыра Россия правительствозы кнезі Михаил Мишустиннің адына Хакасияның Ӧӧркі Чӧбінің айланызы тимнелген.
Премьер-министрнің адына тимнелген айланыста Ӧӧркі Чӧп «Хакасиядағы разрезтерге тимір чол пастыра экспортха тартарына тиң оңдайлар пирердеңер, республиканың хара тас предприятиелеріне (системаны тӧстепчеткен пірігістерге хабазығ пирері хоостыра) субсидиялар пирӌең оңдай кӧр салардаңар» сурыныстарын искірче.
Айланысты пу чағынғы сессияның ӱзӱриине сығарарға чарат салғаннар. Республика депутаттары айланысты чарадыға алыбыссалар, ол пічік Москвазар ызылар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде