ПУ ТОҒЫС ІЗЕНІС ПИРЧЕ
Ӱлӱкӱн. Асхыс аймаандағы Асхыс поселокта Тимірчолҷы кӱніне чарыдылған пайрам алғым таныхталған
Иртеннең сығара орындағы Культура туразының ачығында чон хайынған. Піреезі ас-тамах тимнепчеткен, кем-де аттракционнар турғысчатхан. Олғаннар анзын чидікпин сахтааннар. Ӱлӱкӱнде Асхыс аймааның паза Асхыс поселоктың устағ-пастаа араласхан. Хайди таныхталған мероприятиеде, чир ӱстӱнде кӧп кізі тоғызына хынча, аны иң кирек паза аарластығ итче. Тимір чолда тоғынчатханнарның санында андағлар парох. Транспорт тоғынҷызы хайдағ даа тоғысты толдырчатса, аннаң поездтернің хорғыс чох чӧрізі палғалыстығ полча.
Тимірчолҷыларны алғыстирға Асхыс аймаа пазы Абрек Челтыгмашев паза Асхыс поселок пазы Сергей Энграф сыхханнар.
– Тимір чол поселогобыстың ӧӧн тирии полча. Аның сылтаанда мында тоғыс орыннары пар, хайда чал ахчазы сыбыра тӧлелче. Анзы таңдағы кӱнге ізеніс пирче. Піс прайзыбыс тимір чолның тилізін кӧрчебіс. Амғы туста тимір чолның ікінҷі чолы пӱдірілче, анзы кӧп таарлағ іскер парчатханынаң палғалыстығ. Хазнабыстаң тоғыр санкциялар кирiлгенде, оларның саны илееде ӧс парған. Анзы поселокка улуғ туза ағылча – хоза тоғыс орыннары тӧстелче, – чоохтаан Сергей Михайлович.
Ідӧк тимірчолҷыларны Абрек Челтыгмашев алғыстаан.
– Асхыс аймаа – тимір чол аймаа. Асхыс поселокта 5 муңҷа кізі чуртапча, прайзы даа тимір чолда істенче. Писхамҷыда ідӧк прайзы тимір чолда тоғынча. Тӧӧ пазы поселокта тимір анылча, аны поездтіг тартчалар, – таныхтаан Абрек Васильевич. – Амғы туста тимір чолның наа станциязы пӱдірілче.
Ідӧк тимірчолҷыларға Хакасияның транспорт паза чол хонии министерствозының сыйыхтары читірiлген. Министерствоның Аарластығ пічиинең таныхтатханнарның пiрсi Асхыс посёлок чуртағҷызы Юрий Карачаков полча. Ол тимір чолда 12 чыл тоғын парир. Чол монтёры полып iстенче. Сӧбіре тӧстеенде, Юрий Дмитриевич таңдағы кӱнге ізеніс пирчеткен, чал ахчазы чахсы тӧлелчеткен тоғысты таллап алған. Хызылчардағы тимір чол транспортының техникумын тоосхан. Аның тоғызының ӧӧн пӧгiнi – тимір чолны тӱзедері. Анзы поездтернің хорғыс чох чӧрізінең палғалыстығ. Амды Юрий Дмитриевичтің чолын тун оолғы Альберт узаратча, ідӧк чол монтёры полча.
Асхыс поселокта пайрам кӱн тооза таныхталған. Ӧӧн ӱлӱкӱннең пасха, спорт марығлары ирткен, палаларға ӱтертістіг площадкалар тоғынған.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |