Наа олған площадказы паза арығ суғ полар
Тоғыс чорығы. Хакасия пазы Валентин Коновалов Ағбан пилтiрi паза Пригорск поселоктарзар тоғыс чорығынаң чӧрген
Пастағы тохтағ Ағбан пилтiрiнiң Спортивнай орамазындағы олған площадказында полған. 6 № тураның хыринда палалар ойнаҷаң улуғ орын пар, хайзынзар 6-7 тураның кiчiг чуртағҷылары кил парчалар. Андағы чилеңместер, тағыҷахтар паза даа пасха ниме-ноо хаҷаннаң изел парған. Кӧрiмi дее чоғыл, хорғыс чох полчатханы даа iкiнҷiлестiг. Палалары ӱчӱн сағыссырапчатхан iҷе-пабалар Хакасия пазы Валентин Коноваловсар олған площадказын иптирге полыс пирерге айланған полғаннар.
Хайди чоохтапча Ағбан пилтiрi поселоктың пазы Нина Леонченко, площадканы нааҷылабызар проект тимде. Анда мини-футбол ойнаҷаң чазы пӱдiрiбiзерге чарир, хайда iдӧк тренажерлар орнығар. Улуғ частығларға чыылысчаң иптiг орын тимнеп пирерге паза олған площадказын пӱдiр саларға оңдай пар.
– Сағынған сағысты толдырыбызар ӱчӱн, пiске пис миллион салковай киректелче. Че футбол чазызын санға албаза, ӱсче миллион салковай чит парар, – искiрген Нина Владимировна.
Тоғазығда Хакасия пазы олған площадказын пӱдiрерге хабас пирерiн искiрген. Регион бюджедiнең ағаа 2 миллион салковай позыдылар. Футбол чазызын паза улуғ частығларға одырҷаң, тынанҷаң орыннарны тимнирiне муниципалитет ахча позыдар.
– Хакасияның финанстар министерствозына сiрерге ахча позыдар сурығны табырах пӧгiбiзерге чахығ пир салам. Чайғы тоозыл парир, аннаңар олған площадказының чир тоғыстарын амох ит саларға маңнанарға кирек, – чахығ пирген Валентин Олегович.
Ағбан пилтiрiндегiлер, сағыстары тол парарына ӧрiнiп, айа сапханнар.
Iкiнҷi тохтағ – Пригорск. Пу поселокта пӱӱл наа водопровод тоғынып пастирға кирек. Хакасия правительствозы суғ суриин 2019 чылдаң пӧгiп пастаан. Ӱр ниместе Пригорскты «Арығ cуғ» федеральнай проектке кирерге оңдай полған. 16 километр водопроводты пӱӱл часхызын тартып пастааннар. Пу тусха подряд организациязы 10 километрге чағын траншея тимнеп салған паза 6 хутух турғыс салған. Амды специалисттер трубалар тартчалар. Водопроводты пӱдiрерiне 353 млн салковай кӧрiл парған.
Халғанҷызында регион пазы Пригорск чуртағҷыларынаң тоғасхан. Таныхтирға кирек, Ағбан пилтiрiнде тоғазығ иптiг, амыр ирткен полза, Пригорскта сурығлар илееде полған. Анзы пiлдiстiг, мында муниципалитет пазы, депутаттар нинҷе алысханнар, че сидiксiнiстер iдӧк ле пӧгiлбинчелер. Хайдағ ағырсымнығ сурығларға урунчалар пригорсктағылар? Ӧӧнi – ол чурт-коммунальнай хоных. Поселоктағы кӧп квартиралығ тураларнаң устапчатхан компания позын ээзiне санапчатхан осхас. Тарифтернi позы кӧдiрче, саайлар пол парза, полыспинча, тоғынҷылары даа чоғыл осхас паза даа пасхазы. Че ахча чыырын, тiзең, ундутпинча. Орындағылар, ӧӧнiнде улуғ частығлар, кӧп ахча чыыл парарынаң чочынып, ай сай тӧлепчелер. Че пу компаниянаң чӧптезiгнi тохтат полбинчалар, аннаңар оларға юридическай чӧптезiг кирек.
– Тураларның ээзi сiрер, чуртағҷылар, полчазар, аннаңар хайдағ компаниянаң тоғынарын постарың таллирға кирексер. Амғы компаниянаң чӧптезiгнi тохтадарға пiс сiрерге полыс пирербiс, – ӧрiндiрген пригорсктағыларны Хакасия пазы. ЖКХ сурығларынаң пасха, поселокка аптека, участковай, чахсы чоллар кирек.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |