«ЭТНОВА» ЧИИТТЕРНI ЧЫҒДЫ
Форум. 26 – 28 августта Алтай аймаандағы «Беркут» олған лагерьiнде «Этнова-2022. Теплая Сибирь» чииттернiң регионнар аразындағы этно-туризм форумы ирткен
Пу форумны оол-хыстар нинҷе-де чыл сахтааннар. Коронавирус пандемиязы ӱчӱн ол нинҷе-де чыл онлайн ирткен. Пӱӱл анда алты ӱгредiг площадказы тоғынған: «Пос кирее», «Педагогика», «Добровольчество», «Медиа», «Креативные индустрии» паза «Алтай аймааның чииттерi». Таныхтирға кирек, халғанҷы площадказы пастағызын на кирiлдi, анда пу муниципалитеттiң оол-хыстары араласхан.
18 – 35 частығ студенттер, чиит ученайлар, тоғынчатхан оол-хыстар, идiнҷектер, халыхчылар паза даа пасхазы Россияның аймах регионнарынаң килген спикерлернiң лекцияларын искеннер, хайзылары пӧзiк пiлiстiглер паза улуғ опыттығлар.
Че иң пастап чииттерге Хакасия пазы Валентин Коноваловнаң, тоғазып, чоох алызып алар оңдай полған. Ирткен субботада Валентин Олегович «Беркут» олған лагерьiнде пол килген. –
Амғы алысхах туста хазнаа чииттернiң наа кӱстерi, кӧрiстерi, сағыстары кирек. Аннаңар форумда проекттер, чарых сағыстар тӧрирiне iзенербiс, – айланған чииттерзер Хакасия пазы.
Хайдағ сурығлар пиргеннер оол-хыстар Валентин Коноваловха? Тоғазығ пiр час артиинаң ирткен. Пу тусха ол 20 азыра сурыға паза сурынысха нандырығ пирген. «Креативные индустрии» площадканың чиит араласчызы Арина Валентин Коноваловтаң сурған:
– Пiстiң правительство чииттернiң проекттерiн чуртасха кирерге хайди хабазар?
– Республика чииттерiнiң проекттерiн чуртасха киреріне гранттар пирiлче. Килчеткен чылда пiс ахчалығ хабазығны iкi хати кӧдiрібізерге чарадығ алғабыс. Аннаңар иң чахсы проекттерге хабазығ полар, – нандырған Хакасия пазы Валентин Коновалов.
– Ортын профессиональнай ӱгредiг организацияларының студенттерiне cтипендия синi кӧдiрілер бе?
Пу сурыға Хакасияның ӱгредiг паза наука министрiнiң орынҷызы Юлия Ворошилова нандырған. Хайди ол таныхтаан, стипендия студенттерге хозылар, че нинҷе салковайға, анзы ам даа пiлдiстiг нимес.
«Креативные индустрии» площадканың араласчызы Никита килчеткен чылда нанҷыларынаң хада Хакасияда электроннай музыкаҷа фестиваль иртiрерге пӧгiнче, че ағаа Хакасия правительствозының хабазии киректелче.
– Хайдағ даа сағысты толдырып аларға чарир, неке. Ӧӧнi – хайди аны иртiрерге. Пiске пiлерге кирек: хайда, хайди паза ортымахти нинҷе кiзi анда аралазар. Фестиваль иртiрерге полыс пирербiс, че хайди ирт парары ӱчӱн ідӧк сiрер нандырығлығзар, – таныхтаан регион пазы.
Ағбанның чиит ӱгретчiзi Ксения иң ағырсымнығ сурығларның пiрсiн кӧдiрген. Ол – ӱгретчiлерге хабазары.
– Школазар наа ла килген чиит специалисттерге чахсы хабазығ пирiлче. Че соонаң ол чох пол парча, анаң олар школадаң парғлап сыхчалар. Салтарында школаларда ӱгретчiлер чидiспинче, халғаннарына улам кӧп тоғыс артылча. Чиит ӱгретчiлерге, имҷiлерге чiли, чуртнаң хабас пирерге оңдай пар ба?
– Я, пу чылдаң пасти пiс имҷiлерге чурт пирер программаны чуртасха кирiп пастабысхабыс. Килчеткен чылларда пу программаны пiс ӱгретчiлер аразында тарадарға пӧгiнчебiс, – нандырған Хакасия пазы.
Ідӧк чииттерге гранттар марығларын иртiрерi, волонтерстваа хабазары, ӧкiстерге чурт сертификаттарын пирерi паза даа пасха сурығлар пирілген.
Тиксi алза, чоохтазығ чылығ паза тузалығ ирт парған. Халғанҷызында форум араласчылары Хакасия пазы Валентин Коноваловнаң сомға суурынып алғаннар.
«Этнова» форумда iдӧк улуғ аалҷы «Россия – страна возможностей» президент платформазының экспертi Алексей Вахитов полған. Ол Хакасия чииттерiне платформаның проекттерiнеңер паза марығларынаңар чарыт пирген.
– «Россия – страна возможностей» президент платформазы чииттерге постарының чайаачы оңдайларын, кӱстерiн азып алар оңдай пирче. Хайда даа чуртапчатхан, тоғынчатхан, хайдағ даа сӧбiреде ӧскен кiзi позын тилiдерге кирек, – таныхтаан эксперт Алексей Вахитов.
Федеральнай спикерлернiң аразында iдӧк «Волонтеры Победы» тиксi Россияның халых чӧрiмi директорының орынҷызы Анжелика Жалилова-Макаренко, «Мы – Россияне» Россия чоннары ассамблеязының кiзiзi Альмира Кармышакова паза даа пасхазын таныхтирға кирек. Форумның аалҷылары республиканың чииттерiне лекциялар хығырғаннар, проекттернi тилiдерге ӱгреткеннер.
Форумның ӧӧн чардығы – ол проекттер тӧстирi.
– Мында пiс чииттернi проекттер пазарға ӱгреткебiс, смета ниме полчатханын чарытхабыс, грант ахчазынаң орта тузаланарға паза хайди сан пирiс идерге чоохтаабыс, – искiрген «Алтай аймааның чииттерi» площадканың устағҷызы Анастасия Матерова.
Иң артых проектке ахчалығ хабазығ полар паза ол чуртасха кирiлер. Таныхтирға кирек, форумда алынҷа хайығ салылған социальнай кӧстеглiг проекттерге.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |