ХОЙБАЛДА – НАА ХОККЕЙ АЧЫҒЫ
Аал чӧптерiнiң тоғызы. Пу неделяда Алтай аймаандағы Хойбал аалда хоккей ачығын пайрамни асханнар
Халғанҷы ӱс неделя аразына Алтай аймаанда спорт пӱдіріглері хозыл парғаннар. 28 октябрьда Очыр аалда мини-футбол чазызы тимге сыххан, 2 ноябрьда Аршаннарда стадион, 8 ноябрьда, тізең, Хойбалда хоккей ачығы пайрамни азылғаннар. Пастағы объектнең Хакасияның физическай культура паза спорт министерствозы полыс пиртiр. Аршаннардағы стадионға хара тас аныҷаң разрезтер ахча позытханнар. Хоккей ачығы – Хубачардағы аал чӧбінің проекті. Аны орындағы устағ-пастағ, республиканың национальнай паза территориальнай политика министерствозының «Чонға кирек иң артых проект» мариинда аралазып, чуртасха кирген.
Хоккей ачығын азарында национальнай паза территориальнай политика министрінің пастағы орынҷызы Наталья Салата, Алтай аймааның пазы Ирина Войнова, Хубачардағы аал чӧбінің пазы Александр Мин Те Хо, орындағы чуртағҷылар, школа ӱгренҷілері араласханнар. Пастап сӧс пирілген Ирина Войноваа. Ирина Ивановна, чоох тудып, таныхтаан:
– Александр Владимирович хойбалдағыларға истіг чуртас оңдайларын тӧстирге кӱстенче. Олғаннарға, хоккей ойнап, чиңістер тударға алғапчам.
Наталья Салата аймах пазының сӧстерінең чарасхан. Наталья Николаевнаның чооғынаң, Хубачардағы аал чӧбі, министерствоның марығларында аралазып, хысхаҷах тус аразына Хойбалда ӱс cпорт пӱдіриин тимге сығар салған: футбол чазызын, тренажерлар паза хоккей ачыхтарын. Прай объекттер тузаланыста. Чон оларда ӱзілбинче.
Амғы туста Хойбалда 900 артиинаң кізі чуртапчаттыр. Орындағы школада ниик атлетикаҷа, футболҷа, волейболҷа паза спорт кӱрезінҷе секциялар тоғынчалар. Пастағы ӱс cекциянаң физкультура ӱгретчізі Тельман Назаров устапча. 27 частығ специалист прай кӧңнін cалып тоғынча. Аның кӱстенізін кӧріп, Александр Мин Те Хо аалда спорт объекттері хайди даа кирек тіп cизінтір. Итсе-де, алында Хойбалда хоккей ачығы полған, че ол изел парған. Пӱӱл ачыхты наазынаң пӱдіргеннер. Тоғыстарны «Агростройсервис» ООО толдырған. Спорт объекті футбол чазызы хыринда орныхча. Аны пӱдіреріне 1,8 миллион салковай парыбыстыр. 850 муң салковайны аал чӧбі марығ хоостыра киріп алған, 800 муң салковай – муниципалитеттің хорадығлары. Алтай аймааның бюджедінең 50 муң салковай позыдылған, 100 муңны спонсорлар пиргеннер.
Хоккей ачығы декабрьда тоғынарға пастир. Ол тусха объектте чарытхы тартыбызарлар паза видеокамералар турғыс саларлар. Хоза хорадығларны аал чӧбі позына алча.
Пӱӱл «Чонға кирек иң артых проект» марыға республика бюджедінең 20 миллион салковай пирілген. 2023 чылда Хакасия правительствозы 36 миллион салковай позыдарға пӧгінче. Хайди таныхтаан Ирина Войнова, марығда Алтай аймааның прай аал чӧптері аралазарлар, муниципалитетте наа объекттер саны хозылар.
Пайрам тузында орындағы чуртағҷылар сағыстарынаң ӱлескеннер. Пасталығ класстар ӱгретчізі Лариса Чертыкова Хойбалда 1981 чылдаң чуртап парир. Ол мында ӧскен. Лариса Анатольевна чоохтаан:
– Александр Владимирович Мин Те Хоға улуғ алғызым читірчем. Ол пістің аал ӧңнензін тіп матап кӱстенче. Халғанҷы чылларға чуртағҷылар даа, ӱгренҷілер дее саны хозыл парған. Піс Хойбалда чуртапчатханыбысха поғдархапчабыс.
Изабелла Янгуловаа 8 час, ол 2-ҷі класста ӱгренче. Оларның сӧбірезінде тӧрт пала, ол иң очызы. Аҷалары Илья паза Владислав спортнаң айғасчаттырлар. Хоккей ачығы хызыҷахтың кӧңніне кіртiр, Изабелла пеер хысхызын хайди даа кил турарбын теен.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |