САБЛЫҒ ӰГРЕТЧІ ШКОЛАНЫ УНДУБАҶАҢ
Піске пасчалар. Кӱскӱзiн пiстiң Асхыс аймаандағы Ис пилтiрiндегi школада чапсых тоғазығ ирткен. Школазар Маргарита Кирилловна Воронинаны ааллап хығырып алғабыс
Маргарита Кирилловна саблығ ӱгретчi, поэт Кирилл Кильчичаковтың хызы полча. Кӧбiзi Кирилл Георгиевичтi «Чирiм хустары» сарын пастыра таныпча.
Тоғазығда 9-ҷы класстың ӱгренҷiзi Марат Чебодаев поэттiң чуртас чолынаң таныстырған. Кирилл Георгиевич 1924 чылда Асхыс аймаандағы Тӧӧ суғ хазындағы Халын аалда (амды пу аал чоғыл) тӧреен. Iҷе-пабазы сигiс пала ӧскiрген. Сӧбiре улуғ паза кӱлӱк полған. Колхоз тузында ызыға ыстырғаннар. Аар чыллар полған ол туста. 1934 чылда олар нандыра Хакас чирiнзер айланчалар. Кирилл Кильчичаков Чул пилтiрiндегi школада ӱгренiп пастаан. Чахсы ӱгренҷең. 1938 чылда Ағбандағы ӱгретчiлер училищезінзер ӱгренерге кiрiп алча.
1941 чылда чаа пасталыбысхан. Ағбандағы педучилище госпиталь пол парған. 1942 чылда Кириллге 18 час толған. Аны чааға апарыбысчалар. Чааның хатығ чолларынҷа чӧрерге килiскен, че 1943 чылда Ржев город хыринда Кирилл Георгиевич пудынаң палығлат салған. Хайдағ ла госпитальларда ағаа чадарға килiспеен. Хакасиязар Кирилл Георгиевич 1946 чылда ла айланған. Хатап педучилищезер ӱгренерге кiрче, аны iкi чылға тоозыбысча. Анаң Ағбанда ӱгретчiлер институдынзар ӱгренерге кiрiбiскен. 1954 чылда, аны тоозып, Ис пилтiрiндегi школазар тоғынарға килче.
1954 чылдаң 1984 чылға теере мында тоғынча. Нинҷе пар хыйғазын палаларға пирче. Ол школада 30 чыл азыра тоғын салған. Ипчiзi Варвара Антиповна iдӧк пу школада 40 чылға чағын тоғын салған. Чон аразына ӱс пала кир салғаннар.
Марат Чебодаев аның тахпағын толдыр пирген. Адалча ол «Школаның пайрамы».
Кирилл Георгиевич, тынағда даа полза, пiстiң школаны ундубаҷаң. Удаа пiссер тоғазығларға килҷең, позының cағыстарынаң ӱлесчең. Пiстi хыйға, махачы поларға паза Чир-суубысха хынарға, хайраллирға ӱгретчең. Ол пiстiң cағызыбыста хаҷанға даа саблығ ӱгретчi, поэт паза чааҷы полып халар.
Тоғазығ Ис пилтiрiндегi школаның музейiнде ирткен. Аннаң устапча тыс пiлбес ӱгретчi Ольга Викторовна Губанова. Пӱӱл кiчiг хырлас айында Ис пилтiрi аалдағы ортымах школаа 135 чыл толған. Школа ӧмезi аны улуғ хырлас айының 2-ҷi кӱнiнде таныхтир. Школа 1887 чылда азылған. Нинҷе муң ӱгренҷi пу школаның иркiнiн алтаан полар ни? Пайрамға пiстiң школада тоғынған ӱгретчiлернi паза аны тоосхан ӱгренҷiлернi хығырчабыс.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |