МАРЫҒНЫҢ ЧИҢIСЧIЛЕРI
21.12.2022
Статья
Аарлығ олғаннар, пӱӱл пiстiң хынған «Хакас чирi» газетабысха 95 чыл толды. Часхызын, аның пайрамнығ чылына чарыдылып, иң кiчiг хығырығҷылар аразында «Хакас чирi – минiң чир-суум» хоостар марии чарлалған. Чыл тоозылчатса, пiс марығның салтарларын идерге сӧс пиргебiс. Сыйыхтар читiрҷең тус читтi. Чоохтирға кирек, прай хоостар чахсы. Аннаңар марығның чиңiсчiзiн табарға оой полбаан. Че прайзы чиңiсчi пол полбас. Аннаңар редакцияда ӧнетiн жюри тӧстелiп, иң артых хоостар табылған. Чиңiсчiлерге «Хакас чирi» газетаның адынаң алғыстас пiчiктерiн паза тадылығ конфеттiг хабыҷах читiргебiс.
Пастағы орын Асхыс аймаандағы Пӱктiг аалда чуртапчатхан Мия Тюмерекованың «Арығда пабам газета хығырча» хоозына пирiлген. Мияа сыйыхтар читiрер ӱчӱн, Пӱктiгдегi пасталығ школазар парғабыс. Ачых-чарых кӧңнiлiг хызыҷах, пiстi кӧр салып, пастап хахап парған. Тӱрче туртуххан, анаң хаҷанох таныс кiзiнең чiли чоохтасхан.
– Мин аймах киректернең айғазарға хынчам, iҷемнең хада тадылығ халастар итчебiс. Кекстер уғаа татхыннығ килiс парчалар, оларны чиирге прай сӧбiренең хынчабыс. Iдӧк чир-чайаанны хоостирға хынадырбын, аннаңар, ӱгретчi марығдаңар чоохтаанда, аралазарға чаратхам. Марығ кӧңнiме кiрген, чиңiсчi полыбысханына ӧрiнчем, мыннаң мындар хоостарымны «Ноға-ноғаҷахтарзар» ыс турарбын.
Iдӧк пу чағында мағаа Соох апсахтаң сыйых читiрiлер. Пiс iҷемнең хада ағаа пiчiк пас пиргебic. Ол чыл ибiре посты чахсы тудынған палаҷахтарға сыйых итче. Мин,тiзең, iҷе-пабамның чооғын искем, аннаңар iҷем мағаа сыйых полар теен, – ӱлескен ӧрiнiзiнең ачых-чарых Мия.
Iкiнҷi орын алған чиңiсчi – Пӱктiг аалдағы пасталығ класстар ӱгренҷiзi Карина Чебодаева. «Почта килдi» хоозында Асхыс аймааның танығлығ орнында олғаннар «Ноға-ноғаҷахтарны» хығырчатханын кӧзiт салған. Ус холлығ Карина хоостирға, пластилиннең аймах ниме-нооҷахтар идерге хынча.
– Марығда аралазарға кӧңнiме кiрген. Позымның паза арғыстарымның хоостарын «Ноға-ноғаҷахтарда» кӧр салғанда, ӧрiн парғам. Мындағ тадылығ сыйых читiргенде, кӧңнiм уламох чалахай полыбысхан, – чоохтаан Карина.
Ӱзiнҷi орынға Ағбандағы «Дашенька» олған садынзар чӧрчеткен Иван Трубинов турысхан. Аның «Хакас чирiм» хоозы чарых ӧңнернең хайхатхан. Килчеткен чылда ол школаа парар. Аннаңар хығырарға ӱгренiп алған. Сағам, тiзең, Наа чылны чидiкпин сахтапча. Iҷе-пабазының чооғын чахсы искен ӱчӱн, Соох апсах Иванға iкi дее сыйых читiрер осхас.
– Наа чылға най хынчам. Пiс пастағызын Путиннiң чооғын исчебiс, анаң пайрамнығ стол кистiнде азыранчабыс.
Пӱӱл мағаа Соох апсах олған садында «Гуджитсу» ойнаҷахты сыйлап пирер, ибде – «LЕGО», – теен Иван.
Наа чыл алнында сыйыхтар читiрчеткенде, олғаннар Соох апсахтаңар чоохтааннар. Сизiнгенде, марығның чиңiсчiлерi прайзы хоостирға хынча. Аннаңар даа оларның тоғыстары сыйыхтығ орыннар алған поларлар.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде