ЮРИСТ ПОЛЫЗИИН – ТИККЕ
19.05.2023
Хабарлар
Чонға хабазығ. Россияның юстиция министерствозының Хакасияҷа устаа чуртағҷыларға юрист полызиин тикке пирер оңдайлардаңар искірче
Полызығны тикке пирчеткен ведомстволар:
– Хакасияның Адвокаттар палатазы (Ағбан г., Чертыгашевтің ор., 63 А, 4 хадыл, 1№ каб., тел.: 8(3902)226-673, +7-923-330-0019, e-mail: advrh@yandex.ru);
– Хакасияның Нотариустар палатазы (Ағбан г., Боградтың ор., 135, 41Н пом., тел.: 8(3902)287-151, e-mail: notrh@mail.ru);
– Хакасиядағы кізі праволарынҷа уполномоченнай (Ағбан г., Щетинкиннің ор., 18, тел.: 8(3902)223-440, 222-510, e-mail:upch@r-19.ru);
– Хакасиядағы пала праволарынҷа уполномоченнай (Ағбан г., Пушкиннің ор., 42, 18 Н пом., тел.: 8(3902)24-80-28, e-mail: rhdeti@r-19.ru);
– ХГУ-ның тархын паза право институдының Юрист клиниказы (Ағбан г., Лениннің ор., 92/1, 319 каб., тел.: 8-961-898-89-94, e-mail: k.v.a.1988@mail.ru);
– Россияның юстиция министерствозының Хакасияҷа управлениезі (Ағбан г., Кировтың ор., 100, 700 каб., тел.: 8(3902)24-81-75 (хоза 5), e-mail: ru19@minjust.gov.ru).
Юрист полызиин тикке пирер оңдайлар
Федеральнай толдырығлығ ӱлгӱ органнарының орыннардағы органнары паза оларның хайииндағы учреждениелер, Хакас Республиканың толдырығлығ ӱлгӱ органнары паза оларның хайииндағы учреждениелер, бюджеттегі нимес хазна фондтарының устағ органнары, кізілер тоғызына теелчеткен сурығларҷа чӧптерні чоохтап алай пазып, юрист полызиин тикке пирчелер.
Хакас Республиканың толдырығлығ ӱлгӱ органнары паза оларның хайииндағы учреждениелер социальнай хабазығ кирексіпчеткен кізілерге юрист полызиин тикке пирчелер. Іди олар право пічіктерін тимнеп пирчелер паза кізінің сидіксіністері ӱчӱн чарғыларда, хазна паза муниципальнай органнарда, организацияларда турысчалар.
Юрист полызиин тикке ал полар праволығлар:
1) кізілер, хайзыларының сӧбірезіндегі полған на кізінің ортымах парызы регионда турғызылған чуртап парыбысчаң иң асхынах синнең тӧбін алай чалғызан чуртапчатхан кізілер, хайзыларының парызы чуртап парыбысчаң иң асхынах синнең тӧбін полча;
2) І, ІІ группаның кинектері;
3) Илбек Ада чаа ветераннары, Россияның Матырлары, Cовет Союзының Матырлары, Социалистическай Істеніс Матырлары;
4) кинек палалар, ӧкіс палалар, паба-іҷе хайии чох халған палалар, ӧкіс палалар санынаң паза паба-іҷе хайии чох халған палалар санынаң сыххан кізілер, ідӧк оларның законнаң кӧріл парған кізілері, олар андағ палаларның праволарын паза кирексіністерін арачылир сурығларҷа юрист полызиин тикке аларға айланчатсалар;
4.1) паба-іҷе хайии чох халған паланы позының сӧбірезінзер ӧскірерге алып аларға сағынчатхан кізілер, олар паланы сӧбірезер ӧскірерге аларынаң палғалыстығ сурығларҷа юрист полызиин тикке аларға айланчатсалар;
4.2) пала идінген кізілер, олар идінген палаларның праволарын паза кирексіністерін арачылир сурығларҷа юрист полызиин тикке аларға айланчатсалар;
5) социальнай полызығларны социальнай организацияларда чуртап алчатхан улуғ частығ кізілер паза кинектер;
6) сайбағларға тартылчатхан чазы читкелектернең профилактика тоғызын апарчатхан система учреждениелерінде тудылчатхан чазы читкелектер паза колонияда хатығлас иртірчеткен чазы читкелектер, ідӧк оларның законнаң кӧрілген кізілері, олар андағ чазы читкелектернің праволарын паза кирексіністерін арачылир сурығларҷа юрист полызиин тикке аларға айланчатсалар (уголовнай чарғы производствозында юрист полызиин пирерінең палғалыстығ сурығлардаң пасхазында);
7) «О психиатрической помощи и гарантиях прав граждан при её оказании» Россия Федерациязының законы хоостыра юрист полызиин тикке алар праволығ кізілер;
8) постарына сыданминчатханға (недееспособные) чарғы санаан кізілер, ідӧк оларның законнаң кӧрілген кізілері, олар кізілернің праволарын паза кирексіністерін арачылирынаң палғалыстығ сурығларҷа юрист полызиин тикке аларға айланчатсалар;
8.1) сағыбаан саайда хыйаланған кізілер:
а) сағыбаан саайда ӱреен хада хонғанының ирі (ипчізі);
б) сағыбаан саайда ӱрееннің палалары;
в) сағыбаан саайда ӱреен кізінің паба-іҷезі;
г) сағыбаан саайда ӱреен кізі ӧскірген, кӧрген кізілер алай аннаң полызығ ал турған кізілер, хайзы оларның ӧӧн парызы полған, ідӧк иждивенецке закон хоостыра саналчатхан пасха даа кізілер;
д) сағыбаан саайларда хазиина ӱрег иділген кізілер;
е) сағыбаан саай сылтаанда чуртын прай алай ис-пайының чардығын, алай пічіктерін чідір салған кізілер;
9) федеральнай законнар алай Россия субъекттерінің законнары хоостыра юрист полызиин тикке алар право пирілчеткен пасха даа кізілер.
Хакасия законынаң пу списокка хоза киріл парғаннар:
1) ахталған кізілер паза политика репрессияларынаң хыйаланған кізілер;
2) ІІІ группа кинектері;
3) Хакасияда чуртапчатхан ас саннығ чоннар, ідӧк ас саннығ чоннарға кірбинчеткен , че оларнаң хада тӧреміл чуртапчатхан, оларох чіли прай тоғыстар апарчатхан кізілер;
4) кӧп палалығ паба-іҷелер паза толдыра нимес сӧбірелерде 14 часха читіре ӧcкірчеткен паба-іҷелер;
5) чуртаста сидіксініске кір парған кізілер;
6) істеніc чӧптезиинҷе тоғынып, алымнар, пособиелер, чал ахчазын тӧлирге хысчатхан кізілер – банкротстводаңар кирек кӧрілчеткен туста;
7) чааҷы службазын толдырчадып, ӱреен чааҷыларның сӧбірезіндегі кізілер, чазы читкелектер, 18 часха читкелекке кинек пол парған палалар, очнай оңдайнаң ӱгренчеткен 23 часха читкелек палалар;
8) харибдең сыххан кізілер, позыдылған кӱннең 6 айға теере;
9) Хакасияда чуртапчатхан, Россияның Тирігліг кӱстерінзер мобилизацияа хығыртылған паза анда чааҷы службазын иртчеткен кізілер, чазы читкелектер, 18 часха читкелекке кинек пол парған 18 частаң ас парған палалары, очнай оңдайнаң ӱгренчеткен 23 часха читкелек палалары;
10) Хакасияда чуртапчатхан, пос кӧңнінең чааҷы службазына контракт идіп алған (доброволецтер), ӧнетін чаа операциязында араласчатхан (араласхан) чааҷылар, оларның сӧбірелері, паба-іҷелері, чазы читкелек палалары, 18 часха читкелекке кинек пол парған 18 частаң ас парған палалары, очнай оңдайнаң ӱгренчеткен 23 часха читкелек палалары.
Хакасияның законы хоостыра, Украинадаң Россиязар тис киліп, Хакасияда тохтабысхан кізілерге паза оларның сӧбірелеріне, олар Россияда ӱр нимес чуртирға чарадығ алар сурығларҷа айланчатсалар, ідӧк юрист полызии тикке пирілче.
Автор :
Тимнеен Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде