«СПОРТ ПЯТНИЦАЗЫ» ЧОННЫ ЧЫЫПЧА
31.05.2023
Хабарлар
Хызыҷахтар Милана ШАВНИНАНЫ ӧӧр тастирға тимненчелер
Тынағ. 26 майда «Спорт пятницазы-2023» проект хоостыра пастағы мастер-класстар иртірілді
Хакасияның физическай культура паза спорт министерствозының проекттері илееде: «Хакасияны піліп ал», «Суғҷа чӱзері – прайзына», «Хакасияның спорттағы узах чуртас» паза пасхазы. Олардаң иң танығлығ «Спорт пятницазы» полча тізе, cаба полбас, неке. Проектті ведомство пылтыр чуртасха кирерге пастаан. Чайғы тооза Ағбанның тынағ паркында чуртағҷыларға тренировкалар, мастер-класстар тикке иртірілген. Ӧткін тынаға хынчатхан улус «Спорт пятницазына» пӧзік паалағ пирген. Анзын саннар киречілепче. 27 майдаң 2 сентябрьға теере паркта 30 спорт кӧрімінҷе тренировкалар иртірілтір, проектте 3 муң артиинаң кізі аралазарға маңнантыр.
Пӱӱл спорт чӧрімі узарадылды. Ирткен пятницада чир-спортча, астыхпин чӧрерінҷе (спортивное ориентирование) паза аар атлетикаҷа мастер-класстар полғаннар. Мероприятиені Хакасияның спорт министрінің орынҷызы Елена Краснова асхан. Чоох тудып, Елена Дмитриевна теен:
– Пу проект ӧӧнінде олғаннарға кӧріл парған. Тренировкаларны иртіріп, оларны хазых чуртасха тартарға кӱстенчебіс. Палаларға чайғы тузы тӱзімніг иртсін. Ӱс ай аразына чахсы тынанып алзыннар. Пятница сай прайзын тынағ паркында сағыпчабыс. Проектте ӧткін араласчатхан федерацияларға улуғ алғызым читірчем.
Чоохтирға кирек, пылтыр спорт ачығы пастағы тахта хыринда орныххан полза, пӱӱл тренировкаларны скейт-паркта иртірерге чаратханнар. Cӧрӧн кӱн полғаннаңар, 2023 чылның пастағы спорт пятницазына чон чахсы чыылыспаан. Итсе, чир-cпортнаң айғасчатхан хызыҷахтар кізілернің кӧңнін матап кӧдіргеннер. Пу спорт кӧрімінде 24 дисциплина. Чиит спортсменнер чирлидинг-стантнаң таныстырғаннар. Стантта ікі-ӱс cпортсмен, алтында турып, пір кізіні ӧӧр кӧдірерге, тастирға, анаң тударға киректер. Ӱстӱндегізіне кииде айланыбызарға, сальто идібізерге маңнанарға киректелче. Мастер-класста араласхан хызыҷахтар – тренер Виктория Толстопятованың ӱгренҷілері. Виктория Олеговна Хакасияда чир-спорттың пастағҷызы полча. Аның кӱстенізінең олғаннар аймах-пасха синде иртчеткен марығларда чиңіc тутчалар. Кӧзідімге, пӱӱл майда саарбахтар Анастасия Шишпанованаң Мария Кононцева Россия первенствозында алтын медаль холға киргеннер. Проектсер айланза, чирлидинг-стант соонда спортсменнер зарядка иртіргеннер.
Олох туста астыхпин чӧрерінҷе ачых тоғын сыххан. Аннаң устаан Россияның спорт узы Елена Гетт. Пу дисциплинада спортсмен чӱгӱрік паза чітіг сағыстығ поларға кирек, тиктең нимес астыхпин чӧрерін шахматха тӧӧйлепчелер. Федерациядағылар араласчыларға лабиринт тимнеп салғаннар. Аны саарбахтар спорт картазы полызиинаң ирткеннер.
Аар атлетиканы «тимір» кізілернің ойыннары тіп адапчалар. Спорт федерациязынаң Тӧӧ пазында орныхчатхан «Алатау» предприятиенің директоры Юрий Соколов устапча. Сизінгенде, Юрий Владимирович пу спорт кӧрімінеңер таң асханҷа чоохтазарға тимде. Пӱӱнгі кӱнде Хакасияда аар атлетиканаң 300-че кізі айғасчаттыр. Ікі секция Ағбанда пар, пірер – Харатаста, Полтах аалда, Таштыпта. Спорт кініне Копьев поселокты адирға чарир. Анда СССР-ның спорт узы, Хакасияның физическай культураҷа паза спортча саблығ тоғынҷызы Геннадий Свистельников кӧп чыл маңнаныстығ істенче. Хубачардағылар ідӧк аар атлетикаа хынчаттырлар. Алтай аймааның кінінде секция ікінҷі чылы тоғын парир. Саблығ штангист Павел Арчимаев полча. Чир-суғҷыбыс Харатастаң. 1995 чылда спортсмен чииттер аразында ирткен Европа чемпионадында чиңіс тутхан. Халғанҷы туста Хакасиядағы аар атлетикада киректер хомай нимес парча. Пістің штангисттер Россия, Сибирь синінде иртчеткен марығларда тӧреміл сыйыхтығ орынға сыхчалар.
Спортсменнер мастер-классты скейт-паркында нимес, тренажерлар ачығында иртіргеннер. Олғаннарға кӧрілген штанга чапсытхан. Аның дисктері пластмассадаң иділтір. Иң пастап тренерлер спортсменні штанганы орта кӧдірерге ӱгретчелер. Паланың кӱзі хозыл парза, грифке тимір дисктер хаптырчалар.
Пу неделя спорт мероприятиелеріне пай полар. 1 июньда Ағбанның тынағ паркында «Чииттер кӱзі» тасхархы спорттың фестивальы иртер. Олғаннарға паза чииттерге улуғ программа тимнел парған. Андар кірчелер гиря кӧдірері, джампинг-фест, скейтбординг, хапчаң тас, футбол фристайлы, стритбол, брейкинг паза пасхазы. Пайрам 16.45 часта пасталар. 2 июньда, тізең, чир-спортнаң айғасчатханнар хығырчалар. «Спорт пятницазы» проект хоостыра олар «Jungle Fеst» фестиваль иртірерлер. Аның тузында чыылған чон прай дисциплиналарнаң танызып алар. Кӧрігҷілерні ідӧк чир-марафон сағыпча. Федерацияның устағ-пастаа иң ӧткін араласчыларға сыйыхтар читірер. Пасталғаны 17.00 часта.
Сом Евгения Майнагашевани
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде