Кибелістер
11.06.2015
Статья
Чирім хустары айланды
Чикпек таныҷах, сабылып,
Чирім ӱстӱн сыйбап тур.
Чирім хустары, айланып,
Кӧг-сарынын салып тур.
Кӧріңер, прайзыңар,
Ағын хустар учух тур.
Чир-суғларына айланып,
Ибіркізін чазап тур.
Ӧрініс толча чӱрекке,
Ах сағыстар тӧріп тур.
Чирім минің кӧглепче,
Хустары пӧзік учух тур.
Чикпек таныҷах, сабылып,
Чирім ӱстӱн сыйбап тур.
Чирім хустары, айланып,
Кӧг-сарынын салып тур.
Кӧріңер, прайзыңар,
Ағын хустар учух тур.
Чир-суғларына айланып,
Ибіркізін чазап тур.
Ӧрініс толча чӱрекке,
Ах сағыстар тӧріп тур.
Чирім минің кӧглепче,
Хустары пӧзік учух тур.
Ағас пазында, одырып,
Кӧӧң чайып син турзың.
Ырла, торғайах, син ырла,
Часка-ырыс ағыл мағаа.
Хатығ чӱреемні хайылдыр
Сіліг ырыңның кӱзінең,
Паар сыстазын син тохтат
Хыныс сарынынаң син пазох.
Хыныстаңар син чоохтадах,
Ниме полҷаңдыр ол андағ?
Хынарға оой алай чох?
Чоохтап пирдек, хузыҷах.
Исчем мин удаа улуғлардаң
Хыныстаңар даа кӧп ниме.
А син чи, торғай хузыҷах,
Ниме сӧлирзің мағаа?
Че син кӧӧң не чайчазың,
Чӱреемні пазох сыстадып,
Кӧрізіңнең тилекейні ибіріп,
Суриима хайхап одырзың.
Хайдағ сурығ пирче пу тіп,
Оңар полбинча одырзың.
Хыныс нимезін піл полбин,
Ирееленче тіп, таңнапчазың.
Хой порчозы
Хой порчозы алҷасча,
Чӱректерің азыңар.
Хой порчозы ӧңненче,
Наа чуртасха хығырча.
Сыйбапча порчоҷах
Чӱреемні минің,
Аптапча порчоҷах
Мині сілиинең.
Олаңай порчоҷах
Мині часхарча,
Чалахай ӱреемні
Нымзах абытча.
Олаңай поларға
Мині ол ӱгретче.
Арығ хынысха
Мині ол апарча.
Порчоҷах алҷасча
Чазы, арығларда.
Порчоҷах хығырча
Сынҷых поларға.
Хой порчозы алҷасча,
Чӱректерің азыңар.
Хой порчозы ӧңненче,
Наа чуртасха хығырча.
Лариса ЧЕБОДАЕВА
(Кӱңӱре хызы)
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде