АЛТЫН МЕДАЛЬЛАР ХОЗЫЛЧАЛАР
17.08.2016
Хабарлар
Чайғыдағы XXXI Олимп ойыннары хыызына кірібісті тиирге чарир. Аннаңар командалар утып алған алтын, кӱмӱс, хола медальлар саны табырах алызып одырча. Ідӧк табырах алызып одырчалар Олимп ойыннарында араласчатхан хазналарның орыннары.
Кӧзідімге алза, Франция пастағы туста ӱзінҷі орында пик орных парғанға тӧӧй пілдірген. Паза ла кӧрзең, читінҷі орынзар тӱс чӧрібістір. Андағох ӱлӱстіг пасха даа хазналар. Россия читінҷі орыннаң тӧртінҷі орынға сығып алғаны прайзыбысты тың ӧріндірче. Анзы пістің команданың спортсменнері маңат тимненіс кӧзітчеткеннерін чахсы киречілепче тиирге чарир.
Олимп ойыннары тузында пістің кӱресчілерібіс махтаға сыхчалар. Роман Власовтың соонда Олимп ойыннарының чемпионы полыбысты грек-рим кӱрезінең айғасчатхан Давит Чакветадзе. Ол 85 кг кӧдірімде харбасхан. Иң аар 130 кг кӧдірімде Сергей Семёнов хола медаль утып алған. Пасха кӧдірімнерде марығлар узарадылчалар.
- Хаҷан піс Рио-де-Жанейрозар учуғарға тимненчеткенде, нинҷе медаль утып аларға сағынчазар тіп сурғаннар. Кӧмес кӧйтіктенерге киліскен. Алтын, кӱмӱс, хола медальларны пірердең дее утып алӌаң ползабыс, ӧрінерҷікпіс теем, - чоох-тапча грек-рим кӱрезінӌе Россияның ӧӧн тренері Гоги Когуашвили.
Ибдең сыхчатханда, кӱресчілерні чиңістер тударға алғаптырлар, оларға тың ізенчеткеннерін чазырбиндырлар. Сағам кӧзідімнері андағ ла хомай нимес: ікі алтын, пір хола медальлар. Кибістегі тоғазығлар тоозылғалахтар. Пірее медаль хайди даа хоза утарға, кӧрігҷілерге ӧрініс ағыларға киректер.
Евгений Тищенко, 2015 чылда боксча тилекей паза Европа чемпионы атха турысхан спортсмен, амды Олимп ойыннарының чемпионы полыбысты. 25 частығ боксер, 91 кг кӧдірімде марығлазып, азах меетте Казахстанның спортсмені Василий Левитті утып алған.
Олимп ойыннары тузында спорттың хайдағ даа кӧрімнерінҷе марығлар хайди хазыр парчатханын кӧрерге килісче. Оріністе дее, хомзыныста даа харах частары. Чиңіс тударына алай сыйыхтығ орынға сығып аларына парчан кӱс салылча. Прайзы даа чахсы оңарча: Олимп ойыннарының чемпионы полып алғаны - хайдағ даа спортсменнің чуртазында иң пӧзік чидіг.
Уғаа хазыр оңдайда иртчеткен спорт марығларының санына пӱӱнгі кӱнде суғҷа кимеліг чӱзер чарыстарны кирерге чарир. Оларның постарының кӧйтіктеніс-сӱмелері пар. Мында, сынап таа, суғны саңай «хайнатчатханға» тӧӧйлер. Кӧрерге уғаа хынығ паза чапсых.
Пу сығарысха орта хазналар аразында орыннар піди ӱлестіріл пардылар: пастағы орында США, аның 26 алтын, 23 кӱмӱс, 25 хола медальлар; ікінӌі орында Великобритания, аның 16 алтын, 17 кӱмӱс, 8 хола медальлар; ӱзінҷі орында Хыдат, аның 15 алтын, 14 кӱмус, 17 хола медальлар; тӧртінҷі орында Россия, аның 11 алтын, 12 кӱмӱс, 12 хола медальлар.
Автор :
Тимнеен Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде