ХАКАСИЯНЫҢ ПӰДІРІГЛЕРІ ПӦЗІК ПААЛАЛҒАН
24.08.2016
Хабарлар
20 АВГУСТТА, АҒБАННЫҢ ТӦРЕЕН КӰНІНДЕ, ГОРОДТЫҢ ЧУРТАҒҶЫЛАРЫ ПАЗА ААЛҶЫЛАРЫ ӰЛӰКӰНГЕ ТИМНЕНЧЕТКЕН ТУСТА, ХАКАСИЯ ПАЗЫ ВИКТОР ЗИМИН РЕСПУБЛИКАНЫҢ ААПҶЫЛАРЫН УДУРЛААН.
ТАНЫХТАЛҒАН КӰНДЕ АҒБАНДА ПОЛҒАННАР РОССИЯНЫҢ ХАЗНА ДУМАЗЫНЫҢ ДЕПУТАДЫ НАДЕЖДА СЕРГЕЕВНА МАКСИМОВА, СОВЕТ СОЮЗЫНЫҢ ПАЗА РОССИЯНЫҢ МАТЫРЫ, РОССИЯНЫҢ НАУКАЛАР АКАДЕМИЯЗЫНЫҢ ЧЛЕН-КОРРЕСПОНДЕНТӀ, УЧЕНАЙ, «ЕДИНАЯ РОССИЯ» ПАРТИЯНЫҢ ЧЛЕНІ АРТУР НИКОЛАЕВИЧ ЧИЛИНГАРОВ, РОССИЯНЫҢ ХАЗНА ДУМАЗЫНЫҢ ДЕПУТАДЫ ЛАРИСА КУЖУГЕГОВНА ШОЙГУ, «ОБОРОНПРОМ» ОПК АО-ның ДИРЕКТОРЛАР ЧӦБІНІҢ КНЕЗІ СЕРГЕЙ МИХАЙЛОВИЧ СОКОЛ. ІДӦК АНДА ХАКАСИЯНЫҢ МИНИСТЕРСТВО-ВЕДОМСТВОЛАРЫНЫҢ УСТАҒҶЫЛАРЫ АРАЛАСХАННАР.
Ирт тағдағы мемориал комплексi, музей-культура кіні паза Г.Я.Ремишевскаяның адынаң республиканың имнег туразының хирургия корпузы - пу ӱс орында пол килгеннер республиканың аалҷылары. Пастағызында экскурсияны иртірген Хакасияның культура министрі Светлана Окольникова. Хайди ол таныхтаан, Ирт тағдағы мемориал комплексінзер тынағ кӱннерінде наа ла хоных хонғаннар удаа килчелер.
- Мемориал комплексінең ырах нимес Хыныс тағ орныхча. Андар килген чиит сӧбірелер соонаң мемориал комплексінзер чаадаң айланмаан матырларға тіріг чахайахтар саларға тӱсчелер. Анзы пip чыл артиинаң кибірге дее кір парған, - чооғында таныхтаан Светлана Анатольевна.
Светлана Окольникова чооғын тоосханда, Ирт тағзар аппағас кӧгенектіг паза хара костюмнығ хоных хон салғаннар килгеннер. Пии аймаандағы Бондарев аалның чуртағҷылары Евгений паза Вероника Богдановтар 20 августта хоных хон салтырлар. Иртен, ЗАГС соонаң, ирепчі паза оларның туған-чағыннары, нанҷы-ӧӧрелері Ағбанзар Ирт тағдағы мемориал комплекссер чаадаң айланмаан чааҷыларға чахайахтар саларға ӧнетін килгеннер. Евгений Сойан-Сус ГЭС-та тоғынча, Вероника, тізең, олған садында музыка кружогын апарча. Оңдай полған-да, наа тӧстелген сӧбірені Хакасия пазы Виктор Зимин чылығ алғыстаан:
- Сӧбірелеріңде хаҷан даа ырыс ползын. Удур-тӧдір хайраллазып, улуғлазып чуртаңар. Пала кӧп тӧрідіңер.
Чиит сӧбіре аалҷыларнаң, танызып, сомға суурынғаннар.
- Пу сомны піс иң кӧріндіре орында турғызарбыс! - ӧрінче сӧбіре пазы Евгений Богданов. - Пеер киліп, мында мындағ улуғ аалҷыларға тоғазарынаңар сағынмаабыс таа.
Хакасияның музей-культура кіні сілиинең полған на кізіні, аалҷыны хайхатча полар. Анда, улуғ нимес экскурсия соонаң, аалҷылар паза республиканың устағҷылары сыйыхтарнаң алысханнар. «Кужугет Шойгуның адынаң культура фонды» коммерческай нимес организацияның директор тоғызын толдырчатхан Аяс Леонидович Лопсан Ағбандағы Л.Р.Кызласовтың адынаң чир-суғ ӱгренҷең музейіне «Сокровища долины царей Тувы» сомнар альбомын сыйлаан.
Халғанҷы, ӱзінҷі, орында Г.Я.Ремишевскаяның адынаң республиканың имнег туразының хирургия корпузы полған. Хакасия пазы
Виктор Зимин аалҷыларға хирургия корпузы нинҷе-де чыл мының алнында чир тітіреен соонаң пӱдірерге чарадығ алылғаннаңар искірген.
- Тиксі Хакасия хирургия корпузы пӱт парарын нинҷе-де чыл изере сахтаан. Ӱр ни месте пӱдіріг тоғыстары тоозылды. Сигіс хадыллығ имнег учреждениезінде прай республика имнен турар. Амды хирургия корпузына имнег оборудованиелерін аларға кирек. Піс «Единая Россия» партиядаң піске полыс пирерге сурынчабыс. Хирургия корпузына амғы тусха килістіре имнег оборудованиезін аларына 800 миллион салковай артиинаң кирек полар, - айланған аалҷыларзар Виктор Михайлович.
Аалҷылар имнег туразының хирургия корпузының синін паза кирексінізін таныхтааннар паза хабас пирерге молҷааннар.
- Сынап таа, пу син улуғ имнег корпузына кӧп оборудование кирек полар. Аннаңар хирургия корпузына наа оборудованиелер аларға сурығны пӧгерге полызарбыс, - теен Россияның Хазна Думазының депутады Лариса Шойгу.
Г.Я.Ремишевскаяның адынаң республиканың имнег туразының хирургия корпузында аалҷыларның Хакасиянын, пӱдіріг орыннарынаң танызары тоозылған. Ікінҷілес чоғыл, аалҷыларға Хакасияның пӱдіріглері кӧңнілеріне кірген. Амды олар Хакасияа имнег оборудованиелерін ал пирерге хабас пиреріне ізенерге халча. Сынап таа, хирургия корпузы пӱдіріл парған. Че кирек оборудованиелер чох ол прай кӱзінең тоғын полбинча...
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде