КІЧІГ ААЛЛАРДАҒЫ СПОРТСМЕННЕР МАРЫҒЛАСТЫЛАР
31.08.2016
Хабарлар
ОРҒАХ АЙЫНЫҢ 26-27-ҷі КӰННЕРІНДЕ ТАШТЫПТАҒЫ «УРОЖАЙ» СТАДИОНДА УЛУҒ СПОРТ ПАЙРАМЫ СУУМ-СААМДА ИРТТІ. ХАКАС ЧИРІНІҢ КІЧІГ ААЛЛАРЫНЫҢ ЧУРТАҒҶЫЛАРЫ МЫНДА АЙМАХ-ПАСХА СПОРТ КӦРІМНЕРІНДЕ КӰСТЕРІН СЫНААННАР. ТАШТЫПСАР РЕСПУБЛИКАНЫҢ ПРАЙ ДАА АЙМАХТАРЫНАҢ ААЛҶЫЛАР КИЛГЕННЕР.
ХАКАСИЯДА КИБІРГЕ КІР ПАРҒАН КІЧІГ ААЛЛАРНЫҢ СПОРТЧА ФЕСТИВАЛЬЫН ПУ ЧЫЛДА ИРТІРЕРГЕ ТЕЕС ТАШТЫПХА ТӰСКЕН. АҒАА ХОЗА, НААҶЫЛАЛҒАН «УРОЖАЙ» СТАДИОННЫ АЗАРҒА ЧАХСЫ СЫЛТАҒ ПОЛ ПАРҒАН.
ПУ ТАНЫҒЛЫҒ КӰНДЕ РЕСПУБЛИКАНЫҢ УСТАҒ-ПАСТАА ТАШТЫПТАҒЫЛАРНЫ ПАЗА КИЛГЕН ААЛҶЫЛАРНЫ АЛҒЫСТИРҒА ӦНЕТІН КИЛГЕН.
ПАЙРАМ СПОРТ КОМПЛЕКСІН АЗАРЫНАҢ ПАСТАЛҒАН. КИБІРЛИ ХЫЗЫЛ ЛЕНТАНЫ ХЫПЛИРҒА ӰЛӰС ТӰСКЕН ААЛҶЫЛАРНЫҢ САНЫНАҢ ХАКАСИЯНЫҢ ПАЗЫ ВИКТОР МИХАЙЛОВИЧ ЗИМИНГЕ, ӦӦРКІ ЧӦПТІҢ КНЕЗІ ВЛАДИМИР НИКОЛАЕВИЧ ШТЫГAШEBKE, СПОРТ МИНИСТРІ ВАЛЕРИЙ ВАСИЛЬЕВИЧ ДЕНЩИКОВХА. ЭЭЛЕРНІҢ САРИНАҢ АРАЛАСХАННАР ТАШТЫП АЙМААНЫҢ ПАЗЫ ВАСИЛИЙ ИВАНОВИЧ ШУЛБАЕВ, АЙМАХТЫҢ ДЕПУТАТТАР ЧӦБІНІҢ КНЕЗІ ВЕРА ДМИТРИЕВНА САЗАНАКОВА.
Спорт комплексін, суғ алтында чӱс чӧрҷең «Курск» атомнай кимеде саай полып, тынын пир салған Таштып чирінің оолғы Вячеслав Майнагашевтің адынаң адап саларға чарадығ алылған. Аннаңар, хызыл лентаны хыплаан соонда, устағҷылар махачы талайҷының хумартхы чардызы алнынзар чахайахтар салғаннар. Мындағ аарлас сылтаанда, махачы оолның ады чонда хаҷанға даа халар, ӧсчеткен тӧлге кӧзідім полар тіп ікінҷілес пір дее чоғыл.
Фестивальның ікінҷі чардығы алғыстастарнаң узарадылған. Пастағы сӧс Виктор Михайлович Зиминге пирілген. Позының чооғында ол таныхтаан:
- Пу спорт комплексін уғаа сидік туста пӱдірдібіс. Че республика, аймахтың устағ-пастаа, спорт министерствозы пip ӧменең тудынған сылтаанда, сағынған сағызыбыс тол парды. Алынҷа таныхтирға сағынчам аймахтың пазы Василий Иванович Шулбаевті. Ол - уғаа кӱстенҷік устағҷы. Аның андағ хылии ӱчӱн пӱдіріг пір дее тохтабаан.
Пӱӱн аймахтың чуртағҷыларын, пеер чыылысхан аалҷыларны республиканың спорт чуртазындағы наа чидігнең алғыстапчам. Таныхтирға кирек, пістің республикада спорт киреене уғаа чахсы хайығ салылча. Ирткен 7 чыл аразына 100-ке чағын спорт объекті пӱдіріл парған. Республиканың полған на 4-ҷі чуртағҷызы спортнаң айғасча. Сибирьдегі федеральнай округта Хакасия иң артыхтарның санында. Ол кічіг аалдағыларға чуртастарын тилідерre чахсы сылтағ пирче. Мындағ чидіглер спорт министрi Валерий Васильевич Денщиковтың кӱстенгені сылтаанда. Піске, ӱлгӱдегілерге, ол иділчеткен тоғысха хабазығ пирерге кӱстенерге кирек.
Чооғын тоосхан соонда, ол спорт киреене тӱзімніг хозым итчеткеннерге аарлығ сыйыхтар читірген. Оларның санында наа квартираның клӱзін алған кикбоксингче Россияның саблығ спорт узы Максим Прокопьев.
Чыылысхан чонны алғыстаан Владимир Николаевич Штыгашев:
- Пу сіліг, амғы тустарға килістіре стадионның орнында, піс кічіг полғанда, пансион турҷаң. Анда ӧӧнінде ӧкіс, чуға чуртапчатхан сӧбірелердегі палалар ӱгренҷеңнер. Мағаа ідӧк ол пансионда ӱгренерге киліскен. Сағысха кирчем, хайди піс оолағастар, ікі столбаны чирге одыртып, тоғыра сыра салыбызып, футбол ойнаҷаң хаалха идіп алғабыс. Ана андағ пістің «стадион» полҷаң.
Пӱӱнгі спортнаң айғасчаң комплексті кӧріп, чӱрек кӧдірілче. Амғы чииттерге, олған-узахха хазыхтарын тыытчаң уғаа чахсы оңдайлар пар. Мындағ стадионнар Хакасияда пар, че Таштыптағызы иң чахсы тіп санапчам.
Кӧп нимес, че уғаа матлама сӧстер чоохтаан спорт министрі Валерий Васильевич Денщиков. Хайди ол таныхтаан, Бразилияда
ирткен Олимп ойыннары полар алнында, пістің спортсменнерні тың абылааннар. Допингтернең тузаланчалар тіп чігленгеннер. Илееде спортсменге олимпиадада аралазарға чолын туюхтабысханнар. Аннаңар пістің хыйыхтаттырған чир-суғҷыларыбыстың ӱчӱн мында, Таштыпта, позыбыстың олимпиадазын пӧзік синде иртірербістер тіп ізендірген.
Республиканың устағ-пастаа паза спорт министерствозы адынаң Таштыптағы спорт комплексіне аарлығ сыйыхтар сыйлап пирген. Чылығ сӧстерін республиканың устағ-пастаана, спорт министерствозына паза прайзына, кем пу комплекс пӱдірерінде араласхан, читірген Таштып аймааның пазы Василий Иванович Шулбаев.
- Уғаа танығлығ пол парды, - теен ол - пӱӱнгі кічіг аалларның спорт фестивальы пістің аймахтың ӧӧн стадионы азылчатханына киліс парғаны.
Мин улуғ алғызым читірчем республиканың пазы Виктор Михайлович Зиминге, Ӧӧркі Чӧптің кнезі Владимир Николаевич Штыгашевке, спорт министрі Валерий Васильевич Денщиковха, пістің спорт комплексін пӱдірерге полызығ пирген ӱчӱн. Сидік тее тустар полза, ахча пирерін сыбыра хайығда тутханнар олар. Пӱкӱлее 42 миллион хорадылған. Ол асхынах нимес ахча нооза. Ӏдӧк алғызым читірчем пӱдірігҷілерге. Сурығлар аар даа пӧгілчетсе, олар тоғыстарын тохтатпааннар. Санапчам, амды спорт киpee пістің аймахта улам пӧзік синге сығар.
Алғыстас сӧстері чоохталған соонда, фестиваль пайрамни азылған. Ағаа уғаа чахсы тимнен салтырлар. Стадионға толдыра олғаннар теелбек салғаннар, сценадаң сарыннар чайылғаннар.
Анаң Хакасияның прай пулуңнарынаң килген кічіг аалларда чуртапчатхан спортсменнер парадха сыхханнар. Кӧрігҷілер ізіг айа сабызынаң удурлааннар. Пір тынысха ла ирт парыбысхан спорт пайрамының ол чардығы.
Азыранып, тынанып алған соонда, ӧӧн марығлар пасталыбысханнар. Программа хоостыра спортсменнер алты кӧрімҷе ікі кӱн кӱстерін сынааннар: волейбол, ниик атлетика, ағаснаң тартызары, кічіг футбол, арғамҷынаң тартызары, спортнаң айғасчатхан сӧбірелер марии. Хазыр, хынығ харбазығлар салтарлары мындағ:
кічіг футболҷа пастағы орында - Таштып аймаа,
ікінҷі орында - Ағбан пилтірі аймаа,
ӱзінҷізінде -Пии аймаа.
Волейболҷа чиңісчі -Ағбан пилтірі,
ікінҷі орында - Таштып,
ӱзінҷі орында - Асхыс.
Иң артых спорт сӧбірезі - Таштып аймаанаң,
ікінҷізі - Асхыс чирінең,
ӱзінҷізі -Ағбан пилтірі аймаанаң.
Ағаснаң тартызары:
пастағызы - Боград,
ікінҷізі -Шира,
ӱзінҷізі - Таштып.
Арғамҷынаң тартызарынҷа:
пастағызы - Ағбан пилтірі,
ікінҷізі - Таштып,
ӱзінҷізі - Шира.
Ниик атлетикаҷа:
пастағызы - Шира,
ікінҷізі -Ағбан пилтірі,
ӱзінҷізі - Пии аймаа.
Пӱкӱлее марығлар салтарлары піди пол парған:
пастағы орында - Таштып аймаа,
ікінҷі орында - Ағбан пилтірі аймах,
ӱзінҷізінде - Шира аймаа.
Іди улуғ марығларнаң «Урожай» стадионның, амды Вячеслав Майнагашевтің адынаң спорт комплексінің ікінҷі чуртазы пасталыбысты. Ізенчебіс, мында спортнаң айғазып, наа чемпионнар постарының чолларын азарлар.
Автор :
Георгий КУНУЧАКОВ Сомнар Максим АХПАШЕВТИ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде