ІКІ АЙ ПАЗЫНАҢ ТИМДЕ ПОЛАР
13.09.2016
Хабарлар
ПУ КӰННЕРДЕ ХАКАСИЯНЫҢ ПАЗЫ ВИКТОР ЗИМИН АҒБАНДА ФЕДЕРАЛЬНАЙ АХЧА ПОЛЫЗИИНАҢ ПӰДІРІЛЧЕТКЕН ПЕРИНАТАЛЬНАЙ КІНДЕ ТОҒЫСТАР ХАЙДИ ПАРЧАТХАНЫН СЫНЫХТААН.
ТАНЫХТИРҒА КИРЕК, ОБЪЕКТТЕ ТОҒЫС АЙНЫПЧА. ПӰӰНГІ КӰНДЕ МЫНДА 560 КІЗІ ІСТЕНЧЕ. ОЛАР ПЕРИНАТАЛЬНАЙ КІННІ ГРАФИК ХООСТЫРА 1 НОЯБРЬҒА ТЕЕРЕ ПӰДІРІБІЗЕРГЕ КИРЕКТЕР. ВИКТОР МИХАЙЛОВИЧ ПАСТАП ПАЛАТАЛАР ПАЗА ОПЕРАЦИОННАЙ ПОЛАР ОРЫННАРНЫ КӦРІП АЛҒАН, АНАҢ ШТАБ ЧЫЫЛИИН ИРТІРГЕН.
ЧЫЫЛЫҒДА ХАКАСИЯ ПАЗЫНЫҢ ПАСТАҒЫ ОРЫНҶЫЗЫ ОЛЕГ НАМ, РЕСПУБЛИКАНЫҢ ПӰДІРІГ ПАЗА ЧУРТ-КОММУНАЛЬНАЙ ХОНЫХ МИНИСТРІ СЕРГЕЙ МОЖАРОВ, ХАЗЫХ ХАЙРАЛЛАҶАҢ МИНИСТР НАТАЛЬЯ КОГАН, ФИНАНСТАР МИНИСТРІ СЕМЁН АЁШИН АРАЛАСХАННАР.
Виктор Михайлович штаб чыылиинда таныхтаан: «Кӧрчебіс, тӱрчедең Хакасияда 150 орыннығ перинатальнай кін тимде полар. Таныхтирға кирек, республикада чылдаң чылға пала саны ӧсче, аннаңар пу учреждениені піс тузында пӱдір парирбыс. Ізенчем, мында хазых палаларны Хакасияның на нимес, Хызылчар крайының, Туваның ипчілері табарлар».
Штаб чыылиинда республиканың пӱдіріг паза чурт-коммунальнай хоных министрі Сергей Можаров парчатхан пӱдіріг тоғыстарынаңар сан пиріс иткен: «Тиксі алза, наа перинатальнай кін 3 миллиард 538 миллион салковайға тур парған, ол санда пӱдіріг тоғыстарына 1 миллиард 916 миллион салковай парыбысхан, наа оборудование аларына - 1 миллиард 418 миллион салковай. Амғы тусха перинатальнай кіннің пастағы блогы прай даа пӱдіріл парған тиирге чарир, ікінҷі паза ӱзінҷі корпустар 80 %-ке тимделер. Мында тоғыстарны пӱдірігҷілер 30 сентябрьға теере тоозыбызарға киректер. Иң кӧп тоғыс тӧртінҷі корпуста халған, че ол 20 октябрьға теере тимде полар» .
Че Виктор Михайловичті ӧӧнінде кадрлар сурии сағыссыратхан, аны ол, республиканың пала тапчаң учреждениезінде имҷілернең паза медсестраларнаң тоғасханда, ӱзӱрген.
Республиканың хазых хайраллаҷаң министрі Наталья Коганның чооғынаң, министерство ӱзінҷі чылы кирек специалисттерні тимнирінҷе тоғыс апарча. Имҷілер пілістерін Томскта, Хызылчарда, Екатеринбургта, Москвада алғытханнар. Республиканың пала тапчаң туразында 500 артиинаң кізі істенче, оларның кӧбізі чииттер. Перинатальный кінде тоғынарға хоза 226 специалист киректелчеткен, оларның санында 70 имҷі, 156 фельдшер паза медсестра. Амды имҷілернең сидіксініс чоғыл, 68 кізіні тоғысха алып алғаннар, чыл тоозылғанҷа
2 специалист имнег учреждениезінің ӧмезіне хозылар. Медсестралардаңар паза фельдшерлердеңер чоохтаза, 90 кізі тоғысха алылған, 66 специалист таап аларға халған. «Министерствозар пасха регионнардаң перинатальнай кінде тоғынарға сағынчатханнар сыбыра сығдыратчалар, - таныхтаан Наталья Васильевна, - аннаңар пу сурығны піс ікі ай аразына пӧгібізербіс».
Тоғазығ тоозылчатханда, республиканың пала тапчаң туразының тоғынҷылары Хакасияның пазы Виктор Михайлович Зиминге, хазых хайраллаҷаң сфераа улуғ хайығ салчатхан ӱчӱн, алғыстарын читіргеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде