ЧУРТАҒҶЫЛАР ӦТКІН АРАЛАСХАННАР
20.09.2016
Хабарлар
Таштып аймаандағы Пиҷе хол аалның чуртағҷылары 18 сентябрьда ирткен табығларда ӧткін араластылар. Иртеннең сығара аалдағы школаның ізии сообин турған.
Орындағы табығ комиссиязының кнезі Маргарита Степановна Сагалакова полған. Комиссияда Раиса Куюкова, Людмила Бозыкова паза Марина Чертыгашева полғаннар.
Мин школазар 10.00 часха килгенімде, 16 кізі ӱн пир салған полған. Пиҷе хол Хакасияның кічіг аалларын тилідер паза хайраллир программазына кірче. Тиксі аалда ікі квартиралығ чибіргіҷе тура турча.
Маргарита Степановна Сагалакова табығлар хайди парчатханнаңар чоохтаан: «Табығ комиссиязы 8.00 час иртеннең тоғызын пастаан. Табығларның тоғызын кӧрчеткен кізілер «Единая Россия», «КПРФ» партиялардаң мында пар.
Пістің аалдаң табығлар пічиине 65 кізі кірче. 15 кізее «открепительнай удостоверение» пир салғабыс. Военкомат танығлары хоостыра служба иртчеткен чииттерні пічіктең сығарғабыс. Пӱӱлгі табығлар ипти иртчеткенін таныхтирҷыхпын».
Табығлар тузында комиссия кізілеріне иртеннең иирге теере маң чох поладыр. Пічіктерні иптирге, саннарны хайығда тударға кирек ле. Ӱн пирерге килген полған на кізее ікілер чаҷын пир турғаннар. Пірсінде Россияның Хазна Думазына депутат ӱчӱн ӱн пирчезің, ікінҷізінде партия ӱчӱн ӱн пирілче.
Раиса Степановна Куюкова, тынағдағы ӱгретчі, «Единая Россия» партия ирт парыбызарына ізенчем теен. Салтарлар хоостыра «Единая Россия» партия табығларда утып алған.
Табығ комиссиязының кізілері ӱн пирерге кил полбинчатханнарның иблерінҷе 14.00 частаң чӧріп пастааннар. Аалда пір ле ууҷаның ибінзер парарға киліскен. Пасхазы, школазар киліп, ӱн пирген.
Табығ комиссиязының ипчілері хакас кӧгенектерін кис салтырлар. «Чахайахтар ла чіли одырғлап салтырзар», - таныхтаам мин. Уғаа морсымнығ кӧрінгеннер. Олар чалахай кӧңніліг тоғынғаннар. Иреннердең комиссия кізізі Валерий Юрьевич Сагалаков полған.
Автор :
Елена ЧЕЗЫБАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде