СИБИРНӀҢ ТИЛІЗІ ПІРГЕ ТОҒЫСНАҢ ПАЛҒАЛЫСТЫҒ
27.09.2016
Хабарлар
Хакасияның Ӧӧркі Чӧп кнезі Владимир Штыгашев Сибирьдегі федеральнай округтың субъекттерінің хазна ӱлгӱ органнар устағҷыларының чыылиинда араласхан. Ол 25 сентябрьда Тува Республикада Россия президентінің Сибирьдегі федеральнай округтағы полномочиеліг кізізі Сергей Меняйлоның устаанаң ирткен.
Сибирьдегі регионнар устағҷылары Россияның Федеральнай Чыылииның Хазна Думазынзар, округтағы хазна ӱлгӱзінің закон сығарҷаң органнарынзар паза орындағы пос устаныстарынзар депутаттар табығларының салтарларын ӱзӱргеннер. 18 сентябрьда - пірге табығлар кӱнінде - Хазна Думазынзар депутаттар Туваның паза Забайкальскай крайның пастары, Алтай паза Хызылчар крайларының, Омск паза Томск областьтарының закон сығарҷаң ӱлгӱ органнарынзар депутаттар, орындағы ӱлгӱлерзер 300 азыра депутаттар чӧптерінің депутаттары паза 250 азыра муниципальнай пӱдістер пастары табылғаннар.
Пӱӱн хазна ӱлгӱ органнарына пілдірте нааҷылалған депутаттар корпузынаң чӧптіг тоғынарға, Сибирьдегі регионнарның социальнай паза экономика тилізіне кӧстелген тоғысха депутаттарны ӧткін тартарға кирек тіп таныхтаан Россия президентінің Сибирьдегі федеральнай округтағы полномочиеліг кізізі Сергей Меняйло.
Ідӧк чыылығ тузында "Сибирское соглашение" регионнар аразындағы ассоциацияның тоғызын чахсыландырары ӱзӱрілген.
"Мин ӧрінчем, пістің прайзыбыстың пір сағызы - Сибирьдегі регионнар аразындағы хада-пірге тоғыс - узарадылар, - чыылығ салтарларын чарытхан Владимир Штыгашев. - Мында опытнаң ӱлезерінеңер ле чоох парбинча, хайзы уғаа кирек. Пӱӱнгі кӱнде округтағы субъекттер аразында экономикадағы, чон чуртазындағы паза культурадағы палғалысчаң оңдайларнаң ӧткін тузаланарға кирек, аннаңар полномочиеліг кізі ідӧк чоохтаан. Мындағ хада-пірге тоғыснаң Сибирьнің не нимес, ідӧк тиксі Россияның тилізі палғалыстығ".
Автор :
Хакасияның Ӧӧркі Чӧбінің хабарлар пӧлии
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде