«ТОҒЫНЫҢАР, ХАРЫНДАСТАР!»
07.10.2016
Хабарлар
Киҷее тиксі Россияда иртірілчеткен «Тоғыныңар, харындастар!» акция Ағбандағы «Саяны» стадион алнында ирткен. Пу акция, боевиктерні чох идер операцияда аралазып, махачы тудынып, чуртазын пир салған полицияның кічіг лейтенанты Магомед Нурбагандовтың хумартхызына чарыдылған.
Ағбандағы полицейскайлар пу акцияа хозылғаннар. Стадион алнында Ағбан городча УМВД-ның ГИБДД, патруль-пост службазының, ведомствони нимес хадағ пӧлиинің полицейскайлары стройға турыбысханнар. Оларның соонда полиция автомобильлері турған. Ідӧк оларға хозылғаннар городтың дружинниктері паза 2 № школаның ӱгренҷілері. Холларында олар ах шарлар паза кӧйчеткен свечілер тутханнар.
Чыылған чонның алнында чоох тутханнар Ағбан городча УМВД-ның полиция пастығының орынҷызы Андрей Петров паза УМВД-дағы Халых чӧбінің кнес орынҷызы Олег Буханников. Олар Магомед Нурбагандов, боевиктернің холына кір парып, хайди махачы тудынғаннаңар чоохтааннар. Матыр полицейскайның халғанҷы сӧстері полған: «Тоғыныңар, харындастар!»
Боевиктер, видеокамераа суурып, Нурбагандовтаң позының туғаннарынзар паза хада тоғынчатхан полицейскайларзар полициядағы тоғыстаң парыбызарға айланыс хысханнар. Че матыр оол хысхырыбысхан: «Тоғыныңар, харындастар!» Аны андох ат салғаннар.
Россияның президенті Владимир Путиннің указынаң Магомед Нурбагандовха, сындырлығ, махачы тудынған ӱчӱн, Россияның Матыры ат пирілген. Ол ам прайзына махачы тудыныстың кӧзідімі полча.
Ағбанда иртірілген мероприятиеде автомобильлерге чапсырҷаң «Тоғыныңар, харындастар!» стикерлер таратханнар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде